ފެނަކަ ކޯޕަރޭޝަންގެ ބެލުމުގެ ދަށުގައިވާ އައިސް ޕްލާންޓްތައް މިފްކޯއާ ހަވާލުކުރެވެންދެން މަސްވެރިންނަށް މެދުނުކެނޑި އައިސް ފޯރުކޮށްދޭނެ ކަމަށް އެ ކުންފުނިން ހާމަކޮށްފިއެވެ. މި މަޢުލޫމާތު ހާމަކުރެއްވީ ފެނަކަ ކޯޕަރޭޝަންގެ މެނޭޖިންގ ޑިރެކްޓަރ މުޢާޒު މުޙައްމަދު ރަޝީދެވެ.

މަސްވެރިކަމާބެހޭ ވަޒީރު އަޙްމަދު ޝިޔާމާއި، ފެނަކަ ކޯޕަރޭޝަންގެ އިސްވެރިންނާއެކު ބޭއްވުނު ބައްދަލުވުމެއްގައި މުޢާޒު މި ވާހަކަ ދެއްކެވިއެވެ. މި ބައްދަލުވުމުގައި އައިސް ޕްލާންޓްތައް މިފްކޯގެ ދަށަށް ބަދަލުކުރުމުގެ މަރުހަލާގެ އިންތިޒާމްތައް ހަމަޖެއްސުމާ ގުޅޭގޮތުން މަޝްވަރާކުރެވުނެވެ.

ފެނަކައިން އައިސް ޕްލާންޓްތައް ހިންގުން ހުއްޓާލަން ނިންމާފައިވަނީ އެއީ ކުންފުނީގެ އަމާޒުން ބޭރު، އަދި ޚަރަދު ބޮޑު މަސައްކަތެއް ކަމަށް ބުނެއެވެ. މުޢާޒު ވިދާޅުވިގޮތުގައި މި ޚިދުމަތް ދިނުމުން ކުންފުންޏަށް މަހަކު 12 މިލިއަނަށްވުރެ ގިނަ ރުފިޔާގެ ގެއްލުން ވެއެވެ.

Advertisement

މިހާތަނަށް ފެނަކައިން 25 ރަށެއްގައި އައިސް ޕްލާންޓް ހިންގަމުން ދިޔައެވެ. ނަމަވެސް މީގެތެރޭގައި ރަނގަޅަށް ޚިދުމަތް ނުދޭ ޕްލާންޓްތައްވެސް ހިމެނެއެވެ. އެހެންނަމަވެސް ކުންފުނިން މުވައްޒަފުންގެ ޚަރަދާއި އޮޕަރޭޝަނަލް ޚަރަދުތަކަށް ބޮޑު ހޭދައެއް ކުރަމުން ގެންދެއެވެ.

ފެނަކައިގެ އަމާޒަކީ 2027 ވަނަ އަހަރު ނިމުމުގެ ކުރިން ދަރަނިތައް ޚަލާސްކޮށް ފައިދާ ނެރެވޭނެ ކުންފުންޏަކަށް ހެދުމެވެ. މި މަޤްޞަދު ހާސިލުކުރުމަށްޓަކައި ކުންފުނިން ޚަރަދު ކުޑަކުރުމަށް ގިނަ ފިޔަވަޅުތަކެއް އަޅަމުންދާ ކަމަށް ބުނެއެވެ.