މާލޭގައި އަންހެނަކު ރަހީނުކޮށްގެން އެ މައްސަލައިގައި ފުލުހުންގެ ބެލުމުގެ ދަށުގައި ދޫނިދޫ ޖަލުގައި ހުރި އާދަމް އަތުހަރަށް އައިޖީއެމްއެޗުގައި ފަރުވާ ދެމުން ދަނިކޮށް މިއަދު މަރުވެއްޖެއެވެ.

އިންދިރާގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގެ އިންޓެންސިވް ކެއަރ ޔުނިޓް (އައިސީޔޫ)ގައި ވެންޓިލޭޓަރުގައި ފަރުވާ ދެމުންދިޔަ އަތުހަރުގެ މަރާބެހޭގޮތުން ފުލުހުން މަޢުލޫމާތު ދެއްވި ގޮތުގައި އަތުހަރު މަރުވީ މިއަދު ހަވީރު 16:08 ގައެވެ. އަދި އޭނާގެ މަރުގެ ޚަބަރު އާއިލާއާ ހިއްސާކުރުމުގެ މަސައްކަތް ކުރިއަށްދާ ކަމަށް ފުލުހުން ވިދާޅުވިއެވެ.

އަތުހަރު ހޮސްޕިޓަލަށް ގެންދެވުނީ އޭނާ ދޫނިދޫ ކަސްޓޯޑިއަލްގައި ހުއްޓާ އަމިއްލައަށް މަރުވާން މަސައްކަތްކުރުމާ ގުޅިގެންނެވެ.

Advertisement

ފުލުހުން ވިދާޅުވި ގޮތުގައި އަތުހަރު ޖަލު ގޮޅީގައި ދަންޖެހިފައި ހުއްޓައި ފެނުމާއި އޭނާ އައިޖީއެމްއެޗަށް ގެންދިއުމާ ދޭތެރޭ ހޭދަވީ 23 މިނެޓެވެ.

އަތުހަރު ހައްޔަރުކުރެވުނީ އަންހެނަކު ރަހީނުކޮށްގެން ސައިކަލުގައި ފިލަން މަސައްކަތްކުރަނިކޮށް ފުލުހުން ހުއްޓުވުމުންނެވެ.

މި ހާދިސާއާ ގުޅިގެން އޭނާއަށް އޭޑީކޭ ހޮސްޕިޓަލުގައި ފަރުވާ ދިނުމަށްފަހު ދޫކޮށްލެވުނެވެ. ނަމަވެސް ފަހުން އޭނާ އަލުން ހައްޔަރުކޮށް ޝަރީއަތް ނިމެންދެން ބަންދުގައި ބެހެއްޓުމަށް ކްރިމިނަލް ކޯޓުން އަމުރުކުރިއެވެ.

މި މައްސަލަ ނެޝަނަލް އިންޓެގްރިޓީ ކޮމިޝަން (އެންއައިސީ) އާއި ހިއުމަން ރައިޓްސް ކޮމިޝަން (އެޗްއާރުސީއެމް)އިން ދަނީ ތަހުގީގުކުރަމުންނެވެ.