މިއަދު މާލެއަށްކުރި ގަދަ ވިއްސާރައިގައި މަގުތަކުގައި ފެންބޮޑުވެ ގޭގެއަށާއި ފިހާރަތަކަށް ފެންވަންނާތީވެ، ވެލިބަސްތާ ޖެހުމުގެ މަސައްކަތް ކުރިއަށްދިޔައިރު، އެ މަސައްކަތުގައި ހެންވޭރު ހުޅަނގު ދާއިރާގެ މެމްބަރު އަލީ އިބްރާހީމް (ކައްޕި) އަމަލީގޮތުން ބައިވެރިވެ ވަޑައިގަންނަވައިފިއެވެ.

މިހާރު ކުރަމުންދާ މޫސުމީ ވިއްސާރާގައި އެންމެބޮޑަށް ވިއްސާރަކުރި އެއް ރަށަކީ މާލެއެވެ. ހެނދުނުން ފެށިގެން މާލެއަށް ބޯކޮށް ވާރޭވެހުމާއި ގުޅިގެން މެންދުރާ ހިސާބަށް ދިޔައިރު، މަގުތަކުގައި ފެންބޮޑުވެ، ގޭގެއަށާއި ފިހާރަތަކަށް ފެންގަނޑު ދިޔައީ ވަންނަމުންނެވެ. ގޭގެއަށާއި ފިހާރަތަކަށް ފެންގަނޑު ވަންނަމުންދާތީވެ ކަމާއި ބެހޭ ފަރާތްތަކާއި އާއްމުންވެގެން ދިޔައީ ފިހާރަތަކަށާއި ގޭގެއަށް ފެންގަނޑުވަނަ ނުދިނުމަށް ވެލިބަސްތާތައް ޖަހަމުންނެވެ.

ހެންވޭރު ހުޅަނގު ދާއިރާގެ މެމްބަރު އަލީ އިބްރާހީމް (ކައްޕި) ވެސް ވަނީ ދާއިރާއަށް ވަޑައިގެން ވެލިބަސްތާތައް ޖެހުމުގައި އަމަލީގޮތުން ބައިވެރިވެ ވަޑައިގަންނަވާފައެވެ. މީގެ އިތުރުން މެމްބަރު ކައްޕި ވަނީ ވިއްސާރަވުމާ ގުޅިގެން ފެނުގެ އަސަރުކުރި ތަންތަނަށް ވަޑައިގެން އެ ތަންތަނުގެ ހާލަތާއި މީހުންގެ ހާލަތު ބައްލަވާލައްވާފައެވެ. 

Advertisement

ހެންވޭރު ހުޅަނގު ދާއިރާގެ މެމްބަރު އަލީ އިބްރާހީމް (ކައްޕި) ވެލިބަސްތާ ޖެހުމުގައި ހަރަކާތްތެރިވަނީ...

މިއަދު މާލެއަށް ކުރި ވިއްސާރާގައި މަގުތަކުގައި ވަރަށްބޮޑަށް ފެންބޮޑުވިއިރު، މިރެއާ ހަމަޔަށް ތިން މިލިއަނަށްވުރެ ގިނަ ލީޓަރުގެ ފެން މަގުތަކުން ހިންދާފައިވާކަމަށް އެމްއެންޑީއެފުން ބުނެއެވެ.

މާލެއަށް ކުރި ވިއްސާރާގައި ބައެއް ގެތަކަށާއި ފިހާރަތަކަށް އެކިވަރުގެ ގެއްލުންތައް ލިބުނުއިރު، ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ މާދަމާއަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސަވާފައެވެ.