ޗައިނާގެ ޝަންހާއީއަށް1949 އަހަރަށްފަހު އެރި އެންމެ ބާރުގަދަ ތޫފާން އެ ސިޓީއަށް އަރާފައިވާކަމަށް ބޭރުގެ މީޑިއާތަކުން ބުނެފިއެވެ.

ބައިނަލްއަޤްވާމީ ބައެއް މީޑިއާތަކާ ހަވާލާދީ ޗައިނާގެ މީޓިއޮރޮލޮޖިކަލް އެޑްމިނިސްޓްރޭޝަނުން ބުނީ މި ތޫފާން އައިސްފައި ވަނީ ޝަންހާއީގެ އިރުމަތީގައި އޮންނަ ލިންގަންގް ނިއު ސިޓީގެ އައްސޭރިފަށުގެ ސަރަހައްދަށް ކަމަށެވެ. ތޫފާން އަރާފައިވަނީ، ހޯމަ ދުވަހުގެ ހެނދުނު 7:30 ހާއިރުކަމަށް ޗައިނާގެ ކަމާބެހޭ އިދާރާއިން ވަނީ ބުނެފައެވެ.

މި ތޫފާނަށް ބެބިންކާ ނަމުން ނަންދީފައިވާއިރު، ތޫފާނުގައި ގަޑިއަކު ގާތްގަނޑަކަށް 151 ކިލޯމީޓަރު ބާރު މިނުގައި ވައި ޖެހޭނެ ކަަމަށާއި މިއީ 1949 ވަނަ އަހަރު އެރި ތޫފާން ގްލޯރިއާއަށް ފަހު އެ ސިޓީއަށް އެރި އެންމެ ބާރުގަދަ ތޫފާން ކަމަށް އޮފިޝަލުން ބުނެއެވެ.

ތޫފާނުގެ ސަބަބުން ފްލައިޓްތަކާއި ރޭލު ދަތުރުތައް ކެންސަލްކޮށް، ހައިވޭތައް ވަނީ ބަންދުކޮށްފައެވެ.

ރެޑް އެލާޓް ނެރެ، ޔަންގްޒީ ކޯރުގައި އޮންނަ ރަށެއް ކަމަށްވާ ޗޮންގްމިން ޑިސްޓްރިކްޓުން 9،000 އެއްހާ މީހުން ސަލާމަތީ ހިސާބުތަކަށް ގެންގޮސްފައިވާ ކަމަށް ސިޓީގެ އޮފިޝަލުން ވަނީ ބުނެފައެވެ.