ކުރީގެ ދެބަންޑާރަނާއިބުން ކަމުގައިވާ ޢާޒިމާ ޝަކޫރާއި ދިޔާނާ ސަޢީދު އިސްވެ ތިއްބަވައިގެން، ދިވެހިރާއްޖޭގެ ދުސްތޫރީ އޮނިގަނޑާއި އެ އޮނިގަނޑުގެ ދަށުން ދައުލަތްހިންގުމުގެ ދިރާސާއެއް ހައްދަވަންނިންމަވައިފިއެވެ. 

“ވޮއިސް”އަށް މަޢުލޫމާތު ދެއްވަމުން، އެބޭފުޅުން ވިދާޅުވީ، މިއީ ޢިލްމީ އަދި ފަންނީ މަސައްކަތެއްކަމުގައެވެ. އަދި އެބޭފުޅުން އެ މަސައްކަތްކުރައްވަން ނިންމެވީ، ޤައުމީ ޚިދުމަތެއްގެ ގޮތުގައި ކަމަށެވެ.

މިކަން ކަމުގެ އިތުރުން، އެ ދެ ބޭފުޅުންނަކީވެސް ޤާނޫނުއަސާސީ އެކުލަވާލުމުގެ މަސައްކަތުގައި ބައިވެރިވި، އަދި ޤާނޫނުއަސާސީ ތަންފީޛުކުރުމުގައި މަސައްކަތްކުރުމުގެ ފުރުޞަތު ލިބުނު ބައެއް ކަމަށް ވާއިރު، އެ ތަޖުރިބާ ހުރި ބައެއްގެ ހައިސިއްޔަތުން، އެފަދަ މަސައްކަތެއްކޮށް، ލިޔެ، ރިކޯޑުކޮށް، މިހާރުގެ ދިވެހި މުޖްތަމަޢަށާއި، ކިޔަވާކުދިންނަށާއި އަދި މުސްތަޤްބަލަށް ފޯރުކޮށްދިނުމަކީ ކޮންމެހެން ކުރަންޖެހިފައިވާ ކަމެއްކަމުގައި ދެކޭތީ ކުރާ ދިރާސާއެއް ކަމަށް ވެސް ވިދާޅުވިއެވެ. 

އެ ދެބޭފުޅުން ވިދާޅުވި ގޮތުގައި، މިމަސައްކަތުގައި ޤާނޫނުއަސާސީގައި ބަޔާންކުރާ ހަމަތަކާއި ދައުލަތް ހިންގުމުގައްޔާއި  ޤާނޫނުއަސާސީއަށް ޢަމަލުކުރުމުގައި ކަންކަންހިނގާފައިވާގޮތް ދިރާސާކޮށް މުސްތަޤްބަލްއޮންނަންވާނޭ ގޮތްކަމަށް އެބޭފުޅުން ދެކޭގޮތުގެ ތަޞައްވުރަށް ވާޞިލުވުމުގައި ޤާނޫނީ ނިޒާމަށް ގެންނަންޖެހޭ ބަދަލުތަކަށް އަލިއަޅުވާ ލައްވާނެއެވެ. 

މިދިރާސާގެ މަޢުލޫމާތު ހާމަކުރުމަށް އަންނަ ހަފްތާގެ ތެރޭގައި ޖަލްސާއެއް ބޭއްވުމަށް އެ ދެބޭފުޅުން ވަނީ ނިންމަވާފައެވެ: