ޖަމިއްޔާތަކުން ނަމާދަށް އަހުލުވެރި ކުރުމަށް ކުރިއަށް ގެންދާ ޕްރޮގްރާމްތަކަށް އިސްލާމިކް މިނިސްޓްރީން މާލީ އެހީ ފޯރުކޮށްދެއްވާނެ ކަމުގެ ޔަގީންކަން އިސްލާމިކް މިނިސްޓްރ ޑރ މުހައްމަދު ޝަހީމް ޢަލީ ސަޢީދު ދެއްވައިފިއެވެ.
ޝަހީމް މިހެން ވިދާޅުވީ ރާއްޖޭގެ އެކިކަންކޮޅުތަކުގައި ހަރަކާތްތެރިވާ ދީނީ އިޖުތިމާޢީ ޖަމްޢިއްޔާތަކާއެކު، ޖަމްޢިއްޔާތަކުގެ އަހަރީ ބައްދަލުވުން ފެއްޓެވުމަށް މިއަދު ހެނދުނު އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވި ރަސްމިއްޔާތު ޝަރަފްވެރިކޮށްދެއްވާ ވާހަކަފުޅު ދައްކަވަމުންނެވެ.
އެގޮތުން ޝަހީމް ވިދާޅުވީ، ރާއްޖެ އިސްލާމްވިތާ 900 އަހަރާއި ގާތްވަމުންދާއިރު، ރާއްޖެ އިސްލާމްވި އިރާއި ބަލާއިރު، މިއަދު ރާއއޖެއަށް ފިކުރީ ގޮތުންނާއި އިޖުތިމާޢީ ގޮތުން ކުރިމަތުވެފައިވާ ގޮންޖެހުންތަކަކީ މީގެ ކުރިން ކުރިމަތިވެފައި ނުވާ ފަދަ ބޮޑެތި ގޮންޖެހުން ތަކެއް ކަމަށެވެ.
އެ ގޮންޖެހުންތަކުގެ ކުރިމަތީގައި ރާއްޖޭގެ އިސްލާމީ ސައްހަ އަގީދާ ހިމާޔަތްކޮށް ރާއްޖޭގެ ދީނީ އެއްބައިވަންތަކަން ނަގަހައްޓައި، ރާއްޖޭގެ އިސްލާމީ ޝަޚްސިއްޔަތު ހިމާޔަތް ކުރުމަށް ކުރެވޭ މަސައްކަތް ތަކަކީ ހަމައެކަނި ސަރުކާރުން ކޮށްގެން ފަރު ޖެހޭނެ ކަންކަމެއް ނޫން. މިކަންކަން ފުރިހަމައަށް ކުރެވޭނީ އިސްލާމީ އިޖްތިމާއީ މަސައްކަތްކުރާ ޖަމިއްޔާ ތަކާއި، ދީނީ ދަޢުވަތުގައި މަސައްކަތްކުރާ ޢިލްމުވެރިންނާއި، އިސްލާމީ ކަންތައްތަކާ ބެހޭ ވުޒާރާއާއި އެހެން މުވައްސަސާތައް ގުޅިގެން ވަރުގަދަ މަސައްކަތް ތަކެއް ކޮށްގެން
އިސްލާމިކް މިނިސްޓްރ ޑރ މުހައްމަދު ޝަހީމް ޢަލީ ސަޢީދު
ޝަހީމް ވިދާޅުވީ، އަދުގެ ސަރުކާރަކީ، އިސްލާމް ދީނުގެ ކަންތައް ތަކަށް ހުރުމަތްތެރިކޮށް ހިތައި، އިސްލާމްދީނާއި ގުޅުންހުރި ކަންތައްތައް ނެގެހެއްޓެމަށް މުހިންމު މަސައްކަތްތަކެއް ކުރާ ސަރުކާރެއް ކަމަށެވެ.
އަދި އިސްލާމް ދީން ފެތުރުމަށް ކުރާ މަސައްކަތް ތަކަށް އެހީތެރިކަން ފޯރުކޮށްދެއްވުމަކީ ރައީސް މުޢިއްޒުވެ ވަރަށްބޮޑު އަމާޒެއްކަންވެސް ވަޒީރު ފާހަގަކުރެއްވިއެވެ.
އެގޮތުން އަޅުގަނޑުމެން ބަލާނަން އިސްލާމީ ކަންތައްތަކާބެހޭ ވުޒާރާއިން ޖަމިއްޔާތަކަށް ކޮށއދެވޭނީ ކޮން ކަންތައްތަކެއްތޯ ބަލާނަން. އަދި އެގޮތުން އަޅުގަނޑުމެން އެއްބަސްވުންތަކެއް ގާއިމްކުރާނަން ޖަމިއްޔާ ތަކާއެކު، އަދި ކުރިއަށް އޮތް ތަނުގައި މާތް الله އިރާދަކުރެއްވިޔާމު، އެކިއެކި ޖަމިއްޔާ ތަކުން ކުރަމުންގެންދާ މަސައްކަތްތަކަށް މާލީ ގޮތުންވެސް އެހީތެރިކަން ދެވެން އޮތް މިމްވަރަކުން މި ވުޒާރާއިން އެހީތެރިކަން އަރުވާނެކަމުގެ ފުރިހަމަ ޔަގީންކަން އަޅުގަނޑުދެން. ވަކިން ޚާއްސަކޮށް ނަމާދު ކުރުމަށް އަހުލުވެރި ކުރުވާނެ ފަދަ ޕްރޮގްރާމް ތަކާއި ކުދިކުދި މަޝްރޫޢުތަކަށް ދެވެން އޮތް ހުރިހާ އެހީތެރިކަމެއް އަރުވާނަން
އިސްލާމިކް މިނިސްޓްރ ޑރ މުހައްމަދު ޝަހީމް ޢަލީ ސަޢީދު
މިއަދު ފެށި ދީނީ ޖަމްޢިއްޔާަކުގެ އަހަރީ ބައްދަލުވުން ތިން ސެޝަނަކަށް ކުރިއަށް ގެންދިއުމަށް ހަމަޖެހިފައިވާއިރު މި ބައްދަލުވުމުގައި ރާއްޖޭގެ 70 ޖަމްޢިއްޔާއަކުން 98 މަންދޫބުން ބައިވެރިވާގޮތަށް ވަނީ ހަމަޖެހިފައެވެ. މީގެ ތެރޭގައި އޮންލައިންކޮށް ބައިވެރިވާ ބައެއް ފަރާތްތައްވެސް ހިމެނެއެވެ.
މި ބައްދަލުވުމުގެ ތެރެއިން ރާއްޖޭގެ ދަޢުވަތުގެ މައިދާނުގައި ހަރަކާތްތެރިވާ ބައެއް ބޮޑެތި ޖަމްޢިއްޔާތަކުގެ މަސައްކަތްތައް ކުރިއަށްދާ ގޮތް ހިއްސާކުރުމާއި، ޖަމްޢިއްޔާތަކުން ދަޢުވަތުގެ ކަންކަމުގައި ޚިޔާލު ހުށައެޅުމުގެ ފުރުސަތުވެސް ލިބިގެންދާނެ ކަމަށް އިސްލާމިކް މިނިސްޓްރީން ބުނެއެވެ.
Advertisement
This content is created and paid for by advertisers and does not involve Voice Journalists
