ކުރީގެ ރައީސް ޔާމީން އަބްދުލް ޤައްޔޫމްގެ ވެރިކަމުގައި، އަދުގެ ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ހައުސިން މިނިސްޓަރ ކަމުގައި އަޅާފައިވާ ޗައިނާ-މޯލްޑިވްސް ފްރެންޑްޝިޕް ބްރިޖުގެ އެންމެ ލޭނެއްވެސް މަދު ނޫން ކަމަށް ރައީސް މުޢިއްޒު ރޭ ވިދާޅުވެއްޖެއެވެ. 

ސަންގު ޓީވީން ގެނެސްދިން ރައީސް މުޢިއްޒުގެ ޚާއްސަ ބަސްދީގަތުމެއްގައި އެމަނިކުފާނުވަނީ، ބްރިޖުން ލޭނެއް މަދުކޮށް ހަދާފައިވާ ކަމަށް ދެކެވެމުންދާ ވާހަކައިގެ ހަގީގަތް ވަރަށް ތަފްސީލް ކޮށް ވިދާޅުވެދެއްވާފައެވެ. 

އެގޮތުން ރައީސް ވިދާޅުވީ، ސިނަމާލެ ބުރިޖުގެ މަސައްކަތް އެމަނިކުފާނާއި ހަވާލުވި ހިސާބުންފެށިގެސް އެ މަސައްކަތް ކުރިއަށް ގެންދެވީ ވަރަށްވެސް ސަމާލުކަންދީގެން، ކުރެވެން އޮތް އެންމެ ރަނގަޅަށް ކުރުމުގެ އަޒުމުގައި ކަމަށެވެ.

އަދި ބްރިޖުގެ މަޝްރޫޢުގެ މަޝްވަރާތައް ރާއްޖޭގެ ސަރުކާރާއި ޗައިނާ ސަރުކާރާ ދެމެދު ކުރިން ކުރެވުނު ނަމަވެސް، ހައުސިންގ މިނިސްޓްރީއާއި އެ މަޝްރޫޢޫ ހަވާލު ކުރުމުގެ ކުރިން ހިނގައިދިޔަ އެއްވެސް ކަމެއް އެނގިވަޑައިނުގަންނަވާ ކަމަށް ވިދާޅުވިއެވެ. 

ރައީސް ވިދާޅުވިގޮތުގައި، ބްރިޖުގެ މަސައްކަތް ހައުސިން މިނިސްޓްރީގެ ދަށަށްގެނެވުނީ 2014 ވަނަ އަހަރުގެ އޮކްޓޯބަރު-ނޮވެމްބަރު ހިސާބު ކަމަށާ އެ ހަވާލު ކުރެވުނު އިރު، ލޭނު ހުރި އަދަދަށް އެއްވެސް ބަދަލެއް އައިސްފައެއް ނުވެއެވެ. 

"2014 ވަނަ އަހަރުގެ ސެޕްޓެމްބަރު-އޮކްޓޯބަރުގެ ކުރިއަށް އެއްވެސް ކަމެއް ހިނގާފައި އޮތް ކަމެއް އަޅުގަނޑަކަށް ނޭނގޭ. ގައިމު ވެސް ހައުސިން މިނިސްޓްރީ އާއި ކޮމިއުނިކޭޓް ކުރި އެއްވެސް ސިޓީއެއްގައި ނެތް އެއަށްވުރެ އިތުރަށް ލޭނު ހުރި ވާހަކައެއް ވެސް އަދި އިތުރު ކުރެހުމެއް ވެސް ނެތް" ހައުސިންގ މިނިސްޓްރީއާއި ހަވާލު ކުރެވުނުއިރު ހުރި އަދަދަށްވުރެ ލޭނު މަދު ނުވާ ކަމުގެ ޔަގީންކަން ދެއްވަމުން ރައީސް ވިދާޅުވިއެވެ.

ކަންމިހެން ހުރި ނަމަވެސް، ބްރިޖުގެ މަސައްކަތް ނިމެން ގާތްގަނޑަކަށް އެއްމަސް ނުވަތަ ދެމަސްވެފައި ވަނިކޮށް ރައީސް ޔާމީން ބްރިޖު ކޮމިޓިއާއި ބައްދަލުކޮށް، ސައިކަލަށް ވަކި ލޭނެއް އޮންނަން ޖެހޭނެ ކަމަށް ވިދާޅުވި ކަމަށެވެ. އެހެން ނަމަވެސް، މަސައްކަތް ކުރިއަށް ގޮސްފައި އޮތް ހިސާބުގެ ގޮތުން އެއީ އުނދަގޫ ކަމަކަށް ވާނެ ކަމަށް ވިދާޅުވި ކަމަށާ، އެހެން ވިދާޅުވުމުން ބައިސްކަލުދުއްވުމަށާއި ހިނގުމަށް ކަނޑައަޅާފައިވާ ލޭނު ސައިކަލު ދުއްވާ ގޮތަށް ހެދުމަށް ރައީސް ޔާމީން އެދިލެއްވި ކަމަށް ރައީސް ވިދާޅުވިއެވެ.

މީގެ އިތުރުން، ބާކީ އޮތް އެއްމަސް ދުވަހުގެ ތެރޭގައި، ޗައިނާ ސަފީރާއި، އެގައުމުގެ ސަރުކާރުގެ ފަރާތްތަކާއިވެސް އެކި ގޮތް ގޮތުން މަޝްވަރާ ކުރައްވައި އިތުރު ލޭނެއް ހެދޭތޯ މަސައްކަތް ކުރެއްވިކަމަށާ ނަމަވެސް މާބޮޑަށް ލަސްވެފައި ވުމުން އިތުރު ލޭނެއް ކަނޑަނޭޅުނު ކަމަށް ރައީސް ވިދާޅުވިއެވެ.

އެފަހުން، ބްރިޖު ހުޅުވަން ގާތްގަނޑަކަށް ހަފްތާއަކަށް ވެފައި ވަނިކޮށް ޕީޕީއެމްގެ އޮފީސް ސަކީނާމަންޒިލަށް، ޕާޓީގެ އަދި ސަރުކާރުގެ އިސްބޭފުޅުން ހިމެނޭހެން 40 އެއްހާ ބޭފުޅުން ގެންނަވައި، ބްރިޖުގައި ސައިކަލަށް ވަކި ލޭނެއް ނެތް ނަމަ ނުހުޅުވޭނެ ކަމަށް ޔާމީން އެންގި ކަމަށް ރައީސް މުޢިއްޒު ވިދާޅުވިއެވެ. އެގޮތަށް ޔާމީން ވިދާޅުވުމުން ވެސް އެކަން ނުވާނެ ކަމަށާ، އެކަންވޭތޯ މަސައްކަތް ކުރެއްވި ކަމަށް ކިޔައި ދެއްވި ކަމަށާއި އެވަރުންވެސް، ޔާމީން "ވިދާޅުވިީ ބްރިޖެއް ނުހުޅުވާނަމޭ، ނިމުނީއޭ. އެހެން ވިދާޅުވެފައި މީޓިން ނިންމަވާލެއްވީ،" ކަމަށް ރައީސް މުޢިއްޒު ވިދާޅުވިއެވެ.

ރައީސް މުޢިއްޒު ވިދާޅުވީ ރައީސް ޔާމީން އެހެން ވިދާޅުވުމުން ވަރަށް ބޮޑަށް އަސަރު ކުރެއްވި ކަމަށާ، ކުރި އަސަރުގެ ބޮޑުކަމުން ކީރިތި ކުރެއްވުނު ކަމަށެވެ. އެހެން ދިމާވީ ބްރިޖުގެ މަސައްކަތް ފުރިހަމައަށް ނިމި، އެކަމުގައި އެހާ ބޮޑަށް މަސައްކަތް ކުރެއްވުމުން ކަމަށް ވެސް ވިދާޅުވިއެވެ.

"އެ ވާހަކައިގެ ތެރެއިން އަޅުގަނޑަށް ވަރަށް ބޮޑު އަސަރެއް ކުރި. [އަބްދުއްރަހީމް] އެ ވިދާޅުވީ ރަނގަޅަށް ހަމަ. ރޮވުނު ހަމަ،" ރައީސް ވިދާޅުވި އެވެ.

ރައީސް މުޢިއްޒު ވިދާޅުވީ އެމަނިކުފާނު މަސައްކަތް ކުރެއްވީ ދީފައިވާ މުއްދަތު ތެރޭގައި ކޮލިޓީ ރަނގަޅުކޮށް، ބަޖެޓުގެ ތެެރެއިން ބްރިޖު ނިންމުމަށް ކަމަށެވެ. އަދި އެގޮތަށް މަޝްރޫއު ނިންމަން އޮތް މުއްދަތަށްވުރެ ދެ މަސް އަވަސްކޮށް މަޝްރޫއު ނިންމާލާފައިވާނެ ކަމަށް ވިދާޅުވި އެވެ.