މިދިޔަ ބުދަ ދުވަހުގެރޭ މާލޭގައި ހިންގި މާރާމާރީއާ ގުޅިގެން ހަ ބިދޭސީއަކު ޑީޕޯޓް ކުރަން ނިންމައިފިއެވެ.
ބުދަ ދުވަހު އަސްރަފީ މަގުގައި ހިންގި އެ މާރާމާރީއާ ގުޅިގެން ޒަޚަމްވި ދެމީހަކަށް އައިޖީއެމްއެޗްގައި ފަރުވާދީފައިވެސް ވެއެވެ. ނަމަވެސް، އެމީހުންގެ ހާލު ގޯސް ނުވުމުން ފަރުވާ ދިނުމަށް ފަހު، ވަނީ ހޮސްޕިޓަލުން ދޫކޮށްލައިފައެވެ.
މައްސަލައާއި ގުޅިގެން އެ ދުވަހު ފަސް މީހަކު ފުލުހުންގެ ބެލުމުގެ ދަށަށްވެސް ގެނެސްފައިވާކަމަށް ފުލުހުން ބުނެފައިވެއެވެ.
އެކަމާއި ގުޅިގެން އިމިގްރޭޝަނުން އެކްސްގައި ކުރި ޕޯސްޓެއްގައި ބުނީ، އެ މައްސަލައާ ގުޅިގެން ހަ ބިދޭސީއަކު ރޭގެ ވަގުތެއްގައި އިމިގްރޭޝަނާ ހަވާލުކޮށްފައިވާ ކަމަށެވެ.
އިމިގްރޭޝަނުންގެ ޕޯސްޓުގައި އެމީހުންގެ ފޮޓޯ އާއި އުމުރު ވެސް އާންމުކޮށްފައިވާއިރު، އެ ހަ މީހުންގެ ތެރޭގައި ހިމެނެނީ އުމުރުން 26 އަހަރުގެ ފިރިހެނަކާއި 27 އަހަރުގެ ފިރިހެނަކާއި 29 އަހަރުގެ ދެ ފިރިހެނުންނާއި 38 އަހަރުގެ ފިރިހެނަކާއި 40 އަހަރުގެ ފިރިހެނެކެވެ.
އިމިގްރޭޝަން ގާނޫނުގެ ދަށުން މި ހުރިހާ ބިދޭސީންގެ ވިސާ ބާތިލުކޮށް، ޑީޕޯޓުކުރުމަށް މިހާރު ނިންމާފައިވާ ކަމަށް އިމިގްރޭޝަނުން ބުނެފައިވެއެވެ.
ރާއްޖޭގައި ބިދޭސީންގެ މައްސަލަ ހައްލުކުރުމަށް މުހިންމު ފިޔަވަޅު ތަކެއް ސަރުކާރުން އަޅަމުންދާ ކަން ފާހަގަކޮށްލަންޖެހެއެވެ.
Advertisement
This content is created and paid for by advertisers and does not involve Voice Journalists
