ދެކުނު ކޮރެއާގެ ކުދިން އުފަންވުމުގެ ނިސްބަތް 8 އަހަރަށްފަހު މިއަހަރުގެ ދެވަނަ ކުއާޓަރގައި ފުރަތަމަ ފަހަރަށް އިތުރުވެއްޖެއެވެ. މިއީ އެޤައުމުގައި ކުދިން އުފަންވުމުގެ ނިސްބަތް ދަށްވަމުން އަންނަ ދަނޑިވަޅެއްގައި ފާހަގަކޮށްލެވޭ ކުރިއެރުމެކެވެ.

ސްޓެޓިސްޓިކްސް ކޮރެއާއިން އެއްކުރި މަޢުލޫމާތުތަކަށް ބަލާއިރު، 2024 ވަނަ އަހަރުގެ އޭޕްރިލް މަހުން ޖޫން މަހަށް 56،838 ކުދިން އުފަންވެފައިވެއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 1.2 އިންސައްތައިގެ އިތުރުވުމެކެވެ. މި މަޢުލޫމާތު ހާމަކޮށްފައިވަނީ ސޯލްގައި މަރުކަޒުވެފައިވާ ޔޮންހަޕް ނިއުސްއިންނެވެ.

އެގައުމުގައި މިއަހަރު ކުދިން އުފަންވުމުގެ ނިސްބަތް އިތުރުވެފައިވަނީ 2015 ވަނަ އަހަރުގެ ހަތަރުވަނަ ކުއާޓަރުގައި 0.6 އިންސައްތައިން އިތުރުވުމަށްފަހު ފުރަތަމަ ފަހަރަށެވެ.

މިއަހަރުގެ ޖޫން މަހު، ދެކުނު ކޮރެއާގެ ރައީސް ޔޫން ސުކް ޔޯލް ވަނީ އެޤައުމުގެ ކުދިން އުފަންވުމުގެ ދަށް ނިސްބަތާއި އުމުރުން ދުވަސްވީ މީހުންގެ އާބާދީ އިތުރުވަމުންދާތީ "ޑިމޮގްރަފިކް ނޭޝަނަލް އިމަޖެންސީ" އެއް އިޢުލާންކުރައްވާފައެވެ.

ރައީސް ޔޫން ވިދާޅުވެފައިވަނީ ދެކުނު ކޮރެއާގައި ކުދިން އުފަންވުމުގެ ނިސްބަތް ވަރަށް ބޮޑަށް ދަށްވެފައިވާ މައްސަލަ ހައްލުކުރުމަށް އެމަނިކުފާނުގެ ސަރުކާރުން ކުރެވެންހުރި ހުރިހާ މަސައްކަތެއް ކުރައްވާނެ ކަމަށެވެ.