އުސޫލުން ބޭރުން އެޕާޓްމަންޓެއް ނުވަތަ އެނޫންވެސް މުދަލެއް ހޯދިކަން ފާހަގަވާނަމަ ޤާނޫނީ އިމުގެ ތެރޭގައި އެންޓި ކޮރަޕްޝަން ކޮމިޝަން އަށް ހުށަހަޅުއްވައި އެކޮމިޝަނުން މިކަންކަން ބެއްލެވުމަށް މަރުޙަބާކިޔާކަމަށް ކުރީގެ ހާރިޖީ ވަޒީރު ޢަބްދުﷲ ޝާހިދު ވިދާޅުވެއްޖެއެވެ.
ޝާހިދު މިގޮތަށް ވިދާޅުވެފައިވަނީ ބައެއް މީޑިއާތަކުން އެމަނިކުފާނުގެ އާއިލާއަށް ނިސްބަތްކޮށް ފަތުރަމުންދާ ވާހަކަތަކަށް ރައްދުދިނުމުގެ ގޮތުން މިއަދު އެކްސްގައި ކުރެއްވި ޕޯސްޓެއްގައެވެ.
މި ޕޯސްޓްގައި ޝާހިދު ވިދާޅުވީ، ބައެއް މީޑިއާތަކުން އެމަނިކުފާނުގެ އާއިލާގެ މެމްބަރަކު ގަތްކަމަށް ބުނާ، ރެއިންކުރެސްޓްގެ އެޕާރޓްމެންޓް ގަނެފައިވަނީ ބޭންކް އިން ލޯނެއް ނަގައިގެން ކަމަށެވެ. އެ ލޯނު މިހާރުވެސް އަނބުރާ ދައްކަމުންދާކަމަށްވެސް ޝާހިދު ވިދާޅުވިއެވެ. އަދި ދިޔަރެސް ނޫހުގައި އެ ބުނާ އެޕާރޓްމެންޓްތައް ގަނެފައިވަނީ ސަރުކާރުގެ ވަޒީރުކަމުގައި ހުރި މިދިޔަ 5 އަހަރުގެ ތެރޭގައެއް ނޫން ކަމަށާއި، އޭރުވެސް އެމަނިކުފާނު ހުންނެވީ އިދިކޮޅު ޕާޓީގެ މެމްބަރެއްގެ ގޮތުގައިކަމަށްވެސް ޝާހިދު ވިދާޅުވިއެވެ.
މި ޕޯސްޓްގައި ޢަބްދުﷲ ޝާހިދު ވަނީ، އެމަނިކުފާނު މާލޭގައި 10 ބުރީގެ އެޕާރޓްމެންޓް ބިލްޑިންގް އެއް ޢިމާރާތްކޮށް ކުއްޔަށްދިނުމުގެ ވިޔަފާރި ކުރަމުން އަންނަތާ އެތައް އަހަރެއް ވެފައިވާކަންވެސް ފާހަގަކުރައްވާފައެވެ.
އަޅުގަނޑާއި އަޅުގަނޑުގެ ދަރިންނަކީވެސް ދިވެހި ރައްޔިތުންނަށްވާތީ އަޅުގަނޑުމެންނަށް ވެސް މުދާ ހޯދުމާއި މުދާ ގެންގުޅުމުގެ ޙައްޤު ޤާނޫނު އަސާސީ ގެ 40 ވަނަ މާއްދާއިން ކަށަވަރު ކޮށްދޭ
ޢަބްދުﷲ ޝާހިދު އެކްސްގައި ކުރެއްވި ޕޯސްޓްގައި ވިދާޅުވިއެވެ.
ޝާހިދު ވިދާޅުވީ، ބައެއް މީޑިއާތަކުން މިކަމުގައި ހަބަރުތައް ފަތުރަމުންދަނީ، ޢާއިލާގެ އަބުރުކަތިލުމުގެ މަގުސަދުގައި ކަމަށެވެ.
މިގޮތުން މިކަމާމެދު ސުވާލުކުރައްވާ ފަރާތްތަކުން އަބުރުކަތިލާ ޒާތީ ދިރިއުޅުމުގެ ކަންކަމާބެހި ގަނާކުރުމުގެ ބަދަލުގައި ޤާނޫނީ އިމުގެ ތެރޭގައި އެންޓި ކޮރަޕްޝަން ކޮމިޝަން އަށް ހުށަހަޅުއްވައި އެކޮމިޝަނުން މިކަންކަން ބެއްލެވުމަށް މަރުޙަބާކިޔާ ކަމަށްވެސް ޢަބްދުﷲ ޝާހިދު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
