ކ. ހިންމަފުށީގައި އިއްޔެ ބޭއްވުނު "އުރީދޫ މަސް ރޭސް 2024" ގެ ޗެމްޕިއަންކަން ސިފްކޯ ޓީމުން ހޯދައިފިއެވެ. މިއީ އުރީދޫއިން ކޮންމެ އަހަރަކު ބާއްވަމުން އަންނަ މުބާރާތެކެވެ.

އުރީދޫގެ 19 ވަނަ އަހަރީ ދުވަސް ފާހަގަކުރުމުގެ ގޮތުން މި އަހަރުގެ މަސް ރޭސް ޖުމްލަ ތިން ރަށެއްގައި ކުރިއަށްގެންދިއުމަށް ވަނީ ނިންމާފައެވެ. އެއީ، ހިންމަފުށީގެ އިތުރުން ޅ. ނައިފަރު އަދި ގދ. ތިނަދޫގައެވެ. މި ތިން ރަށުގައި ބާއްވާ މަސް ރޭހުން ވެސް އެއްވަނަ ޓީމަކަށް 25،000 ރުފިޔާގެ އިނާމެއް ދިނުމަށް އުރީދޫން ވަނީ ނިންމާފައެވެ.

ހިންމަފުށީގައި ބޭއްވުނު މަސް ރޭހުގައި 21 އަށްވުރެ ގިނަ ޓީމުން ބައިވެރިވިއެވެ. ވާދަވެރި މަސްވެރިކަމަކަށް ފަހު، ޗެމްޕިއަން ޓީމަށާއި އެހެނިހެން ވަނަތައް ހޯދި ޓީމުތަކަށާއި މަސްވެރިންނަށް ޚާއްސަ ގިނަ އެވޯޑުތަކެއް ދީފައިވާ ކަމަށް އުރީދޫއިން ބުނެފައިވެއެވެ.

Advertisement

މުބާރާތުގެ ޗެމްޕިއަން ޓީމަކީ 999.35 ޕޮއިންޓާ އެކު ސިފްކޯ ޓީމެވެ. ދެވަނައަށް 807.85 ޕޮއިންޓާ އެކު ގޯޅިއަންސް ސްޕޯޓްސް ކްލަބް އަދި ތިންވަނައަށް 608.1 ޕޮއިންޓާ އެކު ޑިޓިއުން ފިޝިން ހޮވުނެވެ. އެންމެ ބަރު މަހުގެ އިނާމު މާސްޓާ ކްލާސްގެ ހަސަން ނައީމަށް 37.7 ކިލޯގެ ފާނައަކާ އެކު ލިބުނެވެ.

އެންމެ މޮޅު ފިރިހެން ކެޔޮޅަކަށް ހޮވުނީ 25 މަހާ އެކު ގޯޅިއަންސް ސްޕޯޓްސް ކްލަބުގެ ހަސަން އައްޒާމެވެ. އެންމެ މޮޅު އަންހެން ކެޔޮޅަކަށް ހޮވުނީ 17 މަހާ އެކު ޑިޓިއުން ފިޝިންގެ ފާތިމަތު ފެޒްލީނެވެ.

ޗެމްޕިއަން ޓީމަށް ލިބުނު 25،000 ރުފިޔާގެ އިތުރުން ދެވަނަ ޓީމަށް 10،000 ރުފިޔާ އަދި ތިންވަނަ ޓީމަށް 5,000 ރުފިޔާ ލިބުނެވެ.

އުރީދޫގެ މި އަހަރުގެ މަސް ރޭސް ހިންމަފުށީގައި މިއަދު ފަށާފައިވާއިރު ތިނަދޫ ސިޓީގައި މަސް ރޭސް އޮންނާނީ އަންނަ ހުކުރު ދުވަހެވެ. އަދި، ނައިފަރުގައި ފަށާނީ މި މަހުގެ 23 ވަނަ ދުވަހެވެ.