ބުޅާ މަހުން ހެދި އެއްޗެހި ވިއްކި ފިހާރަތަކަށް ކަމަށް ބުނެ މީސްމީޑިއާގައި ދައުރުކުރަނީ ފޭކު ލިސްޓެއް ކަމަށް މޯލްޑިވްސް އިމިގްރޭޝަނުން ބުނެފިއެވެ. 

މޯލްޑިވްސް އިމިގްރޭޝަން އެކްސްގައު ކުރި ޕޯސްޓެއްގައި ބުނީ، އެ އިދާރާގެ ފޭސްބުކް ޕޭޖުން ކޮށްފައިވާ ޕޯސްޓެއް ކަމަށް ބުނެ ސޯޝަލް މީޑިއާގައި ދައުރުވަމުންދާ ފޮޓޯއަކީ ސައްހަ ފޮޓޯއެއް ނޫން ކަމަށެވެ. 

އަދި އެފަދަ ޒިންމާދާރުކަން ކުޑަ އަމަލުތައް ނުކުރުމަށްވެސް އިމިގްރޭޝަނުން ވަނީއެދިފައެވެ. 

Advertisement

މިކަމާއި ގުޅިގެން، އިމިގްރޭޝަން ކޮންޓްރޯލަރ މުހައްމަދު ޝަމްޢާން ވަހީދު ވަނީ، އާއްމު މަސްލަހަތާއި ގުަޅުން ހުރި ކަންކަމުގައި މަޢުލޫމާތުގެ ސައްހަކަން ކަށަވަރު ކުރުމަށްފަހު ޚަބަރު ފެތުރުމަށާއި ސޯޝަލް މީޑިއާގެ ޕޯސްޓް ޝެއަރ  ކުރުމުގައިވެސް މަޢުލޫމާތުގެ ސައްޙަ ކަން ކަށަވަރު ކުރުމަށް އެދިލައްވާފައެވެ.  

އަދި ބުޅާ މަރާ އަދި އޭގެން ވިޔަފާރި ކުރާ ކަމުގެ ތުހުމަތު ކުރެވިފައިވާ މީހާ ގެ ތަހުޤީގު ، ކަމާ ގުޅުންހުރި އިދާރާތަކުގައި ކުރިއަށްގެންދާ ކަމަށްވެސް ވިދާޅުވިއެވެ.  

ބުޅާ މަހުން ކާތަކެތި ހަދާ ކަމަށް ތުހުމަތުކުރެވޭ ބަންގްލަދޭޝްއަށް ނިސްބަތްވާ ހުސެއިން އަރަފާތު، 32 އިއްޔެ ހޯދައު އިމިގްރޭޝަންގެ ބެލުމުގެ ދަށަށް ގެންގޮސްފައިވާއިރު، އެ މައްސަލަ ފުލުހުން ދަނީ އަދިވެސް ތަހުގީގު ކުރަމުންނެވެ.

އަރަފާތުގެ ކަންކަން އެނގޭ ބައެއް މީހުން ވަނީ އޭނާ އާ ގުޅޭ ބައެއް ވާހަކަތައް ސޯޝަލް މީޑިއާގައި ހިއްސާކޮށްފައެވެ. މިގޮތުން އަރަފާތު ދިރިއުޅެމުންދާ ގޭދޮށުން ބުޅަލުގެ ގުނަވަންތައް ފެނިފައިވާކަމަށް އަވައްޓެރިން ބުނެފައިވާކަމަށް އެފަރާތްތަކުން ވަނީ ފާހަގަކޮށްފައެވެ.

ވޮއިސްއަށް ވަރަށް މުއުތަބަރުކޮށް މައުލޫމާތު ލިބިފައިވާ ގޮތުގައި އަރަފާތު ދިރިއުޅެމުންދިޔަ ތަނުން ކާބޯތަކެތި ތައްޔާރުކޮށް، ސައްހަ ލޭބަލް ނުޖަހައި ބާގަރ އަދި ސަބްމެރިން ފަދަ ތަކެތި ވިއްކަމުން ގޮސްފައިވާއިރު، މިތަކެތި ވިއްކުމަށް ބޭނުންކޮށްފައިވަނީ ބިދޭސީންގެ ނުފޫޒު އޮންނަ ފިހާރަތަކެވެ. 

ކާބޯތަކެތީގެ ރައްކާތެރިކަން ކަށަވަރުކުރުމަށް ބިލެއް ތަސްދީގުކޮށްފައިވާއިރު، މި ޤާނޫނަށް މިހިނގާ އޮގަސްޓްމަހުގެ 24 ވަނަ ދުވަހުން ފެށިގެން އަމަލުކުރަން ފަށާނެއެވެ. މި ޤާނޫނު ވުޖޫދަށް އައުމުގެ މަޤްސަދުތަކުގެ ތެރޭގައި ކާބޯތަކެތި އުފައްދާ، ނުވަތަ ތައްޔާރުކުރާ، ނުވަތަ ބަންދުކުރާ، ނުވަތަ ލޭބަލްކުރާ، ނުވަތަ ރައްކާކުރާ، ނުވަތަ ގުދަންކުރާ، ނުވަތަ ގަނެ ވިއްކާ، ނުވަތަ އެއްތަނުން އަނެއްތަނަށް އުފުލާ، ނުވަތަ ފޯރުކޮށްދޭ ތަންތަނުގައި ހިފަހައްޓަންޖެހޭ މިންގަނޑުތަކެއް ކަނޑައެޅުން ހިމެނެއެވެ.

މި ޤަނޫނަށް އަމަލުކުރަން ފެށުމުން ވިއްކާ ތައްޔާރީ ކާބޯތަކެތީގައި ލޭބަލް ޖެހުން ލާޒިމްވެގެން ދާކަން ފާހަގަކޮށްލެވެއެވެ.