ރާއްޖޭގައި މަސައްކަތްކުރާ ބިދޭސީ މަސައްކަތްތެރިންގެ ފަރާތުން ދައުލަތަށް ދައްކަންޖެހޭ ފީގެ ނުލިބިވާ ފައިސާގެ ތެރެއިން މިހާތަނަށް 182 މިލިއަނަށްވުރެ ގިނަ ރުފިޔާ ހޯދާފައިވާކަމަށް ދާހިލީ ސަލާމަތާއި ފަންނިއްޔަތާ ބެހޭ ވުޒާރާއިމް ހާމަކޮށްފިއެވެ.

ދާހިލީ ވުޒާރާއިން ބުނީ، އެކްސްޕެޓް ޚިދުމަތް ހޯދާ ވަޒީފާދޭ ފަރާތްތަކުން ދައުލަތަށް ދައްކަންޖެހޭ ފައިސާގެ ތެރެއިން، ފައިސާ ނުދައްކައިގެން ނަން ހާމަކުރި ފަރާތްތަކުން މިހާތަނަށް 182.9 މިލިއަން ރުފިޔާ ހޯދާފައިވާކަމަށެވެ. ދައުލަތަށް ލިބެންޖެހޭ ފައިސާ ހޯދުމަށް ރައީސް ޑރ.މުހައްމަދު މުއިއްޒު އަންގަވާފައިވާ އެންގުމާ އެއްގޮތަށް ކުރެވެމުންދާ މަސައްކަތުގެ ތެރެއިން ދާހިލީ ވުޒާރާއިން ވަނީ ހާއްސަ މަސައްކަތްތަކެއް ފަށާފައެވެ. 

ބިދޭސީ މަސައްކަތްތެރިންގެ ފަރާތުން ވޯކްޕާމިޓް ފީއާއި ކޯޓާ ފީގެ އިތުރުން ޖޫރިމަނާގެ ގޮތުގައި 100،000 ރުފިޔާއަށް ވުރެ މަތިން ދައުލަތަށް ދައްކަންޖެހޭ ފަރާތްތަކުގެ ނަންތައް ސަރުކާރުން އާއްމުކޮށްފައިވަނީ މިދިޔަ ޖުލައިމަހުގެ 24 ވަނަ ދުވަހުއެވެ. އެ ލިސްޓްގައި ގިނަ އަދަދެއްގެ ކުންފުނިތައް ހިމެނޭއިރު، ގިނަ ކުންފުނިތަކުން ދައްކަންޖެހޭ އަދަދު އުޅެނީ މިލިއަނަކަށްވުރެ މަތީގައެވެ. މި ކުންފުނިތަކަށް ފައިސާ ދެއްކުމުގެ މުހުލަތު ދީފައިވަނީ މިމަހުގެ 12 ވަނަ ދުވަހުގެ ނިޔަލަށެވެ.

Advertisement

ހޯމްލޭންޑް މިނިސްޓްރީން އާއްމުކުރި މި ލިސްޓްގައި 1026 ކުންފުނި ހިމެނޭއިރު، މި ކުންފުނިތަކުން 636 މިލިއަނަށްވުރެ ގިނަ ރުފިޔާ ހިމެނެއެވެ. މިނިސްޓްރީން އާއްމުކުރި ހިސާބުތަކަށް ބަލާއިރު، ބިދޭސީ މަސައްކަތްތެރިންގެ ފީން ދައުލަތަށް އަދިވެސް ބޮޑު އަދަދެއް ލިބެން ޖެހެއެވެ. މިގޮތުން މިހާތަނަށް ނުލިބިވާ އަދަދު އުޅެނީ 450 މިލިއަން ރުފިޔާ އަށްވުރެ މަތީގައެވެ.