ރާއްޖޭގެ ޔޫޒަބަލް ރިޒާވް، ނުވަތަ ބޭނުންކުރެވޭ ޑޮލަރު ރިޒާވު ހުސްވެއްޖެ ކަމަށް ދައުރުވަމުންދާ ވާހަކަތައް ސަރުކާރުން ދޮގުކޮށްފިއެވެ.

އޮންލައިން މީޑިއާއެއް ކަމަށްވާ "އަދަދުން" ވަނީ ރާއްޖޭގެ ބޭނުންކުރެވޭ ޑޮލަރުގެ ރިޒާވް އެއްކޮށް ހުސްވެއްޖެކަމަށް ރިޕޯޓްކޮށްފައެވެ.

މިކަމާ ގުޅިގެން މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުހައްމަދު ސައީދު ވިދާޅުވީ، ބޭނުންކުރެވޭ ޑޮލަރު ރިޒާވު ހުސްވެއްޖެ"ކަމަށް އަދަދު އޮންލައިންގައި މިއަދު ޝާއިޢުކުރި ޚަބަރަކީ ކަނޑައެޅިގެން ބުހުތާނު ދޮގު ޚަބަރެއް ކަމަށެވެ. މިކަމާ ގުޅޭ އިތުރު އެއްވެސް ވާހަކައެއް މިނިސްޓަރު ވިދާޅެއް ނުވެއެވެ.

Advertisement

ރާއްޖޭގެ ރިޒާވް އާ ގުޅޭގޮތުން މިދިޔަ އާދިއްތަ ދުވަހު މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީން ބުނެފައިވަނީ، ޖުލައިމަސް ނިމުނުއިރު ދައުލަތުގެ ރިޒާވް ދަށަށްދިޔަ ނަމަވެސް، ކުރިއަށްއޮތް ދުވަސްތަކުގައި ރިޒާވް ރަނގަޅުވާނޭކަމަށެވެ. 

އެމްއެމްއޭއިން ބުނީ،ކޮވިޑާ ގުޅިގެން ކުރިމަތިވި ދަތިތަކާ ގުޅިގެން މާލީ ވުޒާރާއާއެކު 2019 ވަނަ އަހަރު ގާއިމްކުރި އެއްބަސްވުމެއްގެ ދަށުން ސޮވެރިން ޑިވެލޮޕްމެންޓް ފަންޑަށް އަށް ޖަމާކުރެވޭ ޑޮލަރު އެމްއެމްއޭ އަށް މާރުކުރުމަށްފަހު ބޭނުންކުރެވޭ ރިޒާވްގައި ހިމަނާފައިވާކަމަށެވެ. ނަމަވެސް 2023 ވަނަ އަހަރުގެ ޑިސެމްބަރު މަހުން ފެށިގެން ފައިސާ މާރުކުރުމުގެ ބަދަލުގައި ޑޮލަރުން ބެހެއްޓުމަށް ނިންމައި ޑޮލަރުން ފައިސާ ޖަމާކުރަމުން އައިސްފައިވާކަމަށެވެ.

އެގޮތުން މިހާރު އެސްޑީއެފްގައި ބޭނުންކުރެވޭގޮތަށް 65 މިލިއަން ޑޮލަރު ހުރިކަމަށް އެމްއެމްއޭއިން ބުންޏެވެ. ޖުލައިމަހުގެ ނިޔަލަށް ބޭނުންކުރެވޭ ރިޒާވްގައި ހުރީ45 މިލިއަން ޑޮލަރު ހުރިއިރު، އެ އަދަދު ގުނާފައިވަނީ އެސްޑީއެފްގައި ހުރި 65 މިލިއަން ޑޮލަރު ނުލައިކަމަށް އެމްއެމްއޭއިން ބުނެއެވެ.

ކުރިއަށްއޮތީ ރާއްޖޭގެ ފަތުރުވެރިކަމުގެ ސިނާއަތުގެ ހައި ސީޒަންކަމުން ކުރިއަށްއޮތް ތަނުގައި ރިޒާވް އެދެވޭ އަދަދަކަށް އިތުރުވާނޭކަމަށް ލަފާކުރެވޭކަމަށް އެމްއެމްއޭއިން ބުނެއެވެ. ހަމަ އެއާއެކު އެމްއެމްއޭއިން މިހާރުވެސް އަންނަނީ ބޭރުފައިސާގެ މުއާމަލާތްތަކަށް ބޭނުންވާ ފައިސާ ހޯދުމަށް ބޭރުގެ އެކި ފަރާތްތަކާއެކު މުއާމަލާތްތައް ކުރަމުންނެވެ. މިގޮތުން ކުރެވެމުންދިޔަ މަސައްކަތްތަކުން ބޭރުގެ ސްވޮޕްލައިނަކުން ވަރަށް އަވަހަށް 400 މިލިއަން ޑޮލަރާއި ހަމައަށް ފައިނޭންސް ހޯދުމުގެ ފުރުސަތު ލިބިގެންދާނޭކަން އެމްއެމްއޭއިން ވަނީ ބުނެފައެވެ.