އިންޑިއާއިން 300 މެޓުރިކް ޓަނުގެ ކާގޯ ހިފައިގެން ބޯޓެއް އައްޑޫ ސިޓީގެ ހިތަދޫ ރީޖަނަލް ޕޯޓަށް ދަތުރުކުރަމުންދާ ކަމަށް  މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ މުހައްމަދު ވަޖީހު އިބްރާހިމް ވިދާޅުވެއްޖެއެވެ.

ވަޖީހު މިފަދައިން ވިދާޅުވީ ފޭސްބުކްގައި ކުރެއްވި ޕޯސްޓެއްގައެވެ.

މިގޮތުން ވަޖީހް ވިދާޅުވީ، އައްޑޫ ސިޓީ އަށް ގެންދިއުމަށްޓަކައި އިންޑިޔާގެ ޓިޓުކޮރިން އިން 300 ވަރަކަށް މެޓުރިކް ޓަނުގެ ކާގޯ ލޯޑު ކޮށްގެން "އެމްވީ ނިއުމަތު" ހިތަދޫ ރީޖެނަލް ޕޯޓަށް ދަތުރު ކުރަމުންދާ ކަމަށާއި، ޝެޑިއުލްގައި ވާގޮތުން މިބޯޓަަށް ހިތަދޫ ޕޯޓަަށް ބަދަރު ކުރެވޭނީ މިމަހުގެ 11 ވާ ބުދަ ދުވަހުކަމަށެވެ.

Advertisement

އެމްވީ ނިއުމަތު-- ފޮޓޯ: ފޭސްބުކް/ މުހައްމަދު ވަޖީހު

މިބޯޓުންގެންދާ މުދާ ތަކުގެ ތެރޭގައި ތަރުކާރީ އާއި މޭވާ އަދި ޖެނެރަލް ކާގޯ ގެ ބާވަތްތައް ހިމެނޭކަމަށް ވަޖީހު ވިދާޅުވިއެވެ،

މީގެ ކުރިން، މިދިޔަ ޖޫން މަހު ވަޖީހު ވަނީ  އައްޑޫ ސިޓީ ގެ ރައްޔިތުންނަށް ބޭނުންވާ ޕެރިޝަބުލް ކާގޯ ދާއިމީ ގޮތެއްގައި ގެންދެވޭނެ ގޮތް ހަމަ ޖެއްސުމަށް، އެމްޕީއެލް އާއި ހިތަދޫ ރީޖެނަލް ޕޯޓުން ކުރި މަސައްކަތް ކާމިޔާބުވެ، އަންނަ ޖުލައި މަހުގެ 1 ވަނަ ދުވަހުން ފެށިގެން އައްޑޫ ސިޓީގެ ރައްޔިތުންނަށް މި ޚިދުމަތް ލިބެން ފަށާނެ ކަމަށް ވިދާޅުވެފައެވެ.

މިގޮތުން، މި ޚިދުމަތް ދިނުމަށް ހަމަޖެހިފައި ވަނީ، ރާއްޖެ އަށް އެންމެ ގިނައިން ޕެރިޝަބުލް ކާގޯ ގެންނަ އިންޑިޔާގެ ފައިނެސް ގުރޫޕް މެދުވެރިކޮށްކަން ފާހަގަކުރައްވާ ވަޖީހު ވިދާޅުވީ، ދަތުރުތައް ރާވާފައިވަނީ ކޮންމެ 10 ނުވަތަ 15 ދުވަހުގެ ތެރޭގައި ކާގޯ ބޯޓެއް އައްޑޫ ސިޓީ އަށް ދާގޮތަށް ކަމަށެވެ.

އައްޑޫ ސިޓީއަށް މި ޚިދުމަތް ދެވޭނީ ދަގަނޑު ބޯޓު ފަހަރުން ކަމަށްވާތީ، އަހަރުގެ ހުރިހާ ދުވަސް ތަކެއްގައިވެސް މެދުކެނޑުމެއްނެތި، މި ޚިދުމަތް ލިބެމުން ދާނެކަމަށާއި، އާއްމު ގޮތެއްގައި މި ބޯޓު ފަހަރުން ގެންދާނީ، ބިސް، ފިޔާ، އަލުވީގެ އިތުރުން ތަރުކާރީ ގެ އެހެން ބާވަތް ތަކާއި، މޭވާގެ ބާވަތްތައް ކަމަށް ވަޖީހު ވިދާޅުވިއެވެ.

އެހެންނަމަވެސް، މިތަކެއްޗާއިއެކު، އައްޑޫ ސިޓީ ގެ ރައްޔިތުން އިންޑިއާ އިން ގެންނަން ބޭނުންވާ ކާބޯތަކެތީގެ އެހެނިހެން ބާވަތްތަކާއި، ޖެނެރަލް ކާގޯ ގެ ބާވަތްތައް ވެސް މި ޚިދުމަތުގެ ތެރެއިން ގެނައުމުގެ އިންތިޒާމް ހަމަޖެހިފައިވާ ކަމަށް ވަޖީހު ވިދާޅުވިއެވެ.