ލޭނު މަސްވެރިކަމަކަށް ދެވިއްޖެނަމަ، އެކަމުން އެކަނިވެސް އާމްދަނީގެ ގޮތުގައި ދައުލަތުގެ ބައިތުލްމާލަށް އެއް ބިލިއަނަށްވުރެ ގިނަ ރުފިޔާ ލިބޭނޭކަމަށް މަސްވެރިކަމާ ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.

މަސްވެރިކަމާ ބެހޭ ވުޒާރާއިން ކުރިއަށްގެންދިއުމަށް ނިންމާފައިވާ ކަންކަމުގެ ތެރެއިން، ލޭނު މަސްވެރިކަން ކުރުމަށް ހުއްދަ ދިނުމަށް ސަރުކާރުން ގެންގުޅެމުންދާ ސިޔާސަތާ ގުޅޭގޮތުން ނޫސްވެރިންނާ ވާހަކަދައްކަވަމުން މިނިސްޓަރު ޝިޔާމް ވިދާޅުވީ، މަސްވެރިކަމުގެ ސިނާއަތް ސިންދަފާތުކޮށް އެ ސިނާއަތުން ލިބޭ އާމްދަނީ އިތުރުކުރުމަކީ ސަރުކާރުގެ ސިޔާސަތެއް ކަމަށެވެ. މަސްވެރިކަމުން ލިބޭ އާމްދަނީ އިތުރުކުރުމަށް ސަރުކާރުން ގެންގުޅޭ ސިޔާސަތުގެ ތެރެއިން ލޭނު މަސްވެރިކަމަކީ އެކަމުން ރަނގަޅު މަންފާއެއް މަސްވެރިންނަށާއި ދައުލަތަށް ލިބޭނޭ ކަަމެއްކަން މިނިސްޓަރު ވިދާޅުވިއެވެ.  

މަސްވެރިކަމުން އަހަރެއްގެ މައްޗަށް މިހާރު ދައުލަތަށް އާމްދަނީގެ ގޮތުގައި ލިބެނީ 90 މިލިއަނެއްހާ ޑޮލަރު، ދިވެހި ރުފިޔާއިން ބަލާނަމަ، 1.3 ބިލިއަން ރުފިޔާއެވެ. މިނިސްޓަރު ސިޔާމް ވިދާޅުވީ މަސްވެރިކަން ސިންދަފާތުކުރުމަށް އަޅާ މި ފިޔަވަޅާއެކު ހަމައެކަނި ލޭނު މަސްވެރިކަމުން އެކަނިވެސް އެންމެ މަދުވެގެންވެސް އަހަރެއްގެ މައްޗަށް 1.2 ބިލިއަން ރުފިޔާ ދައުލަތަށް ލިބޭނޭ ކަމަށެވެ

Advertisement

ޝީޔާމް ވިދާޅުވީ ރައްޖޭގެ އިޤްތިސާދީ ހާލަތު މިވަގުތު އޮތްގޮތުން ލޭނުގެ މަސްވެރިކަން ކުރުމަށް ހުއްދަދޭން މުހިއްމު ކަމަށެވެ. ލޭނުގެ މަސްވެރިކަން ކުރުމުގެ ހުއްދަ ދޭން ނިންމުމ ގުޅިގެން މިކަމަށް ފާޑުކިޔަމުންދާ ފަރާތްތަކަށްވެސް ޝިޔާމް ވަނީ ރައްދު ދެއްވާފައެވެ. މިގޮތުން ލޭނުއަޅައިފިނަމަ ވިލާތުގެ ޤައުމުތަކުން ދިނުމަށް ނިންމާފައިވާ އިނާޔަތްތައް ހުއްޓާލާނެކަމަށް ދެކެވެމުންދާ ވާހަކަތަކާ ގުޅޭގޮތުން ޝިޔާމް ވިދާޅުވީ އިންޑިއާ ކަނޑުގައި ދިވެހިން ދެމެހެއްޓެނިވި މަސްވެރިކަމެއް ކުރަމުން އަންނަތާ އެތައް އަހަރެއް ވީއިރު، ވަކި ލިބުނު މޮޅުތަކެއް ނެތްކަމަށެވެ.

ލޭނުއެޅުމާ ގުޅިގެން ފަތުރުވެރިކަމުގެ ސިނާއަތަށް ގެއްލުމެއް ނެތްކަން ފާހަަގަކުރައްވަމުން ޝިޔާމް ވިދާޅުވީ ލޭނު އެޅުމަށް ހުއްދަދެނީ ރާއްޖޭގެ ސަރަހައްދާ 100 މޭލުން ބޭރުންކަމަށެވެ. އެހެންކަމުން ފަތުރުވެރިން ރާއްޖޭގެ ކަނޑުފަޅުތަކުން ފެންނަ ދިރުންތައް ނެތިދާނޭކަމަށް ދައްކާ ވާހަކަތަކުގެ އަސްލެއް ނެތްކަމަށް ޝިޔާމް ފާހަގަކުރެއްވިއެވެ.

ލޭނުއެޅުމުގެ ކަންކަން މޮނިޓަރ ކުރުމުގެ ކަންކަން ހަރުދަނާ ގޮތެއްގައި ކުރިއަށްގެންދާނޭކަމަށާއި، މިކަމުގެ ތެރެއިން ވަގުވިޔަފާރިއަށް ފަހިވާ އެއްވެސް ކަމެއް ކުރުމުގެ ފުރުސަތު ނުދެއްވާނޭ ކަމަށްވެސް މިނިސްޓަރު ވަނީ ވިދާޅުވެފައެވެ.

ރާއްޖޭގައި މީގެ ކުރިން 2012 ވަނަ އަހަރު ލޭނުގެ މަސްވެރިކަން ކުރުމުގެ ހުއްދަ ސަރުކާރުން ދީފައި އޮތްނަމަވެސް ނިމިގެންދިޔަ އެމްޑީޕީ ވެރިކަމުގައި 2019 ވަނަ އަހަރު ވަނީ ލޭނުގެމަސްވެރިކަމުގެ ހުއްދަ ބާތިލްކޮށްފައެވެ.