ރާއްޖޭގައި ޤަވާއިދާ ހިލާފަށް އުޅެމުންދާ ބިދޭސީން އަތުލައިގަތުމަށް އިމިގްރޭޝަނުން ކުރިއަށްގެންދާ އޮޕަރޭޝަނުގައި މުޑުދާރު ގޮތަކަށްހުރި ފާހާނާއެއް ކައިރީ ފޯއްކޮށައި ވިއްކުމުގެ މަސައްކަތްކުރަމުންދާ ބިދޭސީންތަކެއް އަތުލައިގަނެފިއެވެ.

މިފަހަރު މި ބިދޭސީން އަތުލައިގަނެފައިވަނީ މ.ރީތި ކޯކިޑްގެ ބަލައި ފާސްކުރުމުގެ ތެރެއިންނެވެ. އިމިގްރޭޝަނުން އާއްމުކޮށްފައިވާ ފޮޓޯތަކުން ފެންނަގޮތުގައި ފޯއްކޮށުމުގެ ކަންކަން އެމީހުން ކުރަނީ ވަރަށް މުޑުދާރުކޮށްހުރި ފާހާނާއެއް ކައިރީއެވެ. ފޮޓޯތަކުން އެނގޭގޮތުގައި ފޯއްކޮށައި ބަހައްޓާފައި ހުންނަ ތަންތަނުގެ ތެރޭގައި އެމީހުން ނިދާ ހަދާތަންހިމެނެއެވެ. މީގެ އިތުރުން ފާހާނާ އޮޅިގަނޑު ކައިރީގައިވެސް ކޮށާފައިހުރި ފޯއްތައް ބަހައްޓާފައި ހުރެއެވެ. ފޯއްތައް ބަހައްޓާފައި ހުރި ގޮތަށް ބަލާއިރު ފާހާނާއަށް ވަދެ ނިކުމެވެނީ އޭގެ މައްޗަށް އަރައިގެންނެވެ. 

އިމިގްރޭޝަނުން ބުނީ،  އިއްޔެ ހިންގުނު ހާއްސަ ރެއިޑުގައި، މ.ރީތި އޯކިޑްގެ ބަލައި ފާސްކޮށް، ގަވާއިދާ ހިލާފަށް އުޅެމުންދިއަ 02 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެނެސްފައިވާކަމަށެވެ. އެތަނަކީ، ދިވެހިން އާންމުކޮށް ދުފުމުގައި ބޭނުންކުރާ ފޯއް، ވިޔަފާރިއަށް ތައްޔާރުކުރަމުންދާ ތަނަކަށްވެފައި، ސާފުތާހިރުކަން އިންތިހާއަށް ދަށްކަމަށްވެސް އިމިގްރޭޝަނުން ވަނީ ބުނެފައެވެ. އެގޮތުން އެތަނުން ފާހަގަކުރެވުނު ކަންކަން ސަރުކާރުގެ ކަމާބެހޭ އިދާރާތަކުގެ ސަމާލުކަމަށް ގެނެވިފައިވާކަމަށް އިމިގްރޭޝަނުން ބުނެއެވެ.'

މީގެ އިތުރުން އިމިގްރޭޝަނުން ވަނީ އެސްއެމްއީ ހަބްގައި ގަވާއިދާ ހިލާފަށް ވިޔަފާރި ކުރަމުންދިޔަ ބިދޭސީންތަކެއްވެސް އަތުލައިގަނެފައެވެ. އެތަން ބަލައި ފާސްކޮށް، ގަވާއިދާ ހިލާފަށް އުޅެމުންދިއަ 03 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެނެސްފައިވާކަމަށް އެ އިދާރާއިން ބުނެއެވެ.

އިމިގްރޭޝަނުން ކުރިއަށްގެންދާ އޮޕަރޭޝަނުގައި މީގެކުރިންވެސް ވަނީ، އެއްވެސްކަހަލަ ސާފްތާހިރުކަމެއްނެތި ކާބޯތަކެތި ތައްޔާރުކުރުމުގެ މަސައްކަތުގައި ހަރަކާތްތެރިވަމުންދިޔަ ބިދޭސީން އަތުލައިގަނެފައެވެ. މީގެ ތެރޭގައި ދިވެހިން އާއްމުކޮށް ކައި އުޅޭ ކުދިގުޅަ އަދި ތެލުލިފަތް ފަދަ ތަކެތި ތައްޔާރުކުރަމުންދިޔަ ތަންތަނުން އަތުލައިގަތް ބިދޭސީން ހިމެނެއެވެ.