ސިނަމާލެ ބްރިޖަކީ ރާއްޖެއާއި ޗައިނާ ދެމެދުގައި އޮތް ދެމެހެއްޓެނިވި ގުޅުމާއި، އެއްގައުމު އަނެއް ގައުމަށް ކުރާ އިތުބާރުގެ ނިޝާނެއް ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މިފަދައިން ވިދާޅުވީ، ޗައިނާ-މޯލްޑިވްސް ފްރެންޑްޝިޕް ބްރިޖްގެ 6 ވަނަ އަހަރީ ދުވަހާ ގުޅިގެން އެކްސްގައި މިއަދު ކުރެއްވި ފޯސްޓެއްގައެވެ.
އެގޮތުން ރައީސް މުޢިއްޒު ވިދާޅުވީ، 2018 ވަނަ އަހަރުގެ އޯގަސްޓް 30 ވަނަ ދުވަހު ހުޅުވުނު މި ބްރިޖަކީ ދިވެހިރާއްޖެއާއި ޗައިނާއާ ދެމެދު އޮތް ޒަމާންވީ ގުޅުމުގެ ނިޝާނެއް ކަމުގައެވެ.
މި ބްރިޖަކީ ހަމައެކަނި ރަށްތައް ގުޅުވައިދޭ އެއްޗެއް ނޫން. އެހެނެއް ކަމަކު މިއީ ދެ ޤައުމުގެ ދެމެދުގައި އޮތް ދެމެހެއްޓެނިވި ބައިވެރިކަމާއި އެއްގައުމު އަނެއް ގައުމަށް ކުރާ އިތުބާރުގެ ނިޝާނެއް. އަދި މި ބްރިޖަކީ ދެ ޤައުމުގެ ކުރިއެރުމާއި، އެއްބައިވަންތަކަމާއި، ފާގަތިކަމަށް ޓަކައި އެކުގައި މަސައްކަތްކުރުމުގެ ހެއްކެއް
ރައީސް ޑރ މުހައްމަދު މުޢިއްޒު
މިއާއެކު ރައީސް މުޢިއްޒު ވަނީ، އަންނަން އޮތް ޖީލުތަކަށްވެސް މި ބްރިޖަކީ ދެ ޤައުމުގެ ދެމެދުގައި އޮތް އެއްބާރުލުމުގެ ނިޝާނެއްގެ ގޮތުގައި ދެމިއޮންނާނެ ކަމުގެ އުންމީދު ފާޅުކުރައްވާފައިވެއެވެ.
2018 ވަނައަހަރުގެ އޮގަސްޓުމަހު 30 ވަނަ ދުވަހުގެރޭ ސިނަމާލެ ބްރިޖް ހުޅުވުމުގެ ރަސްމިއްޔާތު އޮތީ ހަވާ އަރުވައި ލޭޒަރ ލައިޓްގެ ކުލަގަދަ ހަރަކާތްތަކާއި އެކުއެވެ. މި ބުރިޖަކީ ރާއްޖޭގައި މިހާތަނަށް ހިންގި އުމްރާނީ ތަރަށްޤީގެ އެންމެ ބިޔަ އެއް މަޝްރޫއެވެ.
ސިނަމާލެ ބުރިޖުގެ މަސައްކަތަކީ ރައީސް ޔާމީންގެ ވެެރިކަމުގައި 210 މިލިއަން ޑޮލަރު ހަރަދުކޮށްގެން ހެދި ބުރިޖެކެވެ. އޭގެ ތެރެއިން 126 މިލިއަން ޑޮލަރަކި ޗައިނާ ސަރުކާރުގެ ހިލޭ އެހީއެވެ. އަދި ބުރިޖުގެ މަސައްކަތް ބެލެހެއްޓެވީ އޭރުގެ ހައުސިންގ މިނިސްޓަރ އަދި އަދުގެ ރައީސް ޑރ.މުއިއްޒުއެވެ.
Advertisement
This content is created and paid for by advertisers and does not involve Voice Journalists
