އާރަށާއި، ފުއްގިރި މައްސަލާގައި ކުރީގެ ރައީސް ޔާމީނުގެ މައްޗަށް ކޮށްފައިވާ ދައުވާތަކުގެ މައްސަލަތަކުގެ ޝަރީއަތް މިހަފްތާގައި ބެލުމަށް ކްރިމިނަލް ކޯޓުން ތާވަލްކޮށްފިއެވެ. 

މި މައްސަލަތަކުގެ ތެރެއިން ހައިކޯޓުން ބާތިލްކޮށްފައިވާ ރައީސް ޔާމިންގެ އެއް މައްސަލައަކީ ވ.އާރަށް ކުއްޔަށް ދޫކުރުމުގެ މުއާމަލާތާ ގުޅިގެން އެމަނިކުފާނުގެ މައްޗަށް ކޮށްފައިވާ 11 އަހަރުގެ ޖަލު ހުކުމެވެ. އަނެއް މައްސަލައަކީ ފުއްގިރި ކުއްޔަށް ދޫކުރި މައްސަލާގައި ރިޝްވަތުގެ ގޮތުގައި އެއް މިލިއަން ޑޮލަރުގެ ރިޝްވަތު ހިއްޕަވައި އެ ފައިސާ މަނީ ލޯންޑަރުމުގެ ކުށުގެ ދައުވާއެވެ. 

މީގެ ތެރެއިން ފުއްގިރި މައްސަލާގެ ޝަރީއަތް، ކްރިމިނަލް ކޯޓުގައި ބޭއްވުމަށް ތާވަލްކޮށްފައިވަނީ އަންނަ އަންގާރަދުވަހުއެވެ. އަދި އާރަށުގެ މައްސަލައިގެ ޝަރީއަތް ބޭއްވުމަށް ހަމަޖެހިފައިވަނީ ޖެހިގެން އަންނަ ބުދަދުވަހުއެވެ.

Advertisement

ވ. އާރަށް ކުއްޔަށްދިނުމުގެ މުޢާމަލާތާ ގުޅިގެން ރިޝްވަރު ހިފުމާއި މަނީ ލޯންޑްރިނގްގެ ކުށް ސާބިތުވާ ކަމަށް ކަނޑައަޅައި ކުރީގެ ރައީސް ޢަބްދުالله ޔާމީން ޢަބްދުލްޤައްޔޫމް 11 އަހަރަށް ޖަލަށްލުމާއެކު 5 މިލިއަން ޑޮލަރުން ޖޫރިމަނާކުރުމަށް ކްރިމިނަލް ކޯޓުން ހުކުމް ކޮށްފައިވަނީ 2022 ވަނަ އަހަރުގެ ޑިސެމްބަރުމަހުގެ 25 ވަނަ ދުވަހުއެވެ.

ރައީސް ޔާމީނުގެ ފަރާތްޕުޅުން އެ ޙުކުމް ތަންފީޛްކުރުން ފަސްކުރުމުގެ އަމުރަށް އެދި ހައި ކޯޓަށް މައްސަލަ ހުށަހަޅާފައިވަނީ މިދިޔަ އަހަރުގެ އޮގަސްޓްމަހުގެ 7 ވަނަ ދުވަހުއެވެ. ދަށު ކޯޓުން ކުރި އެ މައްސަލައިގެ ހުކުމް ބާތިލްކުރީ މިއަހަރުގެ އޭޕްރިލްމަހުގެ 18 ވަނަ ދުވަހެވެ.

މި މައްސަލާގައި ހައިކޯޓުން ފާހަގަކުރި ނުކުތާތަކުގެ ތެރޭގައި ބުނެފައިވަނީ، ދަށު ކޯޓުން އެ މައްސަލަ ބަލާފައިވަނީ ޤާނޫނީ އިމުގެ ބޭރުންކަމަށެވެ.