ޖުލައިމަސް ނިމުނުއިރު ދައުލަތުގެ ރިޒާވް ދަށަށްދިޔަ ނަމަވެސް، ކުރިއަށްއޮތް ދުވަސްތަކުގައި ރިޒާވް ރަނގަޅުވާނޭކަމަށް ލަފާކުރެވޭކަމަށް މޯލްޑިވްސް މަނިޓަރީ އޮތޯރިޓީ، އެމްއެމްއޭއިން ބުނެފިއެވެ.

ރާއްޖެއަށް ބޭނުންވާ މުދަލުގެ ބާވަތްތަކާއި އެނޫންވެސް ކަންކަމުގައި ބޭނުންކުރަން ހުންނަ ރިޒާވް ދަށަށް ދިއުމާއި ގުޅޭގޮތުން ދައުރުވަމުންދާ ވާހަކަތަކާ ގުޅޭގޮތުން އެމްއެމްއޭއިން ނެރުނު ރަޢުޔުގައި ބުނެފައިވަނީ، މިހިނގާ އޮގަސްޓްމަސް ނިމޭއިރު ދައުލަތުގެ ރިޒާވް ރަނގަޅުވާނޭކަމަށް ލަފާކުރެވޭކަމަށެވެ. 

މިކަމާ ގުޅޭގޮތުން އެމްއެމްއޭއިން ބުނީ،ކޮވިޑާ ގުޅިގެން ކުރިމަތިވި ދަތިތަކާ ގުޅިގެން މާލީ ވުޒާރާއާއެކު 2019 ވަނަ އަހަރު ގާއިމްކުރި އެއްބަސްވުމެއްގެ ދަށުން ސޮވެރިން ޑިވެލޮޕްމެންޓް ފަންޑަށް އަށް ޖަމާކުރެވޭ ޑޮލަރު އެމްއެމްއޭ އަށް މާރުކުރުމަށްފަހު ބޭނުންކުރެވޭ ރިޒާވްގައި ހިމަނާފައިވާކަމަށެވެ. ނަމަވެސް 2023 ވަނަ އަހަރުގެ ޑިސެމްބަރު މަހުން ފެށިގެން ފައިސާ މާރުކުރުމުގެ ބަދަލުގައި ޑޮލަރުން ބެހެއްޓުމަށް ނިންމައި ޑޮލަރުން ފައިސާ ޖަމާކުރަމުން އައިސްފައިވާކަމަށެވެ.

އެގޮތުން މިހާރު އެސްޑީއެފްގައި ބޭނުންކުރެވޭގޮތަށް 65 މިލިއަން ޑޮލަރު ހުރިކަމަށް އެމްއެމްއޭއިން ބުންޏެވެ. ޖުލައިމަހުގެ ނިޔަލަށް ބޭނުންކުރެވޭ ރިޒާވްގައި ހުރީ45 މިލިއަން ޑޮލަރު ހުރިއިރު، އެ އަދަދު ގުނާފައިވަނީ އެސްޑީއެފްގައި ހުރި 65 މިލިއަން ޑޮލަރު ނުލައިކަމަށް އެމްއެމްއޭއިން ބުނެއެވެ.

ކުރިއަށްއޮތީ ރާއްޖޭގެ ފަތުރުވެރިކަމުގެ ސިނާއަތުގެ ހައި ސީޒަންކަމުން ކުރިއަށްއޮތް ތަނުގައި ރިޒާވް އެދެވޭ އަދަދަކަށް އިތުރުވާނޭކަމަށް ލަފާކުރެވޭކަމަށް އެމްއެމްއޭއިން ބުނެއެވެ. ހަމަ އެއާއެކު އެމްއެމްއޭއިން މިހާރުވެސް އަންނަނީ ބޭރުފައިސާގެ މުއާމަލާތްތަކަށް ބޭނުންވާ ފައިސާ ހޯދުމަށް ބޭރުގެ އެކި ފަރާތްތަކާއެކު މުއާމަލާތްތައް ކުރަމުންނެވެ. މިގޮތުން ކުރެވެމުންދިޔަ މަސައްކަތްތަކުން ބޭރުގެ ސްވޮޕްލައިނަކުން ވަރަށް އަވަހަށް 400 މިލިއަން ޑޮލަރާއި ހަމައަށް ފައިނޭންސް ހޯދުމުގެ ފުރުސަތު ލިބިގެންދާނޭކަން އެމްއެމްއޭއިން ވަނީ ބުނެފައެވެ.