ވަކި މީހަކަށްވުރެ ޤައުމުގެ މަސްލަހަތު މާމުހިއްމުކަމަށް މި ސަރުކާރުގެ އިގްތިސާދީ ވަޒީރު މުހައްމަދު ސައީދު، އެމްޑީޕީގެ ޗެއާޕާސަން ފައްޔާޒުއަށް ވަރުގަދަ ރައްދެއް ދެއްވައިފިއެވެ.
ކުރީގެ އިކޮނިމިކް މިނިސްޓަރު އަދި މިހާރު އެމްޑީޕީގެ ޗެއާޕާސަން ފައްޔާޒު އިސްމާއީލް އެކްސްގައި މިއަދު ކުރެއްވި ޕޯސްޓެއްގައެވެ. އަދި ވިދާޅުވެފައިވަނީ، މާލީ ހާލަތު މިހާރު އޮތްގޮތުން އާއިޝަތު ނޫރައްދީން ފަދަ ބޭންކިން ދާއިރާގެ ތަޖުރިބާކާރު ބޭފުޅަކު ވަކިކުރެއްވުމަކީ މާނައެއްހުރި ކަމެއް ނޫންކަމަށެވެ.
ފައްޔާޒް ވިދާޅުވީ، އާއިޝަތު ނޫރައްދީން ފަދަ ބޭފުޅަކު ވަޒީފާއިން ވަކިކުރުމަކީ އެކަމުގެ ސަބަބުން ބައިނަލްއަޤްވާމީ ފަރާތްތަކުގެ މެދުގައިވެސް ބޭންކާމެދު ނުތަނަވަސްކަން އުނފެދޭނެ ކަމެއް ކަމަށެވެ. އަދި މިއީ ރާއްޖޭގެ އިޤްތިސާދުގެ ޔަގީންކަން ކުޑަވުމެއްކަމަށް ފައްޔާޒް ސިފަކުރެއްވިއެވެ.
މިކަމާ ގުޅޭގޮތުން އިކޮނޮމިކް މިނިސްޓަރު ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ، އެމްޑީޕީ ވެރިކަމުގައި 100 އަހަރާ ނުބައްދަލު ދަރަނިތައް ނަގައި އަޑިނޭނގޭ ފުންމިނަށް ޤައުމު ވައްޓާލިކަމަށެވެ. މުޅި ނިޒާމް، އެފުއްމިފުށަށް ޖަހައި ޤައުމުގެ މާލިއްޔަތު އަނދަވަޅަކަށް ވައްޓާލީ އެމްޑީޕީން ކަމަށް ސައީދު ތުހުމަތުކުރެއްވިއެވެ.
ފައްޔާޒްގެ އެކްސް ޕޯސްޓްގައި އޭނާ ވަނީ ސަރުކާރުން މާލީ ނިޒާމުގެ ތެރެއަށް ނުފޫޒު ފޯރުވުން ހުއްޓާލުމަށް ގޮވާލާފައެވެ. އެމްޑީޕީން ތުހުމަތު ކުރާގޮތުގައި ސަރުކާރުން ދަނީ މާލީ ނިޒާމްގެ ތެރެއަށް ނުފޫޒު ފޯރުވައި ބާރުގެ ބޭނުން ނަހަމަގޮތުގައި ބޭނުންކުރަމުންނެވެ.
Advertisement
This content is created and paid for by advertisers and does not involve Voice Journalists
