ގަރާޖެއްގައި ގަވާއިދާ ޚިލާފަށް ބިދޭސީން ވިޔަފާރި ކުރަމުން އަންނަ ކަމަށް މީސްމީޑިއާގައި ހިއްސާކޮށްފައިވާ ކަންބޮޑުވުމާ ގުޅިގެން އެތަން އިމިގްރޭޝަންއިން ބަލައިފާސް ކޮށްފިއެވެ.
އެ ގޮތުން އެ ތަން ބަލައިފާސްކޮށް، އެ ތަނުގައިި ތިބި ބިދޭސީންގެ ތެރެއިން ގަވާއިދާ ޚިލާފަށް ތިބި ދެ މީހަކު އިމިގްރޭޝަނުގެ ބެލުމުގެ ދަށަށް ގެނެސްފައިވާ ކަމަށް އެ އިދާރާއިން ވަނީ ބުނެފައެވެ.
އެ ދެ ބިދޭސީއަކު އިމިގްރޭޝަނުން ހައްޔަރުކޮށްފައިވަނީ ހޮނިހިރު ދުވަހު ހިންގި އޮޕަރޭޝަންއެއްގައެވެ.
ގަވާއިދާ ޚިލާފަށް މަސައްކަތް ކުރާ ބިދޭސީން ދެނެގަތުމަށް ކުރިއަށްގެންދާ އޮޕަރޭޝަން، އަތޮޅުތަކަށް ފުޅާކުރެއްވުމަށް މަސައްކަތްކުރައްވަމުން ގެންދަވާކަމަށް އިމިގްރޭޝަން ކޮންޓްރޯލާރ ޝައްމާން ވަހީދު ވަނީ މީގެ ކުރިން ވިދާޅުވެފައެވެ.
ގަވާއިދާއި ޚިލާފަށް ހިންގާ އެތައް ވިޔަފާރިއެއް ބަންދުކޮށް، ނުގަވާއިދުން އުޅެމުންދިޔަ އެތައް ބިދޭސީން ހަމައެކަނި މިދިޔަ ހަފްތާގެ ތެރޭގައި ވެސް ޑީޕޯޓުކޮށްފައިވާއިރު، މި އޮޕަރޭޝަންގެ ދަށުން އިމިގްރޭޝަންގެ 200 އަށް ވުރެ ގިނަ އޮފިސަރުން އަންނަނީ ހަމައެކަނި މާލޭގެ އެކި ސަރަހައްދުތަކުގައި ހަރަކާތްތެރި ވަމުންނެވެ.
Advertisement
This content is created and paid for by advertisers and does not involve Voice Journalists
