ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުމާލޭ ދެވަނަ ފިޔަވަހިން ދިރިއުޅުމުގެ ބޭނުމަށް އިތުރު ބިން ބީލަމުގެ އުސޫލުން ވިއްކުމަށް ހުޅުވާލައިފިއެވެ.

އެޗްޑީސީ އިން ނެރުނު ބަޔާނުގައި ވަނީ މި ފަހަރު ވިއްކުމަށް ހުޅުވާލާފައިވަނީ ބީޗް ފްރަންޓާއި ބީޗް ސައިޑުން ބިންތަކެއްކަމަށެވެ. އަދި ބީޗް ފްރަންޓުން ވިއްކާ ބިންތަކުގެ ބޮޑުމިނަކީ 1،095.98 އަކަފޫޓާއި 3،252.00 އަކަފޫޓާ ދެމެދުގެ ބިންތަކެވެ. އަދި ބީޗް ސައިޑުން ވިއްކާ ބިންތަކުގެ ބޮޑުމިނަކީ 1،440.80 އަކަފޫޓާއި 3،380.00 އަކަފޫޓާ ދެމެދުގެ ބިންތަކެއްކަމަށްވެސް ވަނީ ބިނެފައެވެ.

މި ބިންތަކަށް ކުރިމަތިލެވޭނީ ހަމައެކަނި ދިވެހިންނަށް ކަމަށާއީ އުމުރުން 18 އަހަރުވެފައިވާ ކޮންމެ ދިވެހި ރައްޔިތަކަށް ވެސް ބީލަން ހުށަހެޅޭނެއެވެ. ކުންފުނިތަކަށް ވެސް ބީލަން ހުށަހެޅޭނެ ކަމަށްވެސް ވަނީ ބުނެފައެވެ. ނަމަވެސް، އެ ކުންފުންޏަކީ ރާއްޖޭގައި ރަޖިސްޓްރީކޮށްފައިވާ 100% ދިވެހިންގެ ހިއްސާ އޮންނަ ކުންފުންޏެއް ކަމުގައިވާންޖެހޭނެއެވެ.

ބިން ވިއްކުމުގެ މަސައްކަތް ކުރިއަށްދާނީ ދެ މަރުހަލާއަކަށް ބަހާލައިގެންކަަމށްވެސް ވަނީ ބުނެފައެވެ. ފުރަތަމަ މަރުހަލާގައި އެކްސްޕްރެޝަން އޮފް އިންޓަރެސްޓް (އީއޯއައި) ހުށަހަޅަންޖެހޭނެއެވެ. އަދި ދެވަނަ މަރުހަލާގައި، އެއް ބިމަކަށް އެއް ފަރާތަށްވުރެ ގިނަ ފަރާތުން އީއޯއައި ހުށަހަޅާފައިވާނަމަ ބިޑް ކުރެވޭނެއެވެ.
ބީޗް ފްރަންޓް ބިންތަކުގެ ބީލަން ފެށޭ އަގަކީ އަކަފޫޓަކަށް 4،500 ރުފިޔާއެވެ. އަދި ބީޗް ސައިޑުން ވިއްކާ ބިންތަކުގެ ބީލަން ފެށޭ އަގަކީ އަކަފޫޓަކަށް 4،000 ރުފިޔާއެވެ. ކޮންމެ ފަރާތަކަށްވެސް އެއް ބިމަށްވުރެ ގިނަ ބިމަށް އީއޯއައި ހުށަހެޅިދާނެކަމަށްވެސް އެޗްޑީސީ އިން ވަނީ ބުނެފައެވެ.

އެޗްޑީސީ އިން ބުނީ، ވިއްކުމަށް ހުޅުވާލެވިފައިވާ ބިންތަކުގެ މަޢުލޫމާތު ކޯޕަރޭޝަންގެ އޮންލައިން ބިޑް ޕޯޓަލް މެދުވެރިކޮށް ލިބެން ހުންނާނެ ކަމަށެވެ.                    

އަދި އިތުރު މަޢުލޫމާތު ކޯޕަރޭޝަންގެ ހޮޓްލައިން ނަންބަރު 1516 އަށް ގުޅުމުން ލިބޭނެކަމަށްވެސް ވަނީ ބުނެފައެވެ.