ސަރުކާރުގެ ފަރާތުން ފަތުވެރިކަމާބެހޭ ގާނޫނަށް ހުށަހެޅި އިސްލާހު މުޅި މަޖިލީހުގެ ކޮމިޓީން ފާސްކޮށްފިއެވެ. 

ސަރުކާރުގެ ފަރާތުން ފަތުރުވެރުކަމާބެހޭ ގާނޫނަށް އިސްލާހު ހުށަހެޅުއްވީ ދަނގެތި ދާއިރާގެ މެންބަރު އަބްދުالله ރަޝީދެވެ. 

މަޖިލީހުގެ މިއަދުގެ ޖަލްސާގައި މި ބިލްގެ ބަހުސް ކުރިއަށް ގެންގޮސް ބިލް މަޖިލީހަށް ބަލައިގަތުމަށް ފާސްވުމުން، މުޅި މަޖިލީހުގެ ކޮމިޓީއަށް ގޮސް، މުޅިމަޖިލީހުގެ ކޮމިޓީން ވަނީ ބިލް ދިރާސާކޮށްފައެވެ.

އެގޮތުން، މަޖިލީހުގެ ކޮމިޓީގައި ފުނަދޫ ދާއިރާގެ މެންބަރު މުހައްމަދު މަމްދޫހު ވިދާޅުވީ ވަނީ އެ ބިލަށް މަޖިލީހުގައި ފުޅާ ދާއިރާއެއްގައި ބަހުސްކުރެވިފައިވާ ކަމަށާއި، ބަހުސްގެ ތެރެއިން މެންބަރުން ހުށަހެޅުއްވި އިސްލާހުތަކަށް ހުރިހާ މެންބަރުންވެސް އިއްތިފާގުވެވަޑައިގަންނަވާ ކަމަށެވެ.

ވުމާއެކު އިތުރު ބަހުސަކަށް ނުގޮސް އިސްލާހުތައް ކޮމިޓީން ފާސްކުރުމަށް އޭނާ ހުށަހަޅުއްވާފައިވާއިރު އެ ހުށަހެޅުމަށް ބާރަށު ދާއިރާގެ މެންބަރު އިބްރާހީމް ޝުޖާއު ވަނީ ތާއީދު ކުރައްވާފައެވެ.

އެހެންކަމުން، ބިލަށް ވޯޓަށް އަހާފައިވާއިރު މުޅި މަޖިލީހުގެ ކޮމިޓީގެ 76 މެންބަރުންގެ އިއްތިފާގުން ބިލް ވަނީ ފާސްކޮށްފައެވެ. 

ޓޫރިޒަމާ ބެހޭ ގާނޫނުގައި މިހާރު ވާ ގޮތުން ރިސޯޓު ނުވަތަ އިންޓަގްރޭޓަޑް ރިސޯޓު ހަދަން ރަށް ނުވަތަ ބިން ކުއްޔަށް ދޫކޮށްފައިވާ ފަރާތުގެ ވަކި ޝަރުތުތަކެއް ފުރިހަމަވާ ނަމަ އެ ތަނެއް ކުއްޔަށް ދީފައިވާ މުއްދަތު އިތުރު 49 އަހަރަށް އިތުރުކޮށްދެވެ އެވެ.

މި ގޮތަށް ބަދަލު ގެނެވޭނީ ރަށް ނުވަތަ ބިން ކުއްޔަށް ހިފާފައިވާ ފަރާތުން ސަރުކާރަށް ދައްކަން ޖެހޭ އެއްވެސް ކުއްޔެއް ނުވަތަ ޖޫރިމަނާއެއް ނުވަތަ ޓެކުހެއް ނުވަތަ ފީއެއްވާނަމަ އެ ފައިސާ އެއް ދައްކާ ހަލާސް ކުރީމަ އެވެ.  

މީގެ އިތުރުން އެ ގާނޫނަށް ގެނައި 10 ވަނަ އިސްލާހަށް އަމަލުކުރަން ފެށި ތާރީހު ކަމަށްވާ 27 ޑިސެމްބަރު 2022 އިން ފެށިގެން ފުރަތަމަ ދެ އަހަރުގެ ތެރޭގައި މުއްދަތު އިތުރުކުރުމުގެ ފީއެއްގެ ގޮތުގައި ފަސް މިލިއަން ޑޮލަރު އެކީ އެއް ފަހަރާ ދެއްކުން ލާޒިމްކޮށްފައިވެ އެވެ. އެ މުއްދަތަށް ފަހު 99 އަހަރަށް މުއްދަތު އިތުރުކުރަން ހުށަހަޅާއިރު ފީއެއްގެ ގޮތުގައި 10 މިލިއަން ޑޮލަރު ދައްކަން ޖެހޭނެ ކަމަށް ބުނެފައިވެ އެވެ. 

މިއަށް، ހުށަހަޅާފައުވާ އިސްލާހުގައި، ފަތުރުވެރިކަމަށް ދޫކުރާ ރަށެއް ނުވަތަ ބިމެއް ދޫކޮށްފައުވާ މުއްދަތު އިތުރު ކުރުމަށް ، އެރަށެއް ނުވަތަ އެ ބިމެއް ހިފާފައިވާ ފަރާތުން އެދިއްޖެނަމަ، އެ ތަނެއް ކުއްޔަށް ދޫކުރާ މުއްދަތު 50 އަހަރަށް ވުރެ ގިނަ ނުވާ ގޮތަށް އިތުރު ކުރެވޭނެ ކަމަށް ބުނެފައި ވެއެވެ. 

އަދި އެފަދައިން އިތުރު ކުރުމަށް އެދިއްޖެ ނަމަ، ފީއެއް ނެގުމަށްފަހު އެކަން ކުރެވޭނެ ކަމަށާ، މި އިސްލާހަށް އަމަލު ކުރަން ފަށާ ތާރީހުން ފެށިގެން ހަ މަސްދުވަހުގެ ތެރޭގައި މުއްދަތު އިތުރުކުރުމުގެ ފީއެއްގެ ގޮތުގައި ފަސް މިލިއަން ޑޮލަރު ދައްކަން ޖެހޭނެއެވެ. އަދި އިސްލާހަށް އަމަލުކުރަން ފަށާ ތާރީހުން ފެށިގެން ހަ މަސްދުވަސް ފާއިތުވުމަށް ފަހު މުއްދަތު އިތުރުކުރުމުގެ ފީ ދައްކާނަމަ އެ ފީގެ ގޮތުގައި 10 މިލިއަން ޑޮލަރު އެކީ އެއް ފަހަރާ ދައްކަން ޖެހެ އެވެ.