2015 ވަނަ އަހަރުގެ މާޗް މަހުގެ 21 ވަނަ ދުވަހު ރޭ ހިންގި މާރާމާރީއެއްގައި ލ. މުންޑޫ ނޫވިލު، އަލީ ޒިޔަދަމް މަރާލި މައްސަލާގައި، އެކަމުގައި ބައިވެރިވުމުގެ ކުށް ސާބިތުވި ލ. މުންޑޫ/ ބީޗުވިލާ، އަލީ ސިފާމް 25 އަހަރަށް ޖަލަށްލާން ކުރި ހުކުމް ހައި ކޯޓުން މިއަދު ދަމަހައްޓައިފި އެވެ.

 އަލީ ޒިޔަދަމް މަރާލި މައްސަލައިގައި މަރާލި މައްސަލާގައި 7 އަހަރު ފަހުން ހުކުމްކޮށްފައިވާއިރު، އެ މައްސަލައިގައި ދައުވާ އުފުލާފައިވަނީ ސިފާމް ގެ އިތުރުން ލ.މުންޑޫ/ ހީނާވިލާ، މުހައްމަދު ޝަނޫންގެ މައްޗަށެވެ.

އޭގެ ތެރެއިން ޝަނޫންގެ މައްޗަށް ގަސްދުގައި މީހަކު މެރުމުގެ ކުށް ސާބިތުވެ، މަރުގެ ހުކުމް ކްރިމިނަލް ކޯޓުން އިއްވިއިރު، ސިފާމް އެކަމުގައި ބައިވެރިވިކަމަށް ވަނީސާބިތުވެފައެވެ.

ސިފާމް ގެ މައްޗަށް ގަސްތުގައި މީހަކު މަރާލި ކަމުގެ ކުށް ސާބިތުނުވި ނަމަވެސް، އޭނާ އަމަލުކުރި ގޮތުގެ ސަބަބުން ޒިޔަދަމްއަށް ސަލާމަތްވާން ލިބުނު ފުރުސަތުތައް ހަނިވެގެން ދިޔަކަން ވަނީ  ދަށު ކޯޓުގައި ކުރިއަށް ދިޔަ ޝަރީއަތުގައި ސާބިތުވެފައެވެ.

އެއާއިއެކު، ދަށު ކޯޓުން ވަނީ އެނާގެ އަމަލުތައް ހުރީ އިންސާނީ ކަރާމާތާއި ޤަދަރަށް އުނިކަން އަންނަ އަދި އެންމެ މަތީ ދަރަޖައިން އަދަބު ކަނޑައެޅޭ ޙާލަތުގައިކަމަށް ނިންމައި، އެ ކުށަށް ކަނޑައެޅޭނެ އެންމެ މަތީ އަދަބުކަމަށްވާ 25 އަހަރުގެ ޖަލު ޙުކުމެއް ސިފާމް ގެ މައްޗަށް އިއްވާފައެވެ.

މި ހުކުމް ސިފާމް ގެ ފަރާތުން ހައިކޯޓުގައި އިސްތިއުނާފު ކޮށްފައިވާއިރު، މި މައްސަލައާއި ގުޅޭ ގޮތުން މިއަދު ކުރިއަށް ދިޔަ އަޑު އެހުމުގައި ހައި ކޯޓުން ކުރި ހުކުމްގައި ބުނީ، ސިފާމްގެ މައްޗަށް އަދަބު ކަނޑައަޅަން ޖެހޭނީ ގާނޫނުލްއުގޫބާތުގެ ދަށުން ކަމަށް އޭނާގެ ފަރާތުން ބުނި ނަމަވެސް، ބިރު ދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާ ކުރުމުގެ ގާނޫނުގެ ދަށުން އޭނާގެ މައްޗަށް ކަނޑައެޅި އަދަބު ރަނގަޅު ކަމަށެވެ. މީގެ އިތުރުންވެސް، އަދަބު ކަނޑައެޅުމުގައި ބިރު ދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާ ކުރުމުގެ ގާނޫނަށް ބެލޭނެ ކަމަށް ވެސް އެ ހުކުމްގައި ވެއެވެ.

ޒިޔަދަމަށް ހަމަލާދޭން ފެށުމުން ސަލާމަތްވުމަށްޓަކައި އޭނާ ފިލަން ދުއްވައިގަތުމުން އޭނާގެ ގައިގައި ހިފެހެއްޓީ ސިފާމް ކަން ހެކިންގެ ބަހުން އެނގޭތީ ޒިޔަދަމްގެ މަރުގައި ސިފާމްގެ ބައިވެރިވުން އޮތްކަން ސާބިތުވާއިރު، ބިރު ދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާ ކުރުމުގެ ގާނޫނުގެ ދަށުން ސިފާމް 25 އަހަރަށް ޖަލަށްލުމަށް ކުރި ހުކުމަށް ބަދަލު ގެންނަންޖެހޭ ސަބަބެއް ނެތް ކަމަށް މައްސަލަ ބެއްލެވި ތިން ފަނޑިޔާރުން ކަމަށްވާ ފަނޑިޔާރު ހުޒައިފާ މުހައްމަދާއި ފަނޑިޔާރު ހަސަން ޝަފީއު އަދި ފަނޑިޔާރު މުހައްމަދު ސަލީމް ގެ އިއްތިފާގުން ވަނީ ސިފާމްގެ މައްޗަށް ހުކުމް އިއްވާފައެވެ.

2015 ވަނަ އަހަރުގެ ހިނގާދިޔަ މި ހާދިސާގައި ޒިޔަދަމްގެ ބޮލަށާއި ބުރިކަށީގެ އިތުރުން ފައިގެ ފަލަމަސްގަނޑަށް ތޫނު އެއްޗަކުން ހަމަލާދީފައިވާ އިރު، އޭނާ މުންޑޫ ހެލްތު ސެންޓަރަށް ގެންދިޔައިރުވެސް މަރުވެފައިވާ ކަމަށް އޭރު ފުލުހުން ވަނީ ބުނެފައެވެ.