ޓްރެފިކް ސްޓޮޕެއްގެ ތެރެއިން އެއްލާލި ސިނގިރޭޓް ޕެކެޓެއްގެ ތެރެއިން ޑައިމޯފިން ނުވަތަ ހެރޮއިން ފެނުމާ ގުޅިގެން ކްރިމިނަލް ކޯޓުން މީހަކު އުމުރަށް ޖަލަށްލުމަށް ހުކުމްކޮށްފި އެވެ.

މި ދައުވާ ކޮށއފައިވަނީ ކ. މާލެ، މއ.ސިޓީ ވިލާގެ ހަސަން ސިފާހު އަށްށެވެ. މި މައްސަލައާ ގުޅިގެން ޑައިމޯފިން ޓްރެފިކް ކުރުމުގެ ކުށުގެ ދައުވާ ވަނީ އޭނާއަށް އުފުލާފައެވެ.

މި ހާދިސާ ހިނގާފައިވަނީ 2022 ވަނަ އަހަރުގެ ފެބްރުއަރީ މަހުގެ 7 ވަނަ ދުވަހުއެވެ.

އެރޭ މާލޭ ވޯޓާ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ)ގެ އިމާރާތް ކައިރީގައި ދުއްވާފައި ދިޔަ ސައިކަލަކީ ލޯގަނޑު ނެތި ދުއްވާފައި ދިޔަ ސައިކަލެކެވެ. ފުލުހުން ހެކިބަސް ދެމުން ބުނީ ސައިކަލުގެ ފަހަތުގައި އިން ސިފާހު އޭނާގެ އަތުގައި އޮތް ސިނގިރޭޓް ޕެކެޓެއް އެއްލާލުމަށްފަހު ފިލާފައިވާ ކަމަށެވެ.

އޭނާ އެއްލާލި ސިނގިރޭޓް ޕެކެޓުގެ ތެރެއިން 9.3124 ގްރާމްގެ ޑައިމޯފިން ފެނިފައިވާ ކަމަށް ފުލުހުން ވަނީ ވިދާޅުވެފައެވެ. ނަމަވެސް ސިނގިރޭޓް ޕެކާ އެއްވެސް ގުޅުމެއް ނެތް ކަމަށް ބުނެ ސިފާހު ވަނީ އޭނާގެ މައްޗަށް އުފުލާފައިވާ ދައުވާއަށް އިންކާރުކޮށްފަ އެވެ.

އުކާލާފައިވާ ޕެކް ފުލުހުން ބަލައިފާސްކުރިއިރު މަސްތުވާތަކެތިކަމަށް ޝައްކުކުރެވޭ އެއްޗެއްހުރި 95 ޕެކެޓް ޑައިމޯފިން ފެނިފައިވާ ކަމަށާއި އޭގެ ބަރުދަނުގައި 9.3124 ގްރާމް ހުރި ކަމަށް ފުލުހުން ބުނެއެވެ.
މިދިޔަ އަންގާރަ ދުވަހު ކްރިމިނަލް ކޯޓުން ވަނީ ސިފާގެ މައްޗަށް ޑައިމޯފިން ޓްރެފިކް ކުރުމުގެ ކުށް ސާބިތުވެ 25 އަހަރުގެ ޖަލު ހުކުމެއް އިއްވާފަ އެވެ. އަދި އެއް ލައްކަ ރުފިޔާއިން ޖޫރިމަނާކޮށް 12 މަސް ދުވަހުގެ ތެރޭގައި ފައިސާ ދެއްކުމަށް ވަނީ އަންގާފައެވެ.
އޭނާ މިހާރު ވެސް ބަންދުގައި ހޭދަކޮށްފައިވާ މުއްދަތަށް ބަލާއިރު، އޭނާ އަށް ބާކީ އޮތީ 24 އަހަރާއި 11 މަހެވެ.