ޖަމިއްޔާތަކުން ނަމާދަށް އަހުލުވެރި ކުރުމަށް ކުރިއަށް ގެންދާ ޕްރޮގްރާމްތަކަށް އިސްލާމިކް މިނިސްޓްރީން މާލީ އެހީ ފޯރުކޮށްދެއްވާނެ ކަމުގެ ޔަގީންކަން އިސްލާމިކް މިނިސްޓްރ ޑރ މުހައްމަދު ޝަހީމް ޢަލީ ސަޢީދު ދެއްވައިފިއެވެ. 

ޝަހީމް މިހެން ވިދާޅުވީ ރާއްޖޭގެ އެކިކަންކޮޅުތަކުގައި ހަރަކާތްތެރިވާ ދީނީ އިޖުތިމާޢީ ޖަމްޢިއްޔާތަކާއެކު، ޖަމްޢިއްޔާތަކުގެ އަހަރީ ބައްދަލުވުން  ފެއްޓެވުމަށް މިއަދު ހެނދުނު އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވި ރަސްމިއްޔާތު ޝަރަފްވެރިކޮށްދެއްވާ ވާހަކަފުޅު ދައްކަވަމުންނެވެ.

އެގޮތުން ޝަހީމް ވިދާޅުވީ، ރާއްޖެ އިސްލާމްވިތާ 900 އަހަރާއި ގާތްވަމުންދާއިރު، ރާއްޖެ އިސްލާމްވި އިރާއި ބަލާއިރު، މިއަދު ރާއއޖެއަށް ފިކުރީ ގޮތުންނާއި އިޖުތިމާޢީ ގޮތުން ކުރިމަތުވެފައިވާ ގޮންޖެހުންތަކަކީ މީގެ ކުރިން ކުރިމަތިވެފައި ނުވާ ފަދަ ބޮޑެތި ގޮންޖެހުން ތަކެއް ކަމަށެވެ. 

Advertisement

ޝަހީމް ވިދާޅުވީ، އަދުގެ ސަރުކާރަކީ، އިސްލާމް ދީނުގެ ކަންތައް ތަކަށް ހުރުމަތްތެރިކޮށް ހިތައި، އިސްލާމްދީނާއި ގުޅުންހުރި ކަންތައްތައް ނެގެހެއްޓެމަށް މުހިންމު މަސައްކަތްތަކެއް ކުރާ ސަރުކާރެއް ކަމަށެވެ.

އަދި އިސްލާމް ދީން ފެތުރުމަށް ކުރާ މަސައްކަތް ތަކަށް އެހީތެރިކަން ފޯރުކޮށްދެއްވުމަކީ ރައީސް މުޢިއްޒުވެ ވަރަށްބޮޑު އަމާޒެއްކަންވެސް ވަޒީރު ފާހަގަކުރެއްވިއެވެ. 

މިއަދު ފެށި ދީނީ ޖަމްޢިއްޔާަކުގެ އަހަރީ ބައްދަލުވުން ތިން ސެޝަނަކަށް ކުރިއަށް ގެންދިއުމަށް ހަމަޖެހިފައިވާއިރު މި ބައްދަލުވުމުގައި ރާއްޖޭގެ 70 ޖަމްޢިއްޔާއަކުން 98 މަންދޫބުން ބައިވެރިވާގޮތަށް ވަނީ ހަމަޖެހިފައެވެ. މީގެ ތެރޭގައި އޮންލައިންކޮށް ބައިވެރިވާ ބައެއް ފަރާތްތައްވެސް ހިމެނެއެވެ.

މި ބައްދަލުވުމުގެ ތެރެއިން ރާއްޖޭގެ ދަޢުވަތުގެ މައިދާނުގައި ހަރަކާތްތެރިވާ ބައެއް ބޮޑެތި ޖަމްޢިއްޔާތަކުގެ މަސައްކަތްތައް ކުރިއަށްދާ ގޮތް ހިއްސާކުރުމާއި، ޖަމްޢިއްޔާތަކުން ދަޢުވަތުގެ ކަންކަމުގައި ޚިޔާލު ހުށައެޅުމުގެ ފުރުސަތުވެސް ލިބިގެންދާނެ ކަމަށް އިސްލާމިކް މިނިސްޓްރީން ބުނެއެވެ.