ރާއްޖޭގައި ބައިނަލްއަޤްވާމީ ބަންކަރިންގ ޚިދުމަތް ފެށުމަށް ތައްޔާރުވަމުންދާއިރު، މި ޚިދުމަތަށް މިހާރުވެސް ބުކިންތައް ލިބެމުންދާ ކަމަށް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ހާމަކޮށްފިއެވެ.
އެސްޓީއޯއިން މަޢުލޫމާތު ދެއްވާފައިވާ ގޮތުގައި، މި ޚިދުމަތް ފެށުމަށް ހަމަޖެހިފައިވަނީ މި މަހުގެ 19 ވަނަ ދުވަހުއެވެ. ފުރަތަމަ ބަންކަރިންގ ޚިދުމަތް ފޯރުކޮށްދޭނީ އެމެއެސްއެސް އިން އޮޕަރޭޓް ކުރަމުން އަންނަ "ވައި.ސީ ބެރިއާރ" ނަމަކަށް ކިޔާ އުޅަނދަކަށެވެ. މިއީ ކޮލަމްބޯއާއި މާލެއާ ދެމެދު ދަތުރުކުރާ، މަހަކު 200 ޓަނުގެ ތެޔޮ ބޭނުންކުރާ އުޅަނދެކެވެ.
މީގެ ކުރިން މި ސަރަޙައްދުގައި ބަންކަރިންގ ޚިދުމަތް ދެމުން އައީ ކޮލަމްބޯ އަދި އިންޑިއާގެ ބަނދަރުތަކުންނެވެ. ނަމަވެސް މިހާރު ރާއްޖޭގައި މި ޚިދުމަތް ފެށުމާއެކު، ބަންކަރިންގ ޚިދުމަތުގެ އިތުރުން އެހެނިހެން އެހީތެރިކަމުގެ ޚިދުމަތްތައްވެސް ފޯރުކޮށްދޭނެ ކަމަށް އެސްޓީއޯއިން ބުނެފައިވެއެވެ.
މި ޚިދުމަތް ފެށުމަކީ ރާއްޖޭގެ ކަނޑުގެ ދަތުރުފަތުރުގެ ދާއިރާއަށާއި އިޤްތިޞާދަށް ލިބޭނެ ބޮޑު ކުރިއެރުމެއްކަމަށް ބެލެވެއެވެ. އަދި މިކަމުގެ ސަބަބުން ރާއްޖެއަށް އިތުރު އާމްދަނީއެއް ލިބޭނެ ކަމަށްވެސް އުއްމީދުކުރެވެއެވެ.
Advertisement
This content is created and paid for by advertisers and does not involve Voice Journalists
