ރާއްޖެ އެތެރެކޮށް ބޭނުންކުރަމުންގެންދާ އެލެގްރާ ބޭހުގެ ތިން ބެޗެއް އެތެރެކޮށް، ވިއްކާ އަދި ބޭނުންކުރުން މަނާކޮށްފިއެވެ.
މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިއަދު ކުރި އިއުލާނެއްގައި ބުނީ އެލެގްރާގެ ތިން ބެޗަކުން ކޮލިޓީ މައްސަލަތަކެއް ދިމާވެފައިވާކަމަށް އެ ބޭސް އުފައްދާފައިވާ ކުންފުނި ކަމަށްވާ ސެނޮފީ އިންޑިއާ ލިމިޓެޑް އިން، އެލާޓް ކޮށްފައިވާ ކަމަށެވެ.
އެ ބެޗުތަކަކީ، AL1223019, AL1223029 އަދި AL1223060 އެވެ.
އެހެންކަމުން އެ ތިން ބެޗު ރާއްޖެ އެތެރެކުރުމާއި ވިއްކުން އަދި ބޭނުންކުރުމަކީ މަނާކަމެއް ކަމަށް އެ އޮތޯރިޓީން ވަނީ އިއުލާނުކޮށްފައެވެ.
އެމްއެފްޑީއޭއިން ވަނީ، އެ ބެޗުތައް ފާމަސީ، ބޭސް ގުދަނެއް ނުވަތަ ސިއްހީ ޚިދުމަތްދޭ ތަނެއްގައި ހުރި ނަމަ އެކަން އެމްއެފްޑީއޭގެ އީމެއިލް މެދުވެރިކޮށް އެންގުމަށް އެދިފައެވެ.
އަދި ބޭހާ ގުޅޭ އިތުރު މައުލޫމާތު ބޭނުންނަމަ އެ އޮތޯރިޓީގެ ހޮޓްލައިން ނަންބަރު، 7200321 އަށް ގުޅުމަށްވެސް އެދިފައިވެއެވެ.
ކުޑަކުދިންނަށް ދޭ އެލެގްރާ ސަސްޕެންޝަނަކީ އެލާޖިކްވުމުގެ ސަބަބުން ދިމާވާ ތަފާތު އަލާމާތްތަކަށް ފަރުވާ ދިނުމަށް އާއްމުކޮށް ދޭ ބޭހެކެވެ. އަދި، އާދައިގެ ރޯގާއާއި، ހުން އައުން، ލޮލުގައި ރިއްސުން ނުވަތަ ލޯ ރަތްވުން ފަދަ ކަންކަމަށްވެސް އެ ބޭސްދެއެވެ.
Advertisement
This content is created and paid for by advertisers and does not involve Voice Journalists
