ރާއްޖެއަށް މިހާރު ކުރަމުންދާ މޫސުމީ ވިއްސާރައިގައި ގެއްލުންތައް ލިބިގެން މިހާތަނަށް 20 ރަށަކުން ރިޕޯޓްކޮށްފައިވާކަމަށް ޑިޒާސްޓަރ މެނޭޖްމަންޓް އޮތޯރިޓީން ހާމަކޮށްފިއެވެ.

އިއްޔެ މުޅި ރާއްޖެއަށް ކުރި ވިއްސާރާގައި ބައެއް ރަށްރަށުގައި ފެންބޮޑުވުމުގެ ސަބަބުން އާއްމު ދިރިއުޅުމުގެ ކަންކަން ވަނީ ހުއްޓުމަކަށް އައިސްފައެވެ. މި ކުރި ވިއްސާރައާ ގުޅޭގޮތުން ޑިޒާސްޓަރ މެނޭޖްމަންޓުން ބުނެފައިވަނީ އިއްޔެ ކުރި ވިއްސާރައިގައި ފެންބޮޑުވެ، ގެއްލުންތައް ލިބުމާ ގުޅިގެން ވިހި ރަށަކުން އެ އޮތޯރިޓީއަށް ރިޕޯޓްކޮށްފައިވާކަމަށެވެ.

ޑިޒާސްޓަރ މެނޭޖްމަންޓް އޮތޯރިޓީން އާއްމުކުރި ތަފާސްހިސާބަށް ބަލާއިރު، ވިއްސާރައިގައި ބޮޑަށް ގެއްލުން ލިބިގެން ރިޕޯޓްކޮށްފައިވަނީ އުތުރުގެ ރަށްތަކުންނެވެ.

ގެއްލުންތައް ލިބިގެން ރިޕޯޓްކުރި ރަށްތައް:

ހއ އަތޮޅުން:

އިހަވަންދޫ، ހޯރަފުށި، ބާރަށް، އުލިގަމް، މާރަންދޫ، ތަކަންދޫ، މުރައިދޫ، ކެލާ، އުތީމް، މޮޅަދޫ، ވަށަފަރު، ފިއްލަދޫ، 

ހދ އަތޮޅުން:

ނޮޅިވަރަންފަރު، ހަނިމާދޫ، ނެއްލައިދޫ

މާލެ އަތޮޅުން:

ހުރާ، މާލެ ސިޓީ

އައްޑޫސިޓީ:

ހިތަދޫ، މީދޫ އަދި ފޭދޫ

ޑިޒާސްޓަރ މެނޭޖްމަންޓް އޮތޯރިޓީން ބުނީ އިއްޔެ ކުރި ވިއްސާރާގައި ފެންބޮޑުވުމުގެ ސަބަބުން 12 އާއިލާއެއް ދިރިއުޅެމުން އައިތަން ނޫން އެހެން ތަންތަނަށް ބަދަލުކުރެވުނު ކަމަށެވެ.

އޭގެ ތެރޭގައި ހިމެނެނީ:

ހއ ބާރަށް: 2 އާއިލާ

ހއ ހޯރަފުށި: 6 އާއިލާ

ހއ ކެލާ: 2 އާއިލާއެއް

ހއ އިހަވަންދޫ: 2 އާއިލާ

އިއްޔެކުރި ވިއްސާރާގައި މާލެސިޓީގައި ފެންބޮޑުވެ، ބައެއް ގެތަކަށާއި ފިހާރަތަކަށް ފެންވަދެ އެކިވަރުގެ ގެއްލުންތައް ވަނީ ލިބިފައެވެ. އެމްއެންޑީއެފުން ބުނީ، އެންމެ ފަހުން މާލެއަށްކުރި ވިއްސާރައާ ގުޅިގެން އެހީތެރިކަން ފޯރުކޮށްދިނުމުގައި އެމްއެންޑީއެފް މާލޭ އޭރިއާ ކޮމާންޑާއި އެކިއެކި މުއައްސަސާތައް ގުޅިގެން ކުރިއަށްގެންދާ އޮޕަރޭޝަންގައި 208 އަށްވުރެ ގިނަ ގެތަކަށް އެހީތެރިކަން ފޯރުކޮށްދެވުނު ކަމަށެވެ.

އިއްޔެކުރި ވިއްސާރާގައި އެންމެގިނައިން ވާރޭ ވެހުނީ މާލެސިޓީއަށެވެ. ރެއާ ހަމަޔަށް މާލެ ސިޓީގެ މަގުތަކުން 13 މިލިއަނަށްވުރެ ގިނަ ލީޓަރުގެ ފެން ހިންދާފައިވާއިރު، 10 ސަރަހައްދަކުން ވަނީ ފެން ހިންދުމުގެ މަސައްކަތް ކުރިއަށްގެންގޮސްފައެވެ.