މިފަހުން އަތޮޅުގެ އެކި ރަށްތަކަށް ކުރި ވިއްސާރައާ ގުޅިގެން ލިބުނު ގެއްލުންތަކުގެ އަގު މިލިއަން ރުފިޔާއިން ގުނާލެވޭކަމަށް ޑިޒާސްޓަރ މެނޭޖްމަންޓް އޮތޯރިޓީން ހާމަކޮށްފިއެވެ.

ޑިޒާސްޓާއިން އެކްސްގައި ކުރި ޕޯސްޓެއްގައި ބުނެފައިވަނީ، މިދިޔަ އޮގަސްޓްމަހުގެ 8 ވަނަ ދުވަހުން ފެށިގެން ކުރަމުން އައި މޫސުމީ ވިއްސާރައިގަ އަތޮޅުތަކުގައި މީހުން ދިރިއުޅެމުންދާ 10 ރަށެއްގެ 89 ގެއަކަށް އެކިވަރުގެ ގެއްލުންތައް ލިބިފައިވާކަމަށެވެ. ގޭތަކަށް މި ލިބުނު ގެއްލުންތަކުގެ އަގު 1,084,169 ރުފިޔާއަށް އަރާކަމަށްވެސް ޑިޒާސްޓާއިން ބުނެއެވެ.

އޮގަސްޓްމަހުގެ 8 ވަނަ ދުވަހުން ފެށިގެން ރާއްޖެއަށް ކުރި ވިއްސާރައިގަ ހއ ގެ ރަށްތަކަށް ވަނީ ބޮޑެތި ގެއްލުންތަކެއް ލިބިފައެވެ. މިގޮތުން ހއ އަތޮޅުން އެންމެބޮޑު ގެއްލުމެއް ލިބުނު އެއް ރަށަކީ ހއ ކެލައެވެ. ވިއްސާރައިގަ ކެލާގެ ބައެއް ގެތަކަށް ފެންވަނުމުގެ އިތުރުން އެރަށު ސްކޫލުގެ ކޮމްޕިއުޓަރލެބަށް ފެންވަދެ ސިސްޓަމްތަކަށް ވަނީ ބޮޑެތި ގެއްލުންތަކެއް ލިބިފައެވެ. 

Advertisement

މި ވިއްސާރައިގަ ފެންބޮޑުވުމުގެ ހއ ހަތަރު ރަށެއްގެ 12 އާއިލާއެއް ދިރިއުޅެމުން އައިތަން ނޫން އެހެން ތަންތަނަށް ބަދަލުކޮށްފައިވާކަންވެސް ފާހަގަކޮށްލެވެއެވެ.

އަތޮޅުގެ ރަށްތަކުގެ އިތުރުން މިދިޔަ އޮގަސްޓްގައި ކުރި ވިއްސާރައިގަ މާލެސިޓީގައި ދިރިއުޅެމުންދާ ބައެއް ގެތަކާއި ފިހާރަތަކަށްވެސް ވަނީ ގެއްލުންތަކެއް ލިބިފައެވެ. މާލެއަށްކުރި ވިއްސާރައިގަ 23 އާއިލާއަކަށް ވަނީ ވަގުތީގޮތުން ބޯހިޔާވަހިކަން ފޯރުކޮށްދީފައެވެ.