ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ އާބަން ޑިވެލޮޕްމަންޓް ބިލަކީ މުޅި ލާމަރުކަޒީ ނިޒާމް މަރާލާނެ ބިލެއްކަމަށް އެންމެބޮޑު އިދިކޮޅު ޕާޓީ، އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެ އެވެ.

އެމްޑީޕީ ޤައުމީ މަޖިލީހުގެ ބައްދަލުވުމުގައި ވާހަކަދައްކަވަމުން ފައްޔާޒު ވިދާޅުވީ، ސަރުކާރުން މަޖިލީހަށް ހުށަހަޅާފައިވާ މި ބިލްގައި ކަނޑައަޅާފައިވާ ބައެއް ކަންތައްތަކުގެ ސަބަބުން ކައުންސިލަރުންގެ ކަންބޮޑުވުންތައް އެބަހުރި ކަމަށެވެ. މިގޮތުން އާބަން ސެންޓަރުގެ ބައެއް ކަންކަމަށް ސަރުކާރުގެ ބާރުފޯރުވޭގޮތަށް މި ބިލްގައި ހިމަނާފައިވާކަން ފައްޔާޒް ވިދާޅުވިއެވެ.

ފައްޔާޒް ވިދާޅުވީ އަދުގެ ސަރުކާރުން ގެންގުޅެނީ މުޅި ލާމަރުކަޒީ ނިޒާމު އެއްކޮށް ފުނޑުފުނޑުކޮށްލުމުގެ ވިސްނުމެއް ކަމަށެވެ. ސަރުކާރުގެ އަމަލުތަކުން މިކަން ވަރަށް ރަނގަޅަށް ފެނި ސާފުވާކަމަށް ފައްޔާޒް ފާހަގަކުރެއްވިއެވެ.

Advertisement

ފައްޔާޒު ވިދާޅުވީ މި ބިލްގައި ހުރި ބައެއް މާއްދާތަކުގެ ސަބަބުން މީގެ ކުރިން އެމްޑީޕީ ސަރުކާރުން ކައުންސިލަރުންނަށް ދީފައިވާ ބައެއް ބާރުތައް ގެއްލިގެންދާނޭކަމަށެވެ. މިގޮތުން މާލީ ބާރުވެރިކަމާއި، އިގްތިސާދީ ކަންކަން ބައްޓަންކުރުމުގެ ބާރުތައް ނެތިގެންދާނޭކަމަށެވެ. 

ފައްޔާޒު ވިދާޅުވީ މި ބިލާބެހޭގޮތުން ރައްޔިތުންނާ ހިސާބަށް ދާންޖެހޭ ކަމަށާއި، ސަރުކާރުން މި ބިލަށް ގެންނަން އުޅޭ ބަދަލުތައް ހުއްޓުވަންޖެހޭކަމަށެވެ. މިއީ މި ސަރުކާރުން ޑިމޮކްރަސީއަށް ދޭ ހަމަލާތަކުގެ ތެރެއިން ނުރައްކާތެރި ހަމަލާއެއްކަމަށްވެސް ފައްޔާޒު ވިދާޅުވިއެވެ.

ސަރުކާރުން ވަނީ އާބަން ޑިވެލޮޕްމަންޓް ބިލަށް ރައްޔިތުންގެ ހިޔާލު ހޯދުމަށް ހުޅުވާލާފައެވެ.