ޕަބްލިކް ސާވިސް މީޑިއާ (ޕީއެސްއެމް) ގެ މެނޭޖިންގ ޑިރެކްޓަރުކަމުގެ މަޤާމަށް މުހައްމަދު ސައީދު އައްޔަނުކުރައްވައިފިއެވެ.

ޕީއެސްއެމަށް އައު މެނޭޖިންގ ޑިރެކްޓަރަކު އައްޔަނުކުރިކަން ވޮއިސްއަށް ވަނީ، އެތަނުގެ ސީނިއާ މުއައްޒަފަކު ކަށަވަރުކޮށްދީފައެވެ.

ޕީއެސްއެމްގެ މެނޭޖުމަންޓުން މިހާރު ވަނީ އެކަން، ރަސްމީކޮށް މުއައްޒަފުންނަށްވެސް އަންގާފައެވެ. މިގޮތުން ޕީއެސްއެމްގެ މުއައްޒަފުންނަށް ކުންފުނީގެ ހިއުމަން ރިސޯސް ޑިޕާޓްމަންޓުން ކުރި މެސެޖެއްގައި ބުނެފައިވަނީ، އެކުންފުނީގެ ޑިރެކްޓަރުންގެ ބޯޑުގެ މެމްބަރުކަމާއި މެނޭޖިންގ ޑިރެކްޓަރުގެ މަގާމަށް ގ.ދިލްކަޝް، މުހައްމަދު ސައީދު، މިއަދު ޕީސީބީން އައްޔަނުކުރައްވާފައިވާކަމަށެވެ.

Advertisement

މުހައްމަދު ސައީދަކީ މީގެ ކުރިން ދައުލަތުގެ އެކި މަގާމުތައް ފުރުއްވާފައިވާ ބޭފުޅެކެވެ. މިގޮތުން އޭނާ ވަނީ އެޑިއުކޭޝަން މިނިސްޓްރީގައި ތަފާތު އެކި މަގާމުތައް ފުރުއްވާފައެވެ. މީގެ ތެރޭގައި ޑިރެކްޓަރ ޖެނެރަލް ކަމުގެ މަގާމާއި ޕާމަނަންޓް ސެކެޓްރީކަން ހިމެނެއެވެ.

މުޙައްމަދު ސަޢީދު ވަނީ އިނގިރޭސިވިލާތުގެ ޔުނިވަރސިޓީ އޮފް ބޯލްޓަންއިން ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓަރސް ޑިގްރީ ހާސިލް ކުރައްވާފައެވެ.

ޕީއެސްއެމްގެ އެމްޑީކަމުގެ މަގާމަށް ސައީދު ހަމަޖައްސަވާފައިވަނީ މިހާތަނަށް އެ މަގާމުގައި ހުންނެވި ޒީނާ ޒާހިރު މަގާމުން އިސްތިއުފާދެއްވުމުންނެވެ. ޒީނާ މަގާމުން އިސްތިއުފާދެއްވި ސަބަބެއް ސީދާ ހާމައެއް ނުކުރެއެވެ.