ރާއްޖޭގައި ބޭނުންކުރާ ފައިސާ ކާޑުތަކުގެ ތެރެއިން ކްރެޑިޓް ކާޑަކީ ބޭންކުތަކުން ހިދުމަތް ހޯދާ ކަސްޓަމަރުން މިހާރު ތިންވަނައަށް އެންމެގިނައިން ބޭނުންކުރާ ކާޑެވެ. މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީން ނެރެފައިވާ "ޕޭމަންޓް ޕްލެޓިން" ރިޕޯޓަށް ބަލާއިރު، މިދިޔަ އަހަރު ތިން ވަނައަށް އެންމެގިނަ މީހުން ފައިސާ ދެއްކުމުގައި ބޭނުންކޮށްފައިވަނީ ކްރެޑިޓްކާޑުގެ ހިދުމަތެވެ.

މިދިޔަ އަހަރު ނިމުނުއިރު ބޭންކުތަކުން ކަސްޓަމަރުންނަށް 55،000 ހާހަށްވުރެ ގިނަ ކްރެޑިޓް ކާޑު ވަނީ ދޫކޮށްފައެވެ. އެމްއެމްއޭގެ ޕޭމަންޓް ބްލެޓިން ރިޕޯޓްގައިވާގޮތުން މިދިޔަ އަހަރު ކްރެޑިޓް ކާޑު މެދުވެރިކޮށް ކަސްޓަމަރުން  2.6 މިލިއަން ޓްރާންސްސެކްޝަން ވަނީ ކޮށްފައެވެ. މި ޓްރާންސެކްޝަންތަކުން ކުރި ވިޔަފާރީގެ މުއާމަލާތްތައް އުޅެނީ 1.25 ބިލިއަން ރުފިޔާގައެވެ.

އަހަރުން އަހަރަށް ބަލާނަމަ، މިދިޔަ އަހަރު ކްރެޑިޓް ކާޑު ބޭނުންކޮށްގެން ހެދި ޓްރާންސެކްޝަން %30 އިތުރުވެފައިވާއިރު، ކުރެވުނު ފައިސާގެ މުއާމަލާތްތައް ވަނީ %23 އިތުރުވެފައެވެ.

Advertisement

ކްރެޑިޓްކާޑު ބޭނުންކޮށްގެން މިދިޔަ އަހަރު އެންމެގިނައިން މުއާމަލާތްކޮށްފައިވަނީ ޕީއޯއެސް މެޝިންތަކުންނެވެ. ކްރެޑިޓް ކާޑު ބޭނންކޮށްގެން ޕީއޯއެސް ޓާމިނަލްތަކުން 690 މިލިއަނަށްވުރެ ގިނަ ރުފިޔާގެ މުއާމަލާތްކޮށްފައިވާއިރު، މިއީ ކުރެޑިޓް ކާޑުން މިދިޔަ އަހަރު ކުރި މުއާމަލާތުގެ %55 އެވެ. ކްރެޑިޓް ކާޑު ބޭނުންކޮށްގެން މިދިޔަ އަހަރު އޮންލައިނުކޮށް ކުރި މުއާމަލާތުގެ އަގު އުޅެނީ 561.9 މިލިއަން ރުފިޔާގައެވެ.

ކްރެޑިޓްކާޑުން މިދިޔަ އަހަރު ކުރި ވިޔަފާރި 1.25 ބިލިއަން ރުފިޔާއަށް އަރާއިރު، ކްރެޑިޓް ކާޑުގެ ހިދުމަތަކީ ބޭންކްތަކަށް އެންމެބޮޑު އާމްދަނީއެއް ލިބޭ އެއް ދާއިރާކަން ފާހަގަކޮށްލެވެއެވެ.

 ކްރެޑިޓް ކާޑު ބޭނުންކުރާ ކަސްޓަމަރުންގެ އަދަދު ދުވަހެއް ދުވަހަކަށް އިތުރުވަމުން އަންނައިރު، އާމްދަނީގެ 4،000 ރުފިޔާ ލިބޭ ފަރާތްތަކަށްވެސް މިހާރު ކްރެޑިޓް ކާޑު ހެއްދެއެވެ. ކްރެޑިޓް ކާޑު ބޭނުންކުރާ މީހުން އިތުރުވަމުން އަންނައިރު، ކްރެޑިޓް ކާޑުބޭނުންކޮށްފައި ފައިސާ ނުދައްކާ މައްސަލަތައްވެސް ނިސްބަތުން ވަރަށްބޮޑަށް އިތުރުވަމުން އަންނަކަން ސިވިލްކޯޓުގެ ޝަރީއަތްތަކަށް ބަލާލުމުން އެނގެއެވެ. ޤައުމީ ބޭންކް އޮފް މޯލްޑިވްސްއިން ސިވިލްކޯޓަށް ވައްދާ ގިނަ މައްސަލަތަކަށް ބަލާއިރު އެންމެ ގިނައިން ހުށަހަޅާ އެއް މައްސަލައަކީ، ކްރެޑިޓް ކާޑު ބޭނުންކޮށް އެއަށް ދައްކަންޖެހޭ ފައިސާ ނުދައްކައިގެން ފައިސާ ހޯދުމަށް ހުށަހަޅާ މައްސަލަކަން ސިވިލްޓޯޓުގެ ގަޒިއްޔާތަކަށް ބަލާލުމުން ފާހަގަކުރެވެއެވެ.