ފުޅާދާއިރާއެއްގައި ކާބޯތަކެތި ޑެލިވެރީ ކުރުމުގެ ޚިދުމަތް ދެމުންދިއަ ކަމަށް ތަނެސް ބަލައިފާސްކޮށް 4 ބިދޭސީން ހައްޔަރު ކޮށްފިއެވެ.
އިމިގްރޭޝަނުން އެކސްގައި ކުރި ޕޯސްޓެއްގައި ބުނީ، "އިމިގްރޭޝަން ވޮޗް" އަށް ރިޕޯޓު ކޮށްފައިވާ ތަނެއް އިއްޔެގެ ވަގުތެއްގައި ބަލައި ފާސްކޮށް 4 މީހެއް އިމިގްރޭޝަންގެ ބެލުމުގެ ދަށަށް ގެނެސްފައިވާކަމަށެވެ.
މިއާއެކު އިމިގްރޭޝަނުން ވަނީ ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ރައްޔިތުން ދެއްވާ އެއްބާރުލުމަށް ޝުކުރު ދަންނަވާފައެވެ. އަދިވެސް މިފަދަ މައްސަލަތައް "އިމިގްރޭޝަން ވޮޗް" މެދުވެރިކޮށް ރިޕޯޓު ކުރައްވަމުން ދިއުމަށްވެސް އެދިފައުވެއެވެ.
އިމިގްރޭޝަނުން އާންމުކޮށްފައިވާ މި އޮޕަރޭޝަންގެ ފޮޓޯތަކުން ފެންނަ ގޮތުގައި ބިދޭސީން ކައްކަމުން ދިޔަ ތަނުގައި އެއްވެސް ވަރެއްގެ ސާފުތާހިރު ކަމެއް ނެތެވެ. ބޮޑެތި ތެލި ތަކުގައި ކައްކައި، ކޮތަޅުތަކަށް ބަތް އަޅައި ފުނި ޖަހާފައިވާ ތަން ވެސް ފޮޓޯތަކުން ފެނެ އެވެ.
ގަވާއިދާ ޚިލާފަށް އުޅޭ ބިދޭސީންގެ މައްސަލައަކީ ރާއްޖޭގައި ދުވަހެއް ދުވަހަކަށް އިތުރުވަމުންދާ މައްސަލައެއްކަމަށް ވުމާއެކު، މި މައްސަލަ ޙައްލުކުރުމަށް ސަރުކާރުން އެކި ފިޔަވަޅުތައް އަޅަމުން ގެންދެއެވެ.
މީގެ ތެރޭގައި ގަވާއިދާ ޚިލާފަށް އުޅޭ ބިދޭސީން ހޯދައި، އެމީހުން އަނބުރާ އެމީހުންގެ ޤައުމުތަކަށް ފޮނުވާލުމުގެ މަސައްކަތްވެސް ހިމެނެއެވެ. އެގޮތުން މިހާތަނަށް 2000 އަށްވުރެ ގިނަ މީހުން ހައްޔަރުކޮށްފައިވާ ކަމަށް އިމިގްރޭޝަނުން މައުލޫމާތުދެއެވެ.
Advertisement
This content is created and paid for by advertisers and does not involve Voice Journalists
