މޯލްޑިވްސް މަނިޓަރީ އޮތޯރިޓީ ޒަމާނީ ސެންޓްރަލް ބޭންކަކަށް އަދި ހެޔޮ ނަތީޖާ ނެރޭ ބޭންކަކަށް ހެދުމަށް އެތަނުގެ އޮނިގަނޑަށް ބަދަލު ގެނެސްފިއެވެ.

މިކަމާ ގުޅޭގޮތުން މޯލްޑިވްސް މަނިޓަރީ އޮތޯރިޓީ، އެމްއެމްއޭގެ އޮފިޝަލަކު ވިދާޅުވީ، އޮނިގަނޑަށް ގެނައި މި ބަދަލުތަކުގެ ސަބަބުން އެމްއެމްއޭ އިން ކުރަމުންދާ މަސައްކަތްތައް މިހާރަށްވުރެ ހަރުދަނާވެ އަދި ހެޔޮ ނަތީޖާތަކެއް ނެރުމަށް ފަސޭހަވާނެ އެވެ.

އެމްއެމްއޭގެ އޮނިގަނޑަށް މިގެނެވުނު ބަދަލުތަކުގެ ތެރޭގައި އެސިސްޓެންޓް ގަވަރުނަރުގެ މަގާމު ވަނީ، މެނޭޖިން ޑިރެކްޓަރ މަގާމަށް ބަދަލުކޮށްފައެވެ. އަދި މިހާރު ތިއްބެވި އެސިސްޓެންޓް ގަވަރުނަރުން ވަނީ އެޑްވައިޒަރުންގެ މަގާމަށް ޕްރޮމޯޓްކޮށްފައެވެ.

Advertisement

މި ބަދަލާއެކު އެމްއެމްއޭގެ މަސައްކަތްކުރާ ތައުލީމީ އަދި ތަޖުރިބާކާރު ފަރާތްތަކަށް ފުރުސަތު ފުޅާކުރުމުގެ ގޮތުން އަލަށް ހުޅުވާލާ މެނޭޖިން ޑިރެކްޓަރ މަގާމަކީ، ފަސް އަހަރުގެ ދެ ދައުރަކަށް ހޮވޭ މަގާމަށް ވަނީ ބަދަލުކޮށްފައެވެ. މި މާގާމުތަކަށް ކުރިމަތިލުމުގެ ފުރުސަތު އެމްއެމްއޭގައި މަސައްކަތް ކުރައްވާ ފަރާތްތަކުގެ އިތުރުން އާންމުކޮށްވެސް ހުޅުވާލުމަށް ވަނީ ހަމަޖެހިފައެވެ.

މީގެ ސަބަބުން އެމްއެމްއޭގައި މިހާރު ތިބި ގާބިލު ފަރާތްތަކަށް އާ ފުރުސަތުތައް ހުޅުވިގެންދާނެއެވެ. އަދި ފަންނީ ގާބިލު މީހުންނަށް އެމްއެމްއޭ އަށް ވަނުމަށް ވެސް ފުރުސަތު ހުޅުވިގެންދާނެއެވެ. މި ބަދަލުތައް ގެންނަން ނިންމާފައި ވަނީ އެމްއެމްއޭގެ ބޯޑުގެ މަޝްވަރާގެ މަތިން ގަވަރުނަރެވެ.

މަރުކަޒީ ބޭންކުގެ ގަވަރުނަރުކަމުގެ މަޤާމާ އަލަށް ހަވާލުވި، އަހުމަދު މުނަްވަރު ވަނީ އެތަނުގެ ހިންގުން ޒަމާނީ ކުރުމަށް ބަދަލުތަކެއް ގެންނަވާނޭކަމަށް ވިދާޅުވެފައެވެ. ރާއްޖޭގެ މާލީ ދާއިރާއަކީ މި ސަރަހައްދުގެ އެއްވަނައަށް ހެދުމަކީ އައު ގަވަރުނަރުގެ އަމާޒެކެވެ.