ޗައިނާގެ ކުންފުނިތަކުން މީގެ އެތަކެއް އަހަރު ކުރިއްސުރެ ނުދައްކާހުރި ޓެކްސް ފައިސާ ހޯދުމަށް އެގައުމު ސަރުކާރުން ކުންފުނިތަކަށް ބިލްކުރަން ފަށައިފިއެވެ.

ޗައިނާގެ ކޮމިއުނިސްޓް ޕާޓީއިން ދާދިފަހުން ގެންނަން ނިންމާފައިވާ އިގްތިސާދީ އިސްލާހީ ފިޔަވަޅުތައް ތަންފީޒުކުރުމުގެ މަސައްކަތް އެގައުމުން މިހާރު ވަނީ ފަށާފައެވެ.

އެގޮތުން އެގައުމުގެ ޓެކްސް ނެގުމުގެ ނިޒާމު ހަރުދަނާކޮށް، އާމްދަނީ އާއި ދަރަނި މެނޭޖްކުރުން އިތުރަށް ހަރުދަނާކުރުމަށް ގިނަ ފިޔަވަޅުތަކެއް އެޅުމަށް ވަނީ ނިންމާފައެވެ.

ޗައިނާގެ އެތެރޭގެ ދަރަންޏަކީ އެގައުމުގެ އިގްތިސާދަށް މިވަގުތު އޮތް އެންމެ ބޮޑު އެއް ނުރައްކަލެވެ. އެގޮތުން ޗައިނާގެ ލާމަރުކަޒީ ސަރަހައްދީ ސަރުކާރުތަކުގެ ދަރަނި އެކަނިވެސް 11 ޓްރިލިއަން އެމެރިކާ ޑޮލަރަށް އަރާއިރު، ޓެކްސް އާމްދަނީއިން ސަރަހައްދީ ސަރުކާރުތަކަށް ލިބެނީ ކުޑަ މިންވަރެކެވެ.

ބޮޑުބައެއް ދަނީ މައި ސަރުކާރަށެވެ. އަނެއްކޮޅުން މުވައްޒަފުންގެ މުސާރައާއި، އިޖްތިމާއީ ހިދުމަތްތަކާއި، މަގުތަކާއި ސްކޫލްތައް އިމާރާތްކޮށް ބެލެހެއްޓުންފަދަ ހަރަދުތައް ކުރަން ޖެހެނީ ސަރަހައްދީ ސަރުކާރުތަކަށެވެ.

ރައީސް ޝީ ޖިންގްޕިން ކުރިން އެޅުއްވި ބައެއް އިގްތިސާދީ ފިޔަވަޅުތަކާއެކު އަމިއްލަ ފަރުދުން އަތުން ނަގާ ޓެކްސްއާއި، ވިޔަފާރީގެ ފައިދާއިން ނަގާ ޓެކްސް ކުޑަކުރުމުގެ ސަބަބުން އާމްދަނީއަށް އޭގެ އަސަރުކޮށްފައިވަނިކޮށް، ކޮވިޑްގައި ދިމާވި ކަންކަމުގެ ސަބަބުން އިގްތިސާދަށް އޭގެ ނޭދެވޭ އަސަރުވަނީ ކޮށްފައެވެ.

މިހާރު ކޮމިއުނިސްޓް ޕާޓީއިން އަޅާ ފިޔަވަޅުތަކަކީ މިކަންކަމަށް ރިއާޔަތްކޮށް ގެންނަ ބަދަލުތަކެކެވެ. ޗައިނާ ސަރުކާރުން ދެކޭ ގޮތުގައި މި ބަދަލުތަކާއެކު ޓެކްސް އާމްދަނީއިން ސަރަހައްދީ ސަރުކާރުތަކަށް ލިބޭ މިންވަރު އިތުރުވެ، ފައިސާ މެނޭޖްކުރުމަށް ފަސޭހަތައް ލިބިގެންދާނެއެވެ.

ޓެކްސް ނުދައްކާ ކުންފުނިތަކުގެ ފަހަތުން ޗައިނާ ސަރުކާރުން ދިޔުމަކީވެސް މި ބަދަލުތަކުގެ ތެރެއިން އަންނަ ކަމެކެވެ.

ޗައިނާގެ ކާބޯތަކެތި އުފައްދާ ކުންފުންޏެއްކަމަށްވާ ވީވީ ފުޑް އެންޑް ބެވަރޭޖް އިން ބުނީ މިދިޔަ ޖޫން މަހު، މީގެ 30 އަހަރުން ކުރިން ދައްކަން ޖެހިފައިވާ 12 މިލިއަން އެމެރިކާ ޑޮލަރުގެ ޓެކްސް ބިލެއް އައިސްފައިވާކަމަށެވެ. އަދި މައިނިން ކުންފުންޏަކުން ވަނީ ޖުމްލަ 92 މިލިއަން ޑޮލަރު އަރާ 2 ބިލެއް އައިސްފައިވާކަމަށާއި، މިއީ 20 އަހަރުވެފައިވާ ޓެކްސް އެއް ހޯދުމަށް އައިސްފައިވާ ބިލެއްކަމަށެވެ.