ބޯއިންގ ކުންފުނީގެ ސްޓާލައިނަރ މަތިންދާބޯޓުން ދަތުރުކުރި އެސްޓްރޯނޯޓުން ނުލައި އެ އުޅަނދު އަނބުރާ ބިމަށް އައިސްފިއެވެ.

ހުކުރު ދުވަހުގެ ރޭގެ ދަންވަރު ނިއު މެކްސިކޯގެ ސަހަރާއަކަށް އެ ބޯޓް އަނބުރާ އައިސް ޖައްސާފައިވާއިރު، އެ މަތިންދާބޯޓު ބިމަށް އައިސްފައިވަނީ އަނބުރާ އައުމަށް ކަނޑައެޅިފައިވާ ތާރީޚަށްވުރެ މަސްތަކެއް ފަހުންނެވެ. އަދި އެ ބޯޓް އައީ ޖޫން މަހު އޭގެން ދަތުރުކުރި ދެ އެސްޓްރޯނޯޓުން ނުލައެވެ.

ނާސާ އިން ލައިވްކޮށް ދެއްކި މަންޒަރުތަކުން ދައްކާގޮތުގައި ސްޓާލައިނަރ އަނބުރާ އައިސް ޖެއްސުމުގެ މަރުޙަލާ ވަނީ އެއްވެސް މައްސަލައެއް ނެތި ކާމިޔާބުކަމާއެކު ނިންމާފައެވެ. ގާތްގަނޑަކަށް ގަޑިއަކު 27,400 ކިލޯމީޓަރުގެ ސްޕީޑުގައި ސްޓާލައިނަރ ވަނީ ބިމުގެ ޖައްވުތެރެއަށް ވަދެފައެވެ. އޭގެ 45 މިނެޓު ފަހުން، ބޯޓުގެ ސްޕީޑު މަޑުކުރުމަށް ޕެރަޝޫޓުތަކެއް ދޫކޮށް، ބިމަށް ޖެހުމުގެ ކުރިން އެއަރބޭގުތަކެއް ދޫކޮށްލުމަށްފަހު ވައިޓް ސޭންޑްސް ސްޕޭސް ހާބަރގައި ވަނީ ޖައްސާފައެވެ.

މި ދަތުރުގައި ބައިވެރިވި ނާސާގެ އެސްޓްރޯނޯޓުން ކަމަށްވާ ސުނީ ވިލިއަމްސް އަދި ބުޗް ވިލްމޯރ އަނބުރާ އައުމަށް ހަމަޖެހިފައިވަނީ ޖޫން މަހުގައެވެ. ނަމަވެސް ބޯޓަށް ދިމާވި ތުރަސްޓަރގެ މައްސަލަތަކާއި ހީލިއަމް ލީކުވުމުގެ މައްސަލަތަކާ ގުޅިގެން، އެ ދެ އެސްޓްރޯނޯޓުން މިހާރު ތިބޭނީ އިންޓަރނޭޝަނަލް ސްޕޭސް ސްޓޭޝަނުގައެވެ. މި ދެ އެސްޓްރޯނޯޓުން އަނބުރާ އަންނާނީ 2025 ވަނަ އަހަރުގެ ފެބްރުއަރީ މަހު ސްޕޭސްއެކްސްގެ ޑްރެގަން މަތިންދާބޯޓުގައެވެ.

މި ދަތުރުގައި ދިމާވި އެކިއެކި މައްސަލަތަކާ ގުޅިގެން، ނާސާއިން ނިންމީ އެ ދެ އެސްޓްރޯނޯޓުން ސްޓާލައިނަރގައި އަނބުރާ ގެނައުމަކީ ބޮޑު ރިސްކެއް އޮތް ކަމެއްކަމަށެވެ. އެހެންކަމުން، މި ފަހަރު ސްޓާލައިނަރ އައިސް ޖައްސާފައިވަނީ އެ ދެ އެސްޓްރޯނޯޓުންގެ ހުސް ގޮނޑިތަކާއި، ނޫކުލައިގެ ސްޕޭސް ހެދުންތަކާއި، ސްޕޭސް ސްޓޭޝަނުގެ ބައެއް ބޭނުން ނުކުރާ ސާމާނު ހިމަނައިގެންނެވެ.

ބޯއިންގގެ ފުރަތަމަ އެސްޓްރޯނޯޓުންގެ ދަތުރާ ހަމައަށް އައުމުގައި ވަނީ ގިނަ ލަސްވުންތަކާއި ދަތިތަކެއް ކުރިމަތިވެފައެވެ. 2019 ވަނަ އަހަރު އެސްޓްރޯނޯޓުން ނުލައި ކުރި ފުރަތަމަ ޓެސްޓް ފްލައިޓްގައި ދިމާވި މައްސަލަތަކާ ގުޅިގެން، އެ ދަތުރު ތަކުރާރުކުރަން ޖެހުނެވެ. 2022 ވަނަ އަހަރު ކުރި ދަތުރުގައި އިތުރު މައްސަލަތަކެއް ފެނި، އޭގެ މަރާމާތުގެ ޚަރަދު 1.5 ބިލިއަން ޑޮލަރަށްވުރެ އިތުރުވިއެވެ.