"މާލެ" ގެ ބަދަލުގައި "ކ.މާލެ" ލިޔުމަކީ އަދި ކިޔުމަކީވެސް ޤާނޫނުއަސާސީއާ ޚިލާފަށް ކުރާ ކަމެއްކަމަށް ސިޓީ ތަކާއި އިދާރީ ދާއިރާތައް ހިންގުމާބެހޭ ވަޒީރު އާދަމް ޝަރީފް ވިދާޅުވެއްޖެއެވެ.

ވަޒީރު އެކްސްގައި ކުރެއްވި ޕޯސްޓެއްގައި ވިދާޅުވި ގޮތުގައި، ޤާނޫނުއަސާސީގެ 14 ވަނަ މާއްދާގައި ބަޔާންކޮށްފައިވަނީ ދިވެހިރާއްޖޭގެ ވެރިކަންކުރާ ރަށަކީ "މާލެ" ކަމަށާ ޤާނޫނުއަސާސީގައި ވެރިކަންކުރާ ރަށަކީ "ކ.މާލެ" ކަމަކަށް ބަޔާންކޮށްފައެއް ނުވެއެވެ.

އަދި، ސަރުކާރުގެ ގިނަ ރަސްމީ ލިޔުންތަކުގައިވެސް "ކ.މާލެ" ލިޔެފައެއް ނުވާކަމަށް ވަޒީރު ފާހަގަކުރެއްވިއެވެ.

"ކ. އަތޮޅުގައި އޮތް ނަމަވެސް، މާލެއަކީ ރާއްޖޭގެ ވެރިކަންކުރާ ރަށަށް ވާތީވެ، މާލެ ލިޔާއިރު ކުރިއަށް 'ކ' އިތުރުކޮށް، 'ކ.މާލެ' ލިޔެއެއް ނޫޅެވޭނެ," ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ "ކ.މާލެ" ލިޔުމަކީ އަދި ކިޔުމަކީވެސް ޤާނޫނުއަސާސީގައައި އޮންނަ ގޮތާ ޚިލާފަށް ކުރާ ކަމެއްކަމަށެވެ.

"މިހާރަކަށް އައިސް 'ކ.މާލެ' ލިޔުމާއި ކިޔުން އަންނަނީ އިތުރުވަމުންނެވެ. މިއީ ކުޑަކަމެއް ނޫނެވެ. ރަނގަޅު ކުރަންޖެހޭ ކަމެކެވެ," ވަޒީރު ވިދާޅުވިއެވެ.