ހަމާސްގެ ބަންދުގައި ތިބި އިސްރާއިލީ ގައިދީން، ހައްދުފަހަނައަޅާފައިވާ އިސްރާއިލުގެ ހަމަލާތަކުން ސަލާމަތް ކުރުމަށް ދިހަ ފަހަރު، އެމީހުން ތިބި ތަން ބަދަލުކުރި ކަމަށް ބުނެފިއެވެ.

ހަމާސްގެ އަސްކަރީ ވިންގް، އަލް-ޤައްސާމް ބްރިގޭޑްސްއިން ބުދަ ދުވަހުގެ ރޭ އާންމުކޮށްފައިވާ ވީޑިއޯއެއްގައި އިސްރާއިިލީ ގައިދީއެއް ކަމަށްވާ އަލެކްސެންޑަރ ލޮބަނޮވް ވަނީ އިސްރާއީލްގެ ހަމަލާ ތަކުގެ ސަބަބުން އޭނާއާއި އެހެން ގައިދީން ކުރިމަތިލާންޖެހުނު ދަތި ހާލަތު ބަޔާންކޮށްދީފައެވެ.

"އިސްރާއިލު ސިފައިންގެ ފަރާތުން ހުއްޓުމެއް ނެތި ބޮން އުކަނީ. އަޅުގަނޑުމެން ބިރުގަނެފައި ތިބެނީ. ނިދޭކަށް ވެސް ނޯވޭ. އަހަރެމެންގެ ފުރާނަ ސަލާމަތް ކުރުމަށްޓަކައި ގާތްގަނޑަކަށް ދިހަ ފަހަރު ހަމާސްގެ ފައިޓަރުން އެހެން ތަންތަނަށް ގެންގޮސްފައިވޭ” ލޮބަނޮވް ބުނެފައިވެއެވެ.

Advertisement

އިސްރާއިލުގެ ބޮޑުވަޒީރު ބެންޖަމިން ނެތަންޔާހޫއާ މުޚާތަބުކޮށް ލޮބަނޮވް ބުނީ އިސްރާއިލު ސަރުކާރުން ގައިދީންނަށް އެހީތެރިކަން ފޯރުކޮށްދިނުމުގައި ފެއިލްވެފައިވާ ކަމަށެވެ. އަދި ގައިދީން ދޫކޮށްލުމަށް ހަމާސްއާ އެކު މަޝްވަރާކުރުމުގެ ބަދަލުގައި އިސްރާއިލު ސަރުކާރުން ގައިދީން މަރާލަން މަސައްކަތް ކުރަމުންދާ ކަމަށް ވެސް ތުހުމަތުކުރިއެވެ.