ޗައިނާގެ ބޭންކެއް ރާއްޖޭގައި ގާއިމްކުރުމުގެ މަސައްކަތް ކުރެވެމުންދާކަމަށް އިގުތިސާދީ ކަންކަމާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.

"މޯލްޑިވްސް – ސިޗުއާން ޓްރޭޑު އެންޑު އިންވެސްޓުމަންޓު ކޯރޕަރޭޝަން ކޮންފަރެންސް" ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ސައީދު ވިދާޅުވީ، ޗައިނާއާއެކު މިނިވަން ވިޔަފާރީގެ އެއްބަސްވުމަށް އަންނަ މަހުގެތެރޭ އަމަލުކުރަން ފަށަން ތައްޔާރުވަމުންދާކަމަށެވެ.

މިއާއެކު ވިޔަފާރިވެރިންނަށް ހުރި ފުރުޞަތުތައް ދިވެހި ވިޔަފާރިވެރިންނަށް އެނގެން ޖެހޭކަން ފާހަގަކުރައްވަމުން ވަޒީރު ސައީދު ވިދާޅުވީ، މިކަމާއި ގުޅޭ މައުލޫމާތުތައް ވިޔަފާރިވެރިންނަށް ފޯރުކޮށް ދިނުމަށް ވޯކް ޝޮޕްތައް ހިންގުމަށް ނިންމާފައިވާ ކަމަށެވެ.

Advertisement

މިނިވަން ވިޔަފާރީގެ އެއްބަސްވުމުގެ ތެރެއިން ރާއްޖެއަށް ގިނަ ފައިދާތަކެއް ލިބޭނެ ކަމަށާއި، ޗައިނާގެ މިނިވަން ވިޔަފާރީގެ ތެރެއިން ނެގޭނެ އެންމެ ބޮޑު ފައިދާ ރާއްޖެއަށް ނެގޭގޮތަށް ރައީސް ޑރ.މުޢިއްޒު އަމާޒުހިއްޕަވައި، އެކަން ޗައިނާގެ ލީޑާރޝިޕްއާއި ހިއްސާކޮށްފައިވާކަމަށް ވަޒީރު ވިދާޅުވިއެވެ.

މިނިވަން ވިޔަފާރީގެ ފައިދާ ވިޔަފާރިވެރިންނަށް އެންމެ ބޮޑަށް ލިބޭނެ މަގުތައް ހޯދުމަށް ސަރުކާރުން މަސައްކަތްކުރަމުންދާކަން ފާހަގަކުރައްވައި، ވަޒީރު ވިދާޅުވީ، ޗައިނާގެ ބޭންކެއް ރާއްޖޭގައި ހުޅުވުމަށް ރައީސް ޑރ.މުޢިއްޒު ބޭނުންފުޅުވާކަމަށާއި، އެކަމާއި ގުޅޭ މަސައްކަތްތައް ކުރަމުންދާކަމަށެވެ.

ޗައިނާއިން ގެންނަ މުދަލަށް ދިވެހި ރުފިޔާ ބޭނުންކޮށްގެން މުއާމަލާތު ކުރެވޭނެގޮތް ހެދުމަށް ސަރުކާރުން ކުރަމުންދާ މަސައްކަތްތަކާއެކު ޑޮލަރަށް ބަރޯސާވުން ކުޑަކުރެވިގެންދާނެ ކަމަށާއި، ހަމައެކަނި ސިޗުއާން ޕްރޮވިންސްއިންވެސް 19 މިލިޔަން ރުފިޔާގެ ވިޔަފާރީގެ ފުރުޞަތުތައް އެބަހުރި ކަމަށް ވަޒީރު ސައީދު ވިދާޅުވިއެވެ.