ސަރުކާރުގެ ކުންފުނިތަކުގެ ތެރެއިން ފައިދާ ނުނެރެވޭ ކުންފުންޏެއްނަމަ، އެފަދަ ކުންފުނިތައް އުވާލުމަށް ފަސްނުޖެހޭނޭކަމަށް އިގްތިސާދީ ވަޒީރު މުހައްމަދު ސައީދު ވިދާޅުވެއްޖެއެވެ.

ސަރުކާރު ކުންފުނިތަކުގެ ތެރެއިން މިވަގުތަށް އެންމެ ދަރަނި ބޮޑު ކުންފުނިތަކުގެ ތެރޭގައި ހިމެނޭ ޕަބްލިކް ސާވިސް މީޑިއާއިން ގެނެސްދިން ރާއްޖެ މިއަދު ޕްރޮގްރާމްގައި ވާހަކަދައްކަވަމުން އިގްތިސާދީ ވަޒީރު ވިދާޅުވީ، އިޤްތިސާދު ރިފޯމްކުރުމަށް ފަށާފައިވާ މަސައްކަތްތަކުގައި މި ސަރުކާރުން ކުރުމަށް ވައުދުވި ކަންކަން ކުރާނޭކަމަށެވެ. މިގޮތުން ފައިދާ ނުވާ ކުންފުނިތައް އުވާލަން ޖެހިއްޖެނަމަ އެކަން ކުރާނޭކަން ފާހަގަކުރައްވަމުން ސައީދު ވިދާޅުވީ، އެއްކޮށްލަން ޖެހޭ ކުންފުންޏެއް ފާހަގަކުރެވޭ ނަމަ އެކަންވެސް ކުރާނޭކަމަށެވެ. 

ފައިދާނުވާ ކުންފުނިތަކަށް އެއްވެސް މާނައެއްނެތް ގޮތެއްގައި ހަރަދުކުރަމުންދިއުމަކީ މި ސަރުކާރުން ގެންގުޅޭނޭ ސިޔާސަތެއް ނޫންކަމަށާއި، ނިމިގެންދިޔަ ސަރުކާރުގައި ކުންފުނިތައް ހިންގާފައިވަނީ، އިގްތިސާދަށް ގެއްލުންވާ ގޮތަށްކަމަށް ސައީދު ވިދާޅުވިއެވެ.

މީގެ މިސާލެއްގެ ގޮތުގައި މިނިސްޓަރު ސައީދު ނެންގެވީ ފެނަކައެވެ. މިނިސްޓަރު ވިދާޅުވީ އެމްޑީޕީ ވެރިކަމުގައި ފެނަކައަށް ނުކަތާވަރަށް މުއައްޒަފުން ވެއްދުމުގެ ނަތީޖާއަކީ އެތައް ގޮތަކުން ދައުލަތަށް ބޮޑެތި ގެއްލުންތަކެއް ލިބިގެންދިއުން ކަމަށެވެ. މިގޮތުން ފެނަކައިގެ ހަރަދުތައް ބޮޑުވެ، ކުންފުނީގެ ދަރަނި 3.2 ބިލިއަން ރުފިޔާއަށް އަރައިގެން ދިޔަކަމަށް ސައީދު ވަނީ ވިދާޅުވެފައެވެ. މީގެ އިތުރުން މަސްވެރިކަމުގެ ސިނާއަތުގައި ހަރަކާތްތެރިވާ ޒުވާނުން ފެނަކައަށް ވައްދައި ވަޒީފާ ދިނުމުގެ ނަތީޖާއަކީ މަހަށް ނިކުންނަ ދޯނިތައް ކަންބޮޑުވާވަރަކަށް މަދުވެގެންދިއުންކަމަށް ސައީދު ފާހަގަކުރެއްވިއެވެ. 

މިނިސްޓަރު ސައީދު ވިދާޅުވީ މި ސަރުކާރުން އިގްތިސާދު ހަމަޔަކަށް އެޅުވުމަށް އިހުލާސްތެރިކަމާއެކު ކުރި މަސައްކަތުގެ ނަތީޖާ މިއަދު ފެންނަން ފަށާފައިވާކަމަށެވެ. މިގޮތުން ހަރަދުތައް މުރާޖައާކުރުމަށް އެޅުނު ފިޔަވަޅުތަކާއެކު މިއަހަރުގެ މިހާތަނަށް 16 ބިލިއަން ރުފިޔާ ސަލާމަތްވުންކުރެވުން ކަމަށާއި، މީގެ ނަތީޖާއެއްގެ ގޮތުން ސޮވަރިން ފަނޑުގައި މިހާރު 60 މިލިއަނަށްވުރެ ގިނަ ޑޮލަރު ހުންނާނޭކަމަށް މިނިސްޓަރު ވިދާޅުވިއެވެ.

އެމްޑީޕީ ސަރުކާރު ވެރިކަމާ ހަވާލުވިއިރު ސޮވަރިން ފަންޑުގައި 200 ޑޮލަރު ހުންނާނޭކަމަށާއި، ނަމަވެސް އެ ސަރުކާރު ނިމިގެންދިޔައިރު ސޮވަރިން ފަންޑުގައި ހުރީ އެންމެ ދެ މިލިއަން ޑޮލަރުކަމަށްވެސް ރައީސް ޔާމިނު ސަރުކާރުގައި އިގްތިސާދީ ވުޒާރާ ބެލެހެއްޓެވި ސައީދު ވިދާޅުވިއެވެ.

ފައިދާނުވެ ދަރަނިތައް ބޮޑުވަމުންދާ ކުންފުނިތައް އުވާލައި ނުވަތަ ފައިދާވަމުންދާ ކުންފުންޏަކާ އެއްކޮށްލާނޭކަމަށް މިނިސްޓަރު މުހައްމަދު ސައީދު ވިދާޅުވިއިރު، ސަރުކާރުގެ ކުންފުނިތަކުގެ ތެރެއިން މިހާރު އެންމެބޮޑަށް ދަރަނިވެރިވެފައިވާ ކުންފުނިތަކަކީ، ފެނަކަ، ޕީއެސްއެމްގެ އިތުރުން އައިލެންޑް އޭވިއޭޝަނެވެ