ގިނަ އަދަދެއްގެ ޑޮލަރުތަކަކާއެކު ހައްޔަރުކުރި އިންޑިއާ މީހާގެ ބަންދުގެ މުއްދަތު 10 ދުވަހަށް އިތުރުކޮށްފި އެވެ.
ރަގޫބްގެ ބަންދަށް ފުރަތަމަ 5 ދުވަސް ޖަހާފައިވާއިރު، އެ މުއްދަތު ހަމަވުމުން، ބަންދުގެ މުއްދަތު އިތުރުކޮށްފައިވަނީ އިއްޔެ އެވެ.
އެގޮތުން، ކްރިމިނަލް ކޯޓުގެ އަމުރުގައިވާ ގޮތުން މިދިޔަ ހަފްތާގެ ބުދަ ދުވަހު މަނީ ލޯންޑަރިންގެ ތުހުމަތުގައި ހައްޔަރުކުރި ރަގޫބް ނިސްތާރު ހަލީމް ރަހުމާން (27އ) ގެ އަތުން ދެ ޕާސްޕޯޓުވެސް ވަނީ ފެނިފައެވެ.
ކޯޓު އަމުރުގައިވާ ގޮތުން، ބަންދު އިތުރުކޮށްފައިވަނީ އޭނާގެ ޓްރެވަލް ހިސްޓަރީއަށް ބަލާއިރު ޝައްކުވާ ފަދަ އަމަލުތަކެއް ހުރުމުންނެވެ.
ރަގޫބަށް ތުހުމަތުކުރެވޭ މަނީ ލޯންޑާކުރުމުގެ ތުހުމަތާ ގުޅޭ އެއްވެސް ހެއްކެއް ފުލުހުންނަށް ހުށަހެޅިފައި ނުވާކަމަށް ކޯޓު އަމުރުގައި ބުނެފައިވާއިރު، އޭނާގެ ވަކީލު ކޯޓުގައި ބުނީ އެ ފައިސާ ލިބުނު ގޮތް ފޯނުގައި ހުންނާނެ ކަމަށާއި ބަޔާން ނަގާއިރު އެކަން ހާމަކޮށްދޭނެ ކަމަށެވެ.
ކޯޓު އަމުރުގައި އިތުރަށް ބުނީ، ރަގޫބްގެ މައްޗަށް ތުހުމަތުކުރެވެނީ ޖިނާއީ ބޮޑު މައްސަލައަކަށްވުމުގެ އިތުރުން އޭނާއަށް އެ ފައިސާ ލިބިފައިވާ ގޮތް ފުލުހުންނަށް ސާފު ކޮށްދެވިފައިނުވާ ކަމަށެވެ.
Advertisement
This content is created and paid for by advertisers and does not involve Voice Journalists
