އައްޑޫ ސިޓީން ކަރަންޓު ކެނޑުނީ އެ ސިޓީގެ މަގުތައް ހެދުމުގެ މަސައްކަތުގެ ތެރެއިން އެޗްވީ ކޭބަލަކަށް ގެއްލުންވުމުން ކަމަށް ފެނަކައިން ބުނެފިއެވެ.

އައްޑޫ ސިޓީއިން ކަރަންޓު ކެނޑުމާއި ގުޅިގެން ފެނަކައިން ނެރުނު ނޫސްބަޔާނެއްގައި ބުނީ، މިމަހުގެ އެކެއްގައި ކަރަންޓު ކެނޑުނީ އައްޑޫ މަގު ހަދާ އެފްކޮން ކުންފުނީގެ މަސައްކަތުގެ ތެރެއިން އެޗްވީ ކޭބަލެއް ހަލާކުވުމުން ކަމަށެވެ.

މިގޮތުން އިއްޔެ ވެސް ދިމާވީ މިފަދަ މައްސަލައެއްކަން ފާހަގަކުރަމުން ފެނަކައިން ބުނީ، އެ ކޯޕަރޭޝަންގެ ޓެކްނިކަލް ޓީމުން އެ މައްސަލަ ވަގުތީ ގޮތުން ހައްލުކޮށްފައިވާ ކަމަށެވެ. އެހެންނަމަވެސް، މަގު ހެދުމުގެ މަޝްރޫއު ކުރިއަށް ގެންދިޔުމުގެ ސަބަބުން ނެޓްވޯކަށް ދިމާވާ މައްސަލަ އިތުރަށް ދިމާވެދާނެ ކަން ގަބޫލުކުރާ ކަމަށާއި، އެކަން ހައްލު ކުރުމަށް އަބަދުވެސް މަސައްކަތް ކުރަމުންދާނެ ކަމަށް ފެނަކައިން ބުންޏެވެ.

Advertisement

އްޑޫގައި މިހާރު ހަރުކޮށްފައި ހުރި ޖެންސެޓްތަކުގެ ތެރެއިން 1.8 މެގަވޮޓްގެ އިންޖީނަށް ދިމާވެފައިވާ މައްސަލައަކާ ގުޅިގެން އައްޑޫގެ ގުޅިފައިވާ ރަށްތަކަށް ބޭނުންވާ މިންވަރަށް ކަރަންޓު އުފެއްދުމަށް ދަތިތަކެއް ކުރިމަތިވެފައިވާކަން ފާހަގަކޮށް ފެނަކައިން ބުނީ، އެ އިންޖީނު މަރާމާތު ކުރުމަށް ބޭނުންވާ ސްޕެއާ އަކީ ރާއްޖެއިން ލިބެން ހުންނަ އެއްޗަކަށް ނުވާތީއާއި ސްޕެއާ ހޯދުމުގައި ދަތިތަކެއް ކުރިމަތިވެފައިވާކަމަށެވެ.

އެހެންނަމަވެސް، އެ ސްޕެއާ ހޯދައި އިންޖީނު މަރާމާތު ކުރުމުގެ އިތުރުން 1.6 މެގަވޮޓްގެ އައު ޖެންސެޓެއް އައްޑުއަށް ފޮނުވުމުގެ މަސައްކަތް ކުރަމުންދާކަމަށް ފެނަކައިން ވަނީ ހާމަކޮށްފައެވެ.

ހަމައެއާއިއެކު، އައްޑޫގެ ކަރަންޓުގެ ހާލަތު ކުރިއަށް އޮތް 20 އަހަރަށް ބޭނުންވާ ވަރަށް ކެޕޭސިޓީ އިތުރުކުރުމަށް ޑީސެލް ޕަވާ ޖެނެރޭޝަން އެންޑް ޑިސްޓްރިބިއުޝަން ސިސްޓަމް ޕްރޮޖެކްޓް ފޯ އައްޑޫ ސިޓީގެ ނަމުގައި، ޗައިނާގެ ޑޮންފެންގް އިލެކްޓްރިކް އިންޓަނޭޝަނަލް ކޯޕަރޭޝަނާ ހަވާލުކޮށްގެން ޒަމާނީ ޕަވާހައުސްއެސް ގާއިމުކުރުމަށް އެއްބަސްވުމެއްގައި ސޮއިކޮށް މަސައްކަތް ފެށިފައިވާކަމަށް ވެސް ފެނަކައިން ބުނެއެވެ.