ލޭނު މަސްވެރިކަން ކުރުމަށް އަދުގެ ސަރުކާރުން ގެންގުޅޭ ސިޔާސަތު ދޫކޮށްލަން ޖެހޭކަމަށް ކުރީގެ ހާރިޖީ ވަޒީރު ޢަބްދުﷲ ޝާހިދު މިއަދު ވިދާޅުވެއްޖެއެވެ.
ލޭނުގެ މަސްވެރިކަން ކުރުމަށް ހުއްދަ ދިނުމަށް ސަރުކާރުން ގެންގުޅޭ ސިޔާސަތާ ގުޅޭގޮތުން އިދިކޮޅު ފަރާތްތަކުން ހިޔާލު ފާޅުކުރަމުންދާ މި ދަނޑިވަޅުގައި ޢަބްދުﷲ ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ، ރާއްޖޭގައި ދެމެހެއްޓެނިވި މަސްވެރިކަމެއް އޮތުމަށް ލޭނުއެޅުމުގެ މަސްވެރިކަން ހިފެހެއްޓިފައި އޮއްވައި، އެކަމަށް ހުއްދަދިނުމުގެ ސިޔާސަތެއް ގެންގުޅޭކަމީ ހައިރާންވާންޖެހޭ ކަމެއް ކަމަށެވެ.
މިކަމަކީ އެމްޑީޕީ ސަރުކާރުންވެސް ހުއްދަނުދީ ހިފަހައްޓާފައިވާ ކަމެއްކަން ފާހަގަކުރައްވަމުން ޝާހިދު ވިދާޅުވީ، ލޭނު އެޅުމުގެ ހުއްދަ ދީފިނަމަ، މިކަމުން މިހާތަނަށް ލިބެމުންއައި މަންފާތައް ގެއްލި މިކަމުގެ ސަބަބުން ފަތުރުވެރިކަމުގެ ސިނާއަތަށްވެސް އެކަމުގެ ނުރަނގަޅު އަސަރުތައް ކުރާނޭ ކަމަށެވެ. އަދި މިއީ ބައިނަލްއަޤްވާމީ ކަމާބެހޭ ފަރާތްތަކުގެވެސް ނުހަނު ކަންބޮޑުވުން ހިމެނޭކަމެއްކަން ޝާހިދުގެ ޕޯސްޓްގައި ފާހަގަކުރިއެވެ.
މިގޮތުން އަބްދުﷲ ޝާހިދު ވަނީ ލޭނުގެ މަސްވެރިކަން ހުއްދަދިނުމަށް ސަރުކާރުން ގެންގުޅެމުން އަންނަ ވިސްނުން އަނބުރާ ގެންދިއުމަށް ގޮވާލާފައެވެ.
އެމްޑީޕީގެ ޗެއާޕާސަން ފައްޔާޒް އިސްމާއީލްވެސް މިއަދުވަނީ ލޭނު މަސްވެރިކަން ކުރުމަށް ސަރުކާރުން ހުއްދަދޭން އުޅޭތީ އެކަމާ ދެކޮޅުކަން ހާމަކުރައްވާފައެވެ. އެމްޑީޕީ ސަރުކާރުން ލޭނުއެޅުމުގެ މަސްވެރިކަމަށް ހުއްދަ ނުދިނީ އެކަމުގެ ސަބަބުން މަސްވެރިކަމަށް ފައިދާތަކެއް ކުރާތީ ކަމަށާއި، ސަރުކާރުގެ މި ސިޔާސަތަކީ މަސްވެރިކަމުގެ ސިނާއަތަށް އޮތް ނުރައްކަލެއްކަމަށް ފައްޔާޒް މިއަދު އެކްސްގައި ކުރެއްވި ޕޯސްޓެއްގައި ވަނީ ސިފަކޮށްފައެވެ.
ސަރުކާރުން ވަނީ ކަނޑައެޅޭ ވަކި އުސޫލުތަކެއްގެ ދަށުން ލޭނުއެޅުމުގެ މަސްވެރިކަމަށް ހުއްދަ ދިނުމަށް ނިންމައި، "ލޭނު މަސްވެރިކަން ކުރުމުގެ ގަވައިދަށް އާއްމުންގެ ހިޔާލު ހުށަހެޅުމަށް ހުޅުވާލާފައެވެ.
ލޭނު މަސްވެރިކަން ކުރުމުގެ ގަވައިދަށް ބަލާއިރު، ލޭނު މަސްވެރިކަން ކުރަންވާނީ ފިޝަރީޒް މިނިސްޓްރީން އެކަމަށް ދޫކުރާ ސައްހަ ލައިސެންސެއް އޮވެގެންނެވެ. މިގޮތުން ލައިސަންސް ދޫކުރެވޭނީ ހަމައެކަނި ލޯބޮޑު ކަންނެއްޔާއި ރީނދޫއުރަހަ ކަންނެލީގެ އިތުރުން ހިބަރު ބޭނުމަށް އެކަނި ކަމަށްވެސް މި ޤަވާއިދުގައި ވަނީ ބަޔާންކޮށްފައެވެ.
ރާއްޖޭގައި ބޮޑުކަންނެލީގެ މަސްވެރިކަން ކުރުމުގައި ލޭނުއެޅުމުގެ ހުއްދަ 2012 ގައި ދީފައި އޮތްނަމަވެސް 2019 ވަނަ އަހަރު ވަނީ ލޭނުއަޅައިގެން މަސްވެރިކަން ކުރުން މަނާކޮށްފައެވެ.
Advertisement
This content is created and paid for by advertisers and does not involve Voice Journalists
