ރަސްފަންނުގައި މޫދަށް އެރި އުޅުނު ބައެއްގެ އަތް ދަބަހެއް ވަގަށް ނެގި ބަޔަކު ހައްޔަރުކޮށް، ދަބަސް ވެރިފަރާތާ ހަވާލު ކޮށްފިއެވެ.  

ފުލުހުން ބުނީ، ރަސްފަންނަށް މޫދަށް އެރި އުޅުނު ބަޔަކު އަތްދަބަސް ގަސްތަކެއްގެ ކައިރީގައި ބާއްވާފައި އޮއްވާ އެ ދަބަސް ވަގަށް ނެގި މައްސަލަ މާފަންނުގައި ޕެޓްރޯލް ކުރަމުންދިޔަ ފުލުހުންގެ ސަމާލުކަމަށް މިއަދު ހެނދުނު 10:50ހާއިރު އައިސްފައިވާ ކަމަށެވެ. އަދި، ދަބަސް ވަގަށް ނެގި މީހުން ހޯދުމަށް ސީސީޓީވީ ފުޓެޖު ބަލައިގެން އެމީހުން ދެނެގަތް ކަމަށެވެ.

މިއާއެކު ފުލުހުން ބުނީ، އެ މީހުން ހޯދުމަށް ކުރި މަސައްކަތް މަޖީދީ މަގު، ދިލްބަހާރު މަގު ގުޅޭ ހިސާބުން 11:50 އެހާކަންހާއިރު އެމީހުން ހައްޔަރުކޮށް ރަސްފަންނުން އެމީހުން ވަގަށް ނެގި އަތް ދަބަސް ހޯދާފައިވާ ކަމަށެވެ.

އަދި އެ އަތްދަބަހުގައި އޮތް ދެ ފޯނާއި އެހެނިހެން ތަކެތިވެސް ހޯދައި ވެރިފަރާތާ ހަވާލުކޮށްފައިވާ ކަމަށް ފުލުހުން ބުންޏެވެ.

އެ މައްސަލައާ ގުޅިގެން ހައްޔަރުކުރީ ތ. ތިމަރަފުށީ، ލަކީ ހައުސް، ސޮފްވާން އަލީ އާއި ގއ. ވިލިނގިލި، ޒިއުރިކް ވިލާ، ހަސަން ތައުފީގެވެ.