ޓްރެފިކް މައްސަލަތައް ޙައްލުކުރުމަށް ހުޅުމާލޭގެ މަގުތަކަށް ބޮޑެތި ބަދަލުތަކެއް ގެންނަން ނިންމާފައިވާކަމަށް ހައުސިންގ ޑެވެލޮޕްމެންޓް ކޯޕަރޭޝަން (އެޗްޑީސީ)ން ހާމަކޮށްފިއެވެ.
އެޗްޑީސީއިން މިއަދު ނެރުނު ނޫސް ބަޔާނެއްގައި ބުނެފައިވަނީ ހުޅުމާލޭގެ ބައެއް ސަރަހައްދުތަކުގެ މަގުތަކަށް ބޮޑެތި ބަދަލުތަކެއް ގެންނަން ނިންމާފައި ވަނީ ޓްރެފިކް މައްސަލަތައް ހައްލުކޮށް، ހުޅުމާލޭގެ މަގުމަތަކަކީ އެކްސިޑެންޓް މަދު ރައްކާތެރިތަނަކަށް ހެދުމަށް ކަމަށެވެ.
އެޗްޑީސީން ވިދާޅުވިގޮތުގައި އެ ބަދަލުތައް ގެންނަން ނިންމީ ހުޅުމާލޭގެ ބައެއް މަގުތަކުގައި ކާރުބާރު ބޮޑުވެ ނުރައްކާތެރި އެކްސިޑެންޓްތައް ހިނގަން މެދުވެރިވުމާއި މަގު ބޭނުންކުރާ ފަރާތްތަކަށް ދަތިވުމުގެ ސަބަބުން ކަމަށެވެ.
އެގޮތުން، ހުޅުމާލޭގެ މަގުތަކުގެ ތެރެއިން ޓްރެފިކް އެންމެ ބާރުބޮޑުވާ އަދި ނުރައްކާތެރިކޮށް ހުރި ސަރަހައްދުތައް ބެލުމަށްފަހު، ފުލުހުންނާއި އެޗްޑީސީން އެކުލަވާލި ތަފާސްހިސާބުގެ އަލީގައި 11 ސަރަހައްދަކަށް ބަދަލު ގެނައުމަށް ނިންމާފައި ވެއެވެ.
އެ މަސައްކަތުގެ ތެރެއިން ބައެއް ވަށްބުރު (ރައުންޑެބައުޓްސް) ގާއިމްކޮށް، ބައެއް ސަރަހައްދުތަކުގައި ސައިން ބޯޑުތައް ބަހައްޓުމަށް ވަނީ ނިންމާފައެވެ.
މަގުތަކަށް ގެންނަންޖެހޭ ބަދަލުތައް ގެނައުމުގެ ޢަމަލީ މަސައްކަތް މި މަހުގެ ތެރޭގައި ފެށުމަށް ނިންމާފައިވާ ކަމަށްވެސް އެޗްޑީސީއިން ހާމަކުރެއެވެ. އަދި މި އަހަރުގެ ތެރޭގައި މި މަސައްކަތް އެއްކޮށް ނިންމާލުމަށް އެ ކޯޕަރޭޝަނުން ވަނީ އަމާޒު ހިފާފައެވެ.
އެޗްޑީސީއިން އިތުރަށް ހާމަ ކުރިގޮތުގައި، މަގުތަަކަށް ބަދަލުގެނައުމުގެ މަސައްކަތް އެއްކޮށް ނިމުމުން ހުޅުމާލޭގެ ޓްރެފިކް ފްލޯ ވަރަށް ބޮޑަށް ރަނގަޅުވެ، މަގުތަކުގައި ތޮއްޖެހުން ކުޑަވުމާއެކު، ވެހިކަލްތަކާއި ހިނގާ މީހުންނަށްވެސް ހުޅުމާލޭގެ މަގުތަކަކީ އަމާން އަދި ރައްކާތެރި ތަނަކަށް ވެގެންދާނެއެވެ.
Advertisement
This content is created and paid for by advertisers and does not involve Voice Journalists
