އައްޑޫގައި އިނގިރޭސިން ތިބިއިރު، އެމީހުން ހަދާފައިވާ ތަންތަން މަރާމާތު ކޮށް ފަތުރުވެރިކަން ޕްރޮމޯޓް ކުރުމަށް މަސައްކަތްކުރާނެ ކަމަށް ފަތުރުވެރިކަމާއި ބެހޭ ވަޒީރު އިބްރާހީމް ފައިސަލް މިއަދު ވިދާޅުވެއްޖެއެވެ.
އައްޑޫސިޓީގައި ފަތުރުވެރިކަން ކުރިއަރުވައި، ފަތުރުވެރިކަމުގެ މަންފާ އައްޑޫސިޓީގެ ރައްޔިތުންނަށް ލިއްބައިދިނުމަކީ އަދުގެ ސަރުކާރުގެ ސިޔާސަތެކެވެ.
މިގޮތުން ކުރެވެމުންދާ މަސައްކަތުގެ ތެރެއިން އައްޑޫ ސިޓީ ބްރޭންޑެއްގެ ގޮތުގައި ތަރައްގީކޮށް ޕްރޮމޯޓު ކުރުމަށް 'ޑެސްޓިނޭޝަން އައްޑޫ 2024' ގެ ނަމުގައި ބޭއްވި ސަމިޓު ފެށުމުގެ ރަސްމިއްޔާތުގައި ވާހަކަ ދައްކަވަމުން ވަޒީރު ފައިސަލް ވިދާޅުވީ، ހެރިޓޭޖް މިނިސްޓްރީއާ ގުޅިގެން އެ ތަންތަން މަރާމާތު ކުރުމުގެ މަސައްކަތް ކުރައްވާނެ ކަމަށެވެ.
"އެއީ އަޅުގަނޑަށް ލިބިފައިވާ މައުލޫމާތުތަކުގައި މީގެ ކުރިން އިނގިރޭސިން މިތާގައި ތިބިއިރު އިނގިރޭސިން އޭރު ހަދާފަ ހުރި ތަންތަން އެބަހުރި. އެ ތަންތަން އަލުން އަޅުގަނޑުމެން ރިނޮވޭޓްކޮށް އިނގިރޭސީންގެ މާކެޓަކަށް އައްޑޫ ހެދުމަށް. އެކަން ކުރެވޭނީ ހެރިޓޭޖް މިނިސްޓްރީގެ ދަށުން ކަމުން އަޅުގަނޑު ވާނީ އެ މިނިސްޓްރީއާއެކު ވެސް ބައްދަލުކޮށްފަ،"
ވަޒީރު ފައިސަލް ވިދާޅުވިއެވެ.
މި އަހަރުގެ ނޮވެމްބަރު މަހު އިނގިރޭސިވިލާތުގައި ބާއްވާ ޓޫރިޒަމް ފެއާގައި ވެސް އިނގިރޭސީންގެ މާކެޓަކަށް އައްޑޫ ހެދުމަށްޓަކައި އައްޑޫ ޕްރޮޕޯޓްކުރުމުގެ މަސައްކަތްކުރުމަށް ހަމަޖެހިފައިވާކަން ހާމަކުރައްވަމުން ވަޒީރު ފައިސަލް ވިދާޅުވީ، އެ ފެއާގައި އައްޑޫ ސިޓީ ކައުންސިލުން ވެސް ބައިވެރިވާން ނިންމާފައިވާ ކަމަށެވެ.
އިނގިރޭސިންގެ ޓޫރިޒަމް މާކެޓަކަށް އައްޑޫސިޓީ ހެދުމަކީ ވަރަށް ޚާއްސަ ކަމެއްކަމަށާއި، އައްޑޫއަކީ އެކަން ކުރަން އެންމެ ރަނގަޅު އެއްތަން ކަމަށް ވަޒީރު ވިދާޅުވިއެވެ.
ދެވަނަ ބޮޑު ހަނގުރާމައިގެ ތެރޭގައި 1941 ވަނަ އަހަރު އިނގިރޭސި ސިފައިން ވަނީ އައްޑޫގައި އެމީހުންގެ މަރުކަޒެއް ޤާއިމްކޮށްފައެވެ. ހަމަ އެއާއެކު ގަމުގެ ވައިގެ ބަނދަރަކީވެސް އެދުވަސްވަރު އިނގިރޭސި ރޯޔަލް ނޭވީގެ ބޭނުމަށް ހެދި ތަނެކެވެ. ގަމުން އިނގިރޭސި ސިފައިން ފޭބީ 1976 ވަނަ އަހަރެވެ.
Advertisement
This content is created and paid for by advertisers and does not involve Voice Journalists
