ރާއްޖޭގެ ބޮޑުބަޔަކަށް މިއަދުވެސް މޫސުން ގޯސްވާނޭކަމަށް މޫސުމާ ބެހޭ ޤައުމީ އިދާރާއިން ލަފާކޮށްފިއެވެ.

މޫސުމާ ބެހޭ ޤައުމީ އިދާރާއިން ވަނީ  މިއަދު ހެނދުނު 09:00 އާ ހަމަޔަށް މޫސުން ގޯސްވާނެ ކަމަށް ލަފާކޮށް ޔެލޯ އެލާޓްވެސް ނެރެފައެވެ. މެޓް އޮފީހުން ނެރެފައިވާ އެލާޓްގައިވާގޮތުން ލަފާކޮށްފައިވާ ވަގުތާ ހަމަޔަށް ރާއްޖޭގެ އެންމެ އުތުރުން ފެށިގެން ގދ އަތޮޅާ ހަމަޔަށް ކަނޑުތައް ގަދަވެފައި ގުގުރުމާއެކު ވިއްސާރަ ކުރާނެއެވެ. އަދި ވިލާގަނޑުގައި ގަޑިއަކު 45 މޭލަށް ވައި ގަދަވާނެއެވެ.

ހިނގަމުން މިދަނީ ހުޅަނގު މޫސުމުގެ 10 ވަނަ ނަކަތް ކަމަށްވާ "މާ" ނަކަތެވެ. މާ ނަކަތުގައި އާއްމުގޮތެއްގައި ކަނޑުތައް މަޑުވެފައި ވައި މަޑުވި ނަމަވެސް، މި ނަކަތާ ބެހޭގޮތުން އިހުގެ ދިވެހިން ބުނެއުޅޭގޮތް ތަފާތެވެ. އިހުގެ ދިވެހިން "މާ" ނަކަތާ ގުޅޭގޮތުން ބުނެފައިވަނީ، އަހުލިހައިގައި ވިއްސާރަ ވެއްޖެ ނަމަ މާ ނަކަތުގައި ވެސް ވިއްސާރަވާނެ ކަމަށެވެ.

ދިވެހިބަހުގައި މާ ބޭނުންކުރަނީ "ބޮޑު" މި މާނައިގައެވެ. މާނައަކީ ވިއްސާރަވެއްޖެ ނަމަ ވަރަށް ވިއްސާރަ ވާނެއެވެ. ކަނޑު ގަދަވެއްޖެނަމަ ވަރަށް ގަދަވާނެއެވެ. މިއީ މާ ނަކަތާ ބެހޭގޮތުން އިހުގެ ދިވެހިންވެސް ދެކޭ ގޮތެވެ.

"މާ"ނަކަތް އޮގަސްޓްމަހުގެ 23 ވަނަ ދުވަހުގެ ނިޔަލަށް ދެމިގެންދާއިރު، މި ނަކަތުގައި ވިއްސާރަ ނޫންނަމަ، މަސްވެރިކަންވެސް ރަނގަޅުވާނެއެވެ.