ކުރިއަށް އޮތްތަނުގައި، ރާއްޖެ-ޗައިނާ ގުޅުން އިތުރަށް ވަރުގަދަވެ ދެޤައުމުގެ ރައްޔިތުންނަށް އިތުރު މަންފާތައް ލިބިގެންދާނެ ކަމަށް ރާއްޖޭގައި ހުންނަ ޗައިނާގެ ސަފީރު ވަން ލީޝިން ވިދާޅުވެއްޖެއެވެ.

ސިނަމާލެ ބުރިޖު ހުޅުވުނުތާ 6 އަހަރު ފުރުމާ ގުޅިގެން، ރައީސުލްޖުމްހޫރިއްޔާ ޑރ މުހައްމަދު މުޢިއްޒު އެކްސްގައި ކުރެއްވި ޓުވީޓާ ގުޅިގެން ސަފީރު އެކްސްގައި ކުރެއްވި ޕޯސްޓެއްގައި ވިދާޅުވީ، ޗައިނާގެ ރައީސް ޝީ ޖިންޕިންގ އަދި ރާއްޖޭގެ ރައީސް ޑރ. މުޙައްމަދު މުޢިއްޒުގެ ސްޓްރެޓެޖިކް އިރުޝާދުގެ ދަށުން، ދެޤައުމުގެ ދެމެދުގައި އޮތް ގުޅުމާއި ގާތް ރަޙްމަތްތެރިކަން އިތުރަށް ވަރުގަދަވެގެންދާނެ ކަމަށެވެ.

އަދި މީގެ ސަބަބުން ދެޤައުމުގެ ރައްޔިތުންނަށް އިތުރު މަންފާތަކެއް ލިބިގެންދާނެ ކަމުގެ ޔަޤީންކަން ސަފީރު ވަނީ ދެއްވާފައެވެ.

Advertisement

މީގެ އިތުރުން ބްރިޖަށް 6 އަހަރު ވުމާއި ގުޅިގެން އިމާރާތް ކުރުމާއި ބިނާރާ ބެހޭ ވަޒީރު ކުރެއްވި ޕޯސްޓާއި ގުޅިގެން ސަފީރު ވަނީ، ވޭތުވެދިޔަ 6 އަހަރުގެ ތެރޭގައި، ޗައިނާ-މޯލްޑިވްސް ފްރެންޑްޝިޕް ބްރިޖުން ދިވެހިރާއްޖޭގެ އިޖްތިމާޢީ އަދި އިޤްތިޞާދީ ތަރައްޤީއަށް ވަރަށް ބޮޑު ކުރިއެރުމެއް ގެނެސްދީފައިވާކަން ފާހަގަކުރައްވާފައެވެ. އަދި މި ބްރިޖުގެ ސަބަބުން ރައްޔިތުންގެ ދިރިއުޅުމަށް ބޮޑެތި ބަދަލުތަކެއް އައިސްފައިވާ ކަމަށެވެ.

މިކަމުން ސާފުކޮށް ދައްކުވައިދެނީ ޗައިނާއާއެކު އޮންނަ ގުޅުމުން ރާއްޖޭގެ ރައްޔިތުންނަށް ލިބޭ ފައިދާތައް ކަމަށާ ކުރިއަށް އޮތް ތަނުގައި މި ގުޅުން އިތުރުން ވެގެންދާނެ ކަމަށް އުއްމީދުކުރައްވާ ކަމަށް ސަފީރު ވިދާޅުވިއެވެ.

2018 ވަނައަހަރުގެ އޮގަސްޓުމަހު 30 ވަނަ ދުވަހުގެރޭ ސިނަމާލެ ބްރިޖް ހުޅުވުމުގެ ރަސްމިއްޔާތު އޮތީ ހަވާ އަރުވައި ލޭޒަރ ލައިޓްގެ ކުލަގަދަ ހަރަކާތްތަކާއި އެކުއެވެ. ތިން އަހަރާއި 11 މަސްދުވަހުން ނިންމާލެވުނު މި ބުރިޖަކީ ރާއްޖޭގައި މިހާތަނަށް ހިންގި އުމްރާނީ ތަރަށްޤީގެ އެންމެ ބިޔަ އެއް މަޝްރޫއެވެ. 

ސިނަމާލެ ބުރިޖުގެ މަސައްކަތަކީ ރައީސް ޔާމީންގެ ވެެރިކަމުގައި 210 މިލިއަން ޑޮލަރު ހަރަދުކޮށްގެން ހެދި ބުރިޖެކެވެ. އޭގެ ތެރެއިން 126 މިލިއަން ޑޮލަރަކި ޗައިނާ ސަރުކާރުގެ ހިލޭ އެހީއެވެ.