ގިނަ އަދަދެއްގެ ދިވެހިން ބޭނުން ކުރަމުންދާ ޓިކްޓޮކް ތެރޭގައި ރާއްޖެޓީވީގެ ނޫސްވެރިޔާ ލައިސާ އަހުމަދަށް އިންޒާރުދިން މައްސަލަ ފުލުހުން ބަލަން ފަށައިފިއެވެ.
ޓިކްޓޮކްގައި އުޅެމުންދާ ބައެއް މީހުންގެ ފަރާތުން ނޭދެވޭ ކަންކަން ހުރިކަން ފާހަގަކޮށް ލައިސާ ލިޔުނު ރިޕޯޓަކާ ގުޅިގެން ޓިކްޓޮކްގައި އޭނާއަށް އިންޒާރުދިން މައްސަލައެއް ވަނީ ފުލުހަށް ހުށަހަޅާފައެވެ. ލައިސާ އެ މައްސަލަ ފުލުހަށް ހުށަހަޅާފައިވަނީ، ހޯމަދުވަހުއެވެ.
ޓިކްޓޮކް ބޭނުންކުރާ ބައެއް މީހުންގެ ފަރާތުން އިޖުތިމާއީ ނޭދެވޭ ބައެއްކަންކަން ފެންނަމުންދާކަން ރިޕޯޓްކޮށް ލައިސާ ލިއުނު ލިޔުމަކާ ގުޅިގެން ޓިކްޓޮކްގައި ދިވެހި ދެ ފިރިހެނަކު ވަނީ ލައިސާއަށް ފުރައްސާރަކޮށް އިންޒާރުދީފައެވެ. އެމީހުން ވަނީ ލައިސާގެ ފޮޓޯ ބޭނުންކޮށްގެން އޭނާ އާ ގުޅޭގޮތުން އާއްމު ތަންތަނުގައި ދައްކަން ނުވާވަރުގެ އާއްމު އިޖުތިމާއީ މިންގަނޑާ ހިލާފްވާފަދަ ބަސްތައް ބޭނުންކޮށްގެން ވާހަކަދައްކާފައެވެ.
މިކަމާ ގުޅިގެން ނޫސްވެރިޔާ ލައިސާވެސް ވަނީ އެކަމުގެ ކަންބޮޑުވުން ފާޅުކޮށްފައެވެ. ލައިސާ ފޭސްބުކްގައި ކުރި ޕޯސްޓެއްގައި ބުނެފައިވަނީ އޭނާއާ ގުޅޭގޮތުން ސާބިތު ނުހިފޭ، އަދި އިސްލާމްދީނުގައި ހަރާމްކޮށްފައިވާ ހުތުރުކަންބޮޑު ފާފަތައް އޭނާގެ ބޮލުގައި އަޅުވާފައިވާތީވެ އެ މައްސަލަތައް ފުލުހަށް ހުށަހަޅާނޭ ކަމަށެވެ.
ދިވެހިންގެ މެދުގައި ޓިކްޓޮކް އާއްމުވެފައިވާއިރު، އެކަމުގެ ތެރޭގައި ބައެއް މީހުން އިޖުތިމާއީ މިންގަނޑުން ބޭރުވެ، ހިންގަމުންގެންދާ ކަންތައްތަކާމެދު ކަންބޮޑުވާކަމަށް ގިނަ އަދަދެއްގެ މީހުން އަންނަނީ ބުނަމުންނެވެ. މީގެ ތެރެއިން ބައެއް މީހުންގެ މައްސަލަތައް ފުލުހުން މީގެ ކުރިންވެސް ބަލައި ތަހުގީގުކޮށްފައިވާކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
